ძმებმა ლაშა და კახა გიგიტელაშვილები My.ge.-ს 100 პროცენტი გაასხვისეს. ერთ-ერთი უმსხვილესი ბიზნეს გარიგება მიმდინარე წელს დასრულდა. ამის შესახებ სოციალურ ქსელი კახა გიგიტელაშვილი წერს. ბიზნესმენის თქმით, კომპანია მათ 18 წლის ისტორიის შემდეგ დატოვეს.
„დაახლოებით 18 წლის ისტორიის შემდეგ დავტოვეთ MY.GE.
უპირველეს ყოვლისა დიდი მადლობა მილიონობით მომხმარებელს, რომელიც ამ პერიოდის განმავლობაში იყო მთავარი მამოძრავებელი ძალა კომპანიის განვითარებაში. თქვენი იდეები, თანადგომა, რჩევები გახდა საფუძველი იმისა რომ დღეს მაი.ჯი ყოველდღიური ცხოვრების ნაწილად იქცა, არის საქართველოში ციფრული სამყაროს უნიკალური პლატფორმა და უმარტივებს ცხოვრებას მილიონობით ინტერნეტ მომხმარებელს.
გვინდა მადლობა მოგახსენოთ მაი.ჯი-ს გუნდის თითოეულ წევრს, რომელთანაც მოგვიწია თანამშრომლობა ამ პერიოდის განმავლობაში. კომპანია თქვენთან ერთად იზრდებოდა და თქვენ ხართ მთავარი მიზეზი მაი.ჯი-ს წარმატების. ეს იყო დაუვიწყარი თავგადასავალი და თითოეულ თქვენგანს გულითად მადლობას მოგახსენებთ. გვჯერა რომ მაი.ჯი-ს გუნდი ნამდვილად ყველაფერს შეძლებს. წარმატებები თქვენ!
მადლობა TBC - თიბისი გუნდს, რომელმაც გამოხატა ნდობა კომპანიის მიმართ და დარწმუნებული ვართ ამ გუნდთან ერთად კომპანია მრავალ დიდ წარმატებას მიაღწევს რეგიონში და მის ფარგლებს გარეთ.
საუკეთესო სურვილებით,
ლაშა და კახა გიგიტელაშვილები“, - წერს ბიზნესმენი.
შეგახსენებთ, რომ 2019 წელს თიბისი ჯგუფმა პლატფორმის 65%-იანი წილი შეიძინა. გარიგების ღირებულება 19 მილიონი ლარი იყო. ამ დროს თიბისი დარჩენილი 35%-იანი წილის გამოსყიდვასაც გეგმავდა. თიბისი my.ge-ის 100%-იანი წილის მფლობელი დაახლოებით 30 მლნ ლარად გახდა. კომპანია ჯამში 8 პლატფორმას www.My.Ge, www.MyAuto.Ge, www.MyHome.Ge, www.MyMarket.Ge, www.MyJobs.Ge, www.MyParts.Ge, /www.MyAds.Ge-სა და www.MySports.Ge-ს აერთიანებდა.