„თიბისი ბანკის“ ახალი სათავო ოფისის შენობის მშენებლობის 52%-ი დასრულებულია. საუბარია, რკინა-ბეტონის სამუშაოებზე, რომელიც სრულად 2021 წლის ზაფხულში დასრულდება. „თიბისი ბანკში“ აცხადებენ, რომ COVID-19 პანდემიამ გარკვეულწილად გავლენა იქონია მშენებლობაზე და მასალების მოწოდებაზე, თუმცა,მათი განმარტებით მშენებლობა ძირითადი პერიოდის განმავლობაში შეუჩერებლად მიმდინარეობდა. „კომერსანტის“ კითხვაზე ხომ არ გადაიწია მშენებლობის დასრულების ვადამ, საფინანსო ინსტიტუტში გვპასუხობენ:
„ამ ეტაპზე მიმდინარეობს სამშენებლო პროგრამის (ვადების) ანალიზი. სამუშაოები გრძელდება და შეზღუდვების მოხსნასთან ერთად დაუბრუნდება სრულ მასშტაბს“, - აცხადებენ „თიბისი ბანკში“.
„თიბისი ბანკის“ ინფორმაციით, ამ დროისთვის მთლიანი პროექტის 12-15%-ია შესრულებული. მათივე განმარტებით, ამ ეტაპზე დასრულებულია მიწისქვეშა 2 სართულის მშენებლობა. საფინანსო ინსტიტუტში განმარტავენ, რომ მიმდინარეობს პირველი (HQ Cluster) ბლოკის მე-4 სართულის მშენებლობა, მეორე (Subsidiaries Cluster) და მესამე (Public Cluster) ბლოკის 0 სართულის მშენებლობა.
როგორც ცნობილია, ობიექტის ჯამური ფართობი დაახლოებით 70,000 კვადრატული მეტრია. გეგმის მიხედვით ობიექტი 2021 წლის მეოთხე კვარტალში დასრულდება. რკინა-ბეტონის მიმდინარე სამშენებლო სამუშაოებს კომპანია „დომუს დეველოპმენტი“ ახორციელებს.
თიბისი ბანკის ახალი სათავო ოფისის მშენებლობას 2018 წლის 17 დეკემბერს, ბანკის 26-ე იუბილეზე ჩაეყარა საფუძველი. როგორც ბანკში აცხადებენ, ამ პერიოდის განმავლობაში, თიბისის სათავო ოფისის მშენებლობის სამუშაოები აქტიურად მიმდინარეობს.
როგორც თიბისი ბანკში აცხადებენ, ახალი სათავო ოფისის მშენებლობის განხორციელებისთვის საჭირო ინვესტიცია გარედან არ არის მოძიებული და მას სრულად ბანკი აფინანსებს. პროექტის ჯამური ღირებულება 72 მლნ აშშ დოლარს შეადგენს, კანონით დადგენილი ყველა გადასახადის ჩათვლით.
აღსანიშნავია, რომ თიბისის ახალი სათავო ოფისის დიზაინი შატილის კოშკების ინსპირაციით შეიქმნა, სადაც არქიტექტურული ნაგებობები ჰარმონიულად ერწყმის ლანდშაფტს მათი ტერასული განლაგებისა და დიდი ზომის აივნების წყალობით. სწორედ ეს არის ამ კონცეფციის მთავარი ამოსავალი: ქალაქის ცენტრისგან მოშორებით, ლისის ტბასთან,მთის ფერდობზე შეფენილი კომპლექსი, სადაც ადამიანებზე მორგებული, ეკოლოგიურად სუფთა, გამწვანებული გარემოა შექმნილი. თიბისის თანამშრომლები კომფორტულ გარემოში მუშაობას და დასვენებას, კოლეგებსა და სტუმრებს შორის ინტერაქციას შეძლებენ.
მათივე ინფორმაციით, შენობა მთლიანად ენერგოეფექტურია და მინიმალური რაოდენობის ელექტროენერგიას მოიხმარს. პროექტი 80/20 კონცეფციას ეფუძნება, რაც იმას ნიშნავს, რომ ტერიტორიის მხოლოდ 20%-ზე განხორციელდება მშენებლობა, 80%-ი კი გამწვანებასა და რეკრეაციული ზონების მოწყობას დაეთმობა. პროექტის ავტორი საერთაშორისო კომპანია – UNStudio-ა. UNStudio-მ პროექტის განხორციელების დაწყებამდე სერიოზული მოსამზადებელი სამუშაოები განახორციელა, საფუძვლიანად გამოიკვლია ლოკაცია, შეისწავლა თიბისის, როგორც ბრენდის სტრატეგია და ღირებულებები.
ბაჩო ადამია