საქართველოში მეცხოველეობაში პირველი შემთხვევაა, როცა ფერმაში ადამიანების სამუშაოს რობოტი შეასრულებს.  ახალი ტექნიკის სრულ აღჭურვასა და შემდეგ უკვე გამართულ მუშაობას კომპანია „კავკასიის გენეტიკა განახორციელებს.

„კავკასიის გენეტიკის“ დამფუძნებელი და ხელმძღვანელი თამარ ყაჭაშვილი „კომერსანტთან“ საუბარში ამბობს, რომ აღნიშნულ პროექტში გამოყენებულ იქნება ამ დარგში მსოფლიო ლიდერის, DeLaval-ის ტექნოლოგიები.

„სოფლის მეურნეობაში თანამედროვე ტექნოლოგიების გამოყენება პროდუქტიულობის, ხარისხის ზრდის მთავარი პირობაა და სწორედ ამაზეა აქცენტი გადატანილი. ამის გარეშე ფერმერული მეურნეობები ვერ განვითარდებიან.  შესაბამისად, ის ტექნოლოგიები, რაც მიღებული და დანერგილია ევროპის და აშშ-ის ამავე სექტორში, საქართველოშიც უნდა იყოს ხელმისაწვდომი, რასაც აქტიურად ვცდილობთ. არსებობს სხვადასხვა ტიპის ტექნოლოგიები, მათ შორის, რობოტული, რომელსაც განვითარებული ქვეყნები ფერმერულ მეურნეობებში იყენებენ, თუმცა საქართველოში პირველად ინერგება. ამ მხრივ ტიბაანის მეცხოველეობის ცენტრი პირველია, სადაც რობოტი იმუშავებს. ცხადია, ადამიანის შრომას დიდწილად ჩაანაცვლებს, ასევე დაზოგავს ფერმის ხარჯს, რაც წარმადობის ზრდისა და განვითარებისთვის მნიშვნელოვანია“, - ამბობს თამარ ყაჭაშვილი.

გარდა რობოტისა, კომპანია თანამედროვე ტექნოლოგიების თითქმის სრული ასორტიმენტის მიმწოდებელია. თამარ ყაჭაშვილის ინფორმაციით, 7000-ზე მეტი დასახელების პროდუქციის მრავალფეროვანი არჩევანია, როგორიცაა მეცხოველეობისა და მეფრინველეობის ფერმების აღჭურვილობა, ხელოვნური განაყოფიერების ინსტრუმენტები, ავტომატური და მობილური საწველი სისტემები, ასევე საძოვრების მართვის სისტემები (ელექტრო ღობე) და მრავალი სხვა სახის პროდუქტი და მომსახურება.

ტექნოლოგიური უზრუნველყოფის გარდა, ,,კავკასიის გენეტიკა“ აქტიურად მუშაობს, რომ ფერმერული მეურნეობით დაინტერესებულმა პირებმა მიიღონ ინფორმაცია, ცოდნა და გაიზიარონ გამოცდილება, რაც არსებობს და აპრობირებულია განვითარებულ მსოფლიოში.

„კავკასიის გენეტიკა”  2006 წელს დაფუძნდა. მის სახელს უკავშირდება მეცხოველეობის მიმართულებით თანამედროვე ტექნოლოგიების შემოტანა-დანერგვა ქვეყანაში და არაერთი მნიშვნელოვანი პროექტის განხორციელება.

2019 წლიდან კომპანია DeLaval-ის ოფიციალური წარმომადგენელია საქართველოში.

მარი ჩიტაია