ჯანდაცვის მსოფლიო ორგანიზაციამ კორონავირუსის პანდემიის დაწყების შესახებ 1 წლის წინ განაცხადა.
გთავაზობთ, 8 ძირითად პროგნოზს ვირუსთან დაკავშირებით, რომელიც იმ დღეებში გამოითქვა:
1.კორონავირუსი ჩვეულებრივი სეზონური დაავადება გახდება, როგორც გრიპი - არ გამართლდა
იმის მიუხედავად, რომ ზამთარში გრიპით დაინფიცირება იზრდება, ზაფხულში კი კლებულობს, კორონავირუსი ამ სქემით არ მოქმედებს. ის ერთნაირად აქტიურია წელიწადის ნებისმიერ პერიოდში, ზოგ ქვეყანაში პანდემიის პიკი ზამთარში იყო, ზოგიერთში კი - ზაფხულში.
ამ სეზონზე გრიპით დაავადებების რაოდენობა მკვეთრად შემცირდა, ამის მიზეზი კორონავირუსის წინაამღდეგ მიღებული ზომები გახდა - პირბადეების ტარება, სოციალური დისტანცირება და ა.შ.
2.პირბადეები საჭირო არ იქნება - არ გამართლდა
პირბადეების ტარება პანდემიის დასაწყისში ცხარე კამათის საგანი იყო. პირველ ეტაპზე აშშ-ს დაავადებათა კონტროლის სამსახური პირბადეების ტარებას სავალდებულოდ მხოლოდ სამედიცინო დაწესებულებებში მიიჩნევდა.
თუმცა, შემდეგ, როდესაც დაინფიცირება გაიზარდა, მეცნიერებმა კი კორონავირუსის ორგანიზმში შეღწევის თაობაზე მეტი გაიგეს, ვითარება კარდინალურად შეიცვალა, დღეს პირბადის ტარებაზე კორონა-სკეპტიკოსების გარდა არავინ კამათობს.
3. ყველაზე მეტად ლტოლვილთა ბანაკები დაზარალდებიან - არ გამართლდა
ლტოლვილთა ბანაკებში ვირუსის გავრცელებისთვის თითქმის იდეალური პირობებია, თუმცა, აპოკალიპტური პროგნოზები ჯერჯერობით არ გამართლდა. თვეების მანძილზე იქ მცხოვრები ლტოლვილების მიმართ ადგილობრივი მოსახლეობასთან შედარებით გაცილებით უფრო მკაცრი შეზღუდვები მოქმედებს და სავარაუდოდ, სწორედ ამიტომ, ამ ტიპის ბანაკებში მასშტაბური დაინფიცირება არ დაფიქსირებულა.
4. გადავსებული პლიაჟები და ინფიცირების მთავარი წყაროები გახდებიან - არ გამართლდა
ექსპერტების აზრით, ღია სივრცეში ვირუსი ნაკლებად ვრცელდება, მაგრამ შიშები პლიაჟებთან დაკავშირებით მაინც იყო.
თუმცა, ყველაფერმა მშვიდად ჩაიარა, კორონავირუსის აფეთქებები ზღვაზე დასვენებასთან კავშირში არ იყო, თუმცა, პლიაჟიდან წვეულებაზე ან რესტორანში წასვლა ვირუსის გავრცელებას ხელს ნამდვილად უწყობს.
5. ყოფითი ძალადობა გაიზრდება - გამართლდა
საყოველთაო იზოლირებამ და ადამიანების თვეების მანძილზე იძულებითმა ჩაკეტვამ ყოფითი ძალადობის ზრდას ხელი შეუწყო, განსაკუთრებით ეს ქალებს შეეხოთ.
6. გადაადგილების აკრძალვა ვირუსის გავრცელებას შეაჩერებს - არ გამართლდა
სოციალური კონტაქტების შემცირება და გადაადგილების შეზღუდვა პანდემიასთან ბრძოლის ერთ-ერთ ბერკეტად დღესაც რჩება.
მაგრამ ამ ზომის ეფექტურობისთვის საჭიროა კომპლექსური მიდგომა, რომელიც ასევე მოგზაურთა ტესტირებას და დაბრუნების შემდეგ კარანტინის გავლას გულისხმობს.
7. სკოლების დახურვა და სამუშაოს დაკარგვა ქალებზე არაპროპორციულად ძლიერად იმოქმედებს - გამართლდა
პანდემია სხვადასხვა ქვეყნებში განსხვავებულად მოქმედებს თუმცა, ცალსახაა, რომ ნებისმიერ ქვეყანაში ბავშვების მოვლის ტვირთი ქალებზე მეტად ვრცელდება, ვიდრე კაცებზე. ეს განსაკუთრებით მაშინ ჩანს, როდესაც ბავშვები ბაღებში და სკოლებში ვერ დადიან.
ქალების მიღწევები, რომლებსაც ათწლეულები დასჭირდა, პანდემიამ სულ რამდენიმე თვეში წყალში ჩაყარა - ზოგიერთი საზოგადოებისთვის და პროფესიისთვის, ამან შესაძლოა უკან მთელი თაობები დასწიოს.
8. კონტაქტების დამდგენი აპლიკაციები საყოველთაოდ გავრცელდება - არ გამართლდა
კორონავირუსული კონტაქტების დადგენის ინტენსიურობა ქვეყნების მიხედვით მნიშვნელოვნად განსხვავდება. ჩინეთმა, სინგაპურმა, ისრაელმა და სამხრეთ კორეამ საკუთარ მოქალაქეებზე თვალთვალი პანდემიასთან ბრძოლის სტრატეგიად აქციეს, თუმცა, თავისუფლებას და კონფიდენციალურობას მიჩვეულმა ევროპელებმა და ამერიკელებმა ამ ზომას ვერ მიმართეს.
washingtonpost.com
მოამზადა თენგიზ აბლოთიამ