“ჩინეთი მსოფლიო ბატონობასთან ძალიან ახლოსაა და ევროპამ ეს ახალი რეალობა კარგად უნდა გაიაზროს” - მიიჩნევს გერმანიის საგარეო დაზვერვის ყოფილი უფროსი გერჰარდ შინდლერი.
მისი თქმით, ამ სიტუაციაში ბერლინმა პეკინზე სტრატეგიული დამოკიდებულების დონე უნდა შეამციროს და სხვა ზომებთან ერთად 5G-ქსელთან ჩინურ Huawei-ის წვდომა დაუკეტოს.
„ბოლო დრომდე გერმანიის მთავრობა ჩინეთის მიმართ მკვეთრი განცხადებისგან თავს იკავებდა და ეს გასაგებიცაა - ბერლინი საქმიან ურთიერთობების უფრთხილდება, ჩინეთი ხომ ქვეყნის უმსხვილესი სავაჭრო პარტნიორია. თუმცა, ბოლო პერიოდში გერმანიის ტონი შეიცვალა - განსაკუთრებით, იმის შემდეგ, რაც ჩინეთმა ჰონკონგში რეპრესიების მანქანა აამუშავა“ - ამბობს შინდლერი.
ყოფილი მზვერავი ამბობს, რომ უახლოეს დღეებში მერკელის მთავრობა გადაწყვეტს - გაიზიარებს თუ არა ბრიტანეთის მიდგომას, რომელმაც Huawei-ს საქმიანობა სამეფოს ტერიტორიაზე მნიშვნელოვნად შეზღუდა იმის გამო, რომ ამ ტექნოლოგიურ გიგანტს ჩინეთის მთავრობასთან ზედმეტად მჭიდრო კავშირები აქვს.
შინდლერი ასევე ყურადღებას ამახვილებს პეკინის აგრესიურ პოლიტიკაზე სამხრეთ ჩინეთის ზღვაში, მის ეკონომიკურ ექსპანსიაზე აფრიკაში და „ახალ აბრეშუმის გზაზე“, რომლის ინფრასტრუქტურაც მთელს ევრაზიას მოიცავს.
„ჩინეთი ძალიან ჭკვიანურად, ზედმეტი ხმაურის გარეშე, თუმცა თანმიმდევრულად მოქმედებს და სამწუხაროდ, ევროპაში ამაზე არავინ რეაგირებს. ჩვენს დამოკიდებულებაში ჩინეთისადმი საქმიანი ურთიერთობები დომინირებს და ეს მიდგომა გადასახედია“ - თვლის შინდლერი.
დაზვერვის ყოფილი უფროსის აზრით, არის დარგები, სადაც ევროპის დამოკიდებულება ჩინეთზე დაუშვებლად მაღალია - მაგალითად, ავტომრეწველობაში. ვითარება ამ სექტორში აშკარად შესაცვლელია , რადგანაც ეს დამოკიდებულება ყოველწლიურად არათუ არ მცირდება, არამედ იზრდება.
შინდლერი ასევე მიიჩნევს, რომ დასავლეთმა საკუთარი მაღალი ტექნოლოგიები უფრო ძლიერად, და ასევე ჩინეთისგან დამოუკიდებლად უნდა განავითაროს. ერთ დროს ჩინეთი ტექნოლოგიების თვალსაზრისით აუთსაიდერი იყო, დღეს კი - პირველ რიგებშია, და დიდწილად ეს ისევ დასავლეთის დამსახურებაა.
დღეს პეკინის ეს ტექნოლოგიური ზრდა ევროპას პრობლემებს უქმნის.
„ტექნოლოგიების თვალსაზრისით Huawei ევროპელ და ამერიკელ კონკურენტებს იმდენად უსწრებს, რომ ჩვენ არც კი ვიცით, რა იქნება ჩადებული მათ მიერ შექმნილ 5G-ის ქსელებში, ადვილი შესაძლებელია, რომ მასში პეკინში ინფორმაციის გადაქაჩვისთვის საიდუმლო არხები ჩაიდოს. მთელი ჩვენი სახელმწიფო თუ სამრეწველო საიდუმლოები ჩინეთის დაზვერვის ხელში მოხვდება ისე, რომ ამის შესახებ ვერც გავიგებთ. თანაც, ამას საკუთარი ხელებით გავაკეთებთ“ - წუხს გერჰარდ შინდლერი.
მისი თქმით, Huawei-სთვის ქსელების შექმნის მინდობა იგივეა, რომ „ორთქლის ძრავების ინჟინერს შიდა წვის ძრავის ექსპერტიზა მიანდო. თავიდანვე ნათელია, რომ პასუხი მიკერძოებული იქნება“ - მიიჩნევს გერმანიის საგარეო დაზვერვის ყოფილი უფროსი.
www.thetimes.co.uk
მოამზადა თენგიზ აბლოთიამ