ბრიტანეთში ბოლო პერიოდში ინფლაცია მნიშვნელოვნად იზრდება,რისი ერთ-ერთი მიზეზი მძღოლების დეფიციტი გახდა.
კვლევითი ცენტრის NielsenIQ-ს ინფორმაციით, ეს დაკავშირებულია იმასთან, რომ მძღოლები მართვის მოწმობების ვადის გაგრძელებისთვის აუცილებელ ტესტირებას ვერ გადიან, რადგან პანდემიის გამო ქვეყანაში თითქმის ყველა ავტოსკოლა დაკეტილია. გარდა ამისა კიდევ ერთი პრობლემა, რომელიც კორონავირუსით არ არის გამოწვეული, არის ის, რომ მიგრანტებს, რომლებიც ბრიტანეთში სატვირთო ტრაილერების მძღოლებად მუშაობდნენ, ბრექსიტის გამო ქვეყნის დატოვება მოუწიათ.
ლოგისტიკაში კადრების დეფიციტმა მომარაგების ჯაჭვში წყვეტა გამოიწვია, რის გამოც ელექტროტექნიკის წარმოება შემცირდა - რომელიც ჩიპების გლობალური დეფიციტის გამო ისედაც მძიმე მდგომარეობაში იყო . ამის გამო ელექტრონიკა გაძვირდა, რამაც არასასურსათო საქონელზე წინა თვესთან შედარებით ფასების 0.7% - ით მატება გამოიწვია, რაც აგვისტოში ივლისთან შედარებით ზოგადი ფასების 0,4%-ით ზრდის მიზეზი გახდა.
„მთავრობის სწრაფი და ეფექტური ქმედებების გარეშე, ბრიტანელებს ამ ყველაფრის ანაზღაურება საკუთარი ჯიბიდან მოუწევთ“ - განაცხადა ბრიტანეთის საცალო ვაჭრობის ასოციაციის პრეზიდენტმა ჰელენ დიკინსონმა.
მან მთავრობისგან სატვირთო ავტომობილების მძღოლებისთვის გამოცდების რაოდენობის გაზრდა, მათი სწავლების ფინანსირების წესის შეცვლა და ევროკავშირის მოქალაქე-მძღოლებისთვის დროებითი ვიზების გაცემა მოითხოვა. მისი თქმით, ასეთი გზით შესაძლებელი იქნება პერსონალის დეფიციტის დაძლევა, და მომარაგების ჯაჭვის შეუფერხებელი ფუნქციონირების აღდგენა. წინააღმდეგ შემთხვევაში ის, რაც ბრიტანეთში დღეს ხდება მხოლოდ დასაწყისია - მიიჩნევს დიკინსონი.
„თუ მთავრობა არაფერს არ მოიმოქმედებს, შობის წინა პერიოდში ვითარება კიდევ უფრო გართულდება. არჩევანიც შემცირდება და თითქმის ყველა საქონელზე ფასები გაიზრდება.- ეს გაფრთხილება მას შემდეგ ჟღერს, რაც სათამაშოების რითეილერმა The Entertainer-მა განაცხადა, რომ მომარაგების ჯაჭვში წყვეტის, მუშახელის უკმარისობის, და სატრანსპორტო დანახარჯების ზრდის გამო, 18 თვის მანძილზე ფასები შესაძლოა 10%-ით გაიზარდოს. სუპერმარკეტების ქსელმა Iceland-მა გააფრთხილა მომხმარებლები, რომ მძღოლების დეფიციტმა შესაძლოა საშობაო განწყობები გააფუჭოს.
ინფლაციის მიუხედავად, ბრიტანეთის სავაჭრო ქსელებში ფასები 2020 წელზე დაბალ ნიშნულზეა. აგვისტოს დასაწყისში, მძღოლების კრიზისამდე, ქვეყანაში 0,8%-ანი დეფლაცია დაფიქსირდა. ის რაც დღეს ხდება, მხოლოდ პირველი ეტაპია. „ჩვენ გვაქვს იმის ნიშნები, რომ სატრანსპორტო დანახარჯების ზრდა პროდუქციაზე ფასების მატებას იწვევს.თუ მთავრობამ კონკრეტული ზომები არ მიიღო, მომავალში ეს ტენდენცია მხოლოდ გაგრძელდება.“ - ამბობს ჰელენ დიკინსონი. ინფლაციის მაღალი მაჩვენებელი ბევრი ქვეყნისთვის სერიოზულ პრობლემად იქცა. ფასების მკვეთრი ზრდა ეკონომიკური სტიმულირების უპრეცედენტო მასშტაბების ფინანსურმა პროგრამებმა გამოიწვიეს. მაგალითად, ევროზონაში ინფლაციამ 10-წლიან მაქსიმუმს მიაღწია. ევროსტატის პროგნოზით 2021 წლის აგვისტოში ინფლაციის დონე 3% იქნება, მაშინ როდესაც ივლისში - 2,2%.
მოამზადა თენგიზ აბლოთიამ,