სავარაუდოდ, 2020 წელი სიკვდილიანობის კუთხით ქვეყნის ისტორიაში ყველაზე მძიმე იქნება - თუ არ ჩავთვლით ომების პერიოდებს.
ჯანდაცვის დარგში ექსპერტები აცხადებენ, რომ 2020 წელს შტატებში სიცოცხლის ხანძლივობა სავარაუდოდ, 3 წლით შემცირდება.
საბოლოო მონაცემები სიკვდილიანობის თაობაზე რამდენიმე თვეში გამოცხადდება, თუმცა, წინასწარი მონაცემებით, ამ წელს აშშ-ში 3,2 მლნ.-ზე მეტი ადამიანი გარდაიცვლება. ეს კი ნიშნავს, რომ ეს პირველი წელია შტატების ისტორიაში, როდესაც სიკვდილიანობამ 3 მლნ.-ს გადააჭარბა.
სავარაუდოდ, ზრდა 15% იქნება, რაც ყველაზე მაღალი მაჩვენებელია 1918 წლის შემდეგ, როდესაც ასობით ათასი ამერიკელი პირველ მსოფლიო ომში და გრიპის ეპიდემიის დროს დაიღუპა.
დაავადებათა კონტროლის და პროფილაქტიკის სამსახურის სტატისტიკის დეპარტამენტის უფროსის რობერტ ანდერსონის თქმით, სიცოცხლის მოსალოდნელი ხანგძლივობა 3 წლით შემცირდება.
ჯონ ჰოპკინსის უნივერსიტეტის მონაცემებით, შტატებში კორონავირუსით დაავადებულთა რაოდენობამ 18 მლნ.-ს გადააჭარბა, გარდაცვლილია 320 000-ზე მეტი ადამიანი. შედარებისთვის - ამერიკაში 2019 წელს გულის დაავადებებისგან 659 000, ხოლო კიბოსგან 600 000 ადამიანი გარდაიცვალა.
სიკვდილიანობის მესამე ძირითადი მიზეზი უბედური შემთხვევები იყო - 173 000 ადამიანი. 2020 წელს მე-3 ადგილი კორონავირუსმა დაიკავა.
პანდემია არსად გამქრალა, და ის ჩვეულებრივად გრძელდება, და სხვადასხვა მოდელების პროგნოზით, მარტისთვის კორონავირუსით დაღუპულთა რაოდენობა 500 000-ს გადააჭარბებს.
რობერტ ანდერსონის თქმით, აგვისტოში ჩატარებული კვლევის თანახმად, სიცოცხლის ხანგძლივობა 1,5 წლით უკვე შემცირდა, და ეს მხოლოდ დასაწყისია.
„აგვისტოს შემდეგ პანდემია არათუ არ შესუსტდა, არამედ გაგრძელდა. დღეს ჩვენ მეორე ტალღის პირობებში ვიმყოფებით, დაინფიცირება და სიკვდილიანობა არ მცირდება, ამიტომაც, წლის ბოლომდე სიცოცხლის ხანგძლივობის შემცირება 3 წლამდე გაიზრდება“ - განაცხადა მან.
ანდერსონის თქმით, ეს ყველაზე მასშტაბური შემცირება იქნება 1943 წლიდან, როდესაც მე-2 მსოფლიო ომის დროს ასობით ათასი ახალგაზრდის დაღუპვამ ეს მაჩვენებელი 2, 9 წლით შეამცირა.
თუმცა, მოსალოდნელი ვარდნა გაცილებით მცირეა, ვიდრე 1918 წელს, როდესაც პირველი მსოფლიო ომის და გრიპის ეპიდემიის შედეგად სიცოცხლის საშუალო ხანგძლივობა 11,8 წლით შემცირდა.
ეს უზარმაზარი ციფრი იმან გამოიწვია, რომ გრიპი განსაკუთებით საშიშია ბავშვებისთვის, რომელთა დიდი რაოდენობით გარდაცვალებამ სიცოცხლის ხანგძლივობის არაპროპორციული შემცირება გამოიწვია.
ნიუ-ჰემფშირის უნივერსიტეტის დემოგრაფის კენეტ ჯონსონის თქმით, პანდემიის შედეგად სიკვდილიანობა შობადობას რეგიონების 50%-ში გადააჭარბებს.
„დღეს ბავშვების გაჩენისგან ყველა თავის იკავებს. საავადმყოფოები გაჭედილია, ადამიანები მასობრივად კვდებიან. ასეთ მდგომარეობაში ბავშვების გაჩენა არავის სურს“ - ამბობს ჯონსონი.
The guardian.com
მოამზადა თენგიზ აბლოთიამ