ბოლო თვეების მანძილზე აშშ-ს ეკონომიკამ სწრაფი აღდგენა დაიწყო, თუმცა ოპტიმიზმისთვის ჯერ არც თუ ისე ბევრი საფუძველია - შტატების ფედერალური რეზერვის ხელმძღვანელმა ჯერომ პაუელმა განაცხადა, რომ აღდგენის პროცესი შენელებას იწყებს.

პარალელურად კონგრესის კომიტეტებმა სტიმულირების პაკეტი მოიწონეს, რაც ასევე ცუდი ნიშანია, რადგანაც ამერიკელი კანონმდებლები მიიჩნევენ, რომ ბიზნესს და მოსახლობის ასობით მილიარდი დოლარის დახმარება კვლავაც სჭირდებათ, ეს ნიშნავს, რომ საქმეები ეკონომიკაში საკმაოდ ცუდადაა.

ნოემბრის შრომის სტატისტიკა მოსალოდნელზე პესიმისტური აღმოჩნდა  - სამუშაო ადგილების შექმნა შეფერხდა და მილიონობით ამერიკელი კვლავ უმუშევარი რჩება.

ამერიკა საშიშ გზაჯვარედინზე დგას, ნოემბრის ბოლო კვირის მანძილზე სასტუმროების დატვირთულობამ 40% შეადგინა, მაშინ, როდესაც წინა პერიოდში 50% იყო. ჯავშნების პლათფრომის OpenTable-ს მონაცემებით, საანგარიშო პერიოდში რესტორნებში კლიენტების რაოდენობა მკვეთრად შემცირდა და ყველაზე მეტად ეს კორონავირუსით სხვებზე მეტად დაზარალებულ შტატებს შეეხება.

ასევე შეჩერდა ავიაგადაზიდვების ზრდა.

სხვა სტატისტიკური მონაცემებიც ნაკლებად დამაიმედებელია - დროებით დახურული მცირე და საშუალო კომპანიების რაოდენობა კვლავ იზრდება, ხოლო მომხმარებელთა ხარჯები 5%-ით შემცირდა.

კვლევებით ასევე დასტურდება სავაჭრო ცენტრების და გასართობი ზონების ვიზიტორების რაოდენობის შემცირება - შემოდგომაზე ნელი ზრდის შემდეგ ამ დარგებში ისევ ვარდნა დაიწყო.

ამერიკა უკეთეს მდგომარეობაშია ვიდრე ევროპა, სადაც ბოლო კვირების მანძილზე თითქმის ყველგან ლოკდაუნი ამოქმედდა, მაგრამ ბანკ JP Morgan Chase-ის კვლევის შედეგების თანახმად, შტატების ეკონომიკის აღდგენის პროცესი შეჩერდა.

ეს მოსალოდნელიც იყო - თვითიზოლაციის რეჟიმის შერბილებამ სამომხმარებლო ხარჯების ზრდას ხელი შეუწყო, თუმცა რეჟიმის შემდგომი შესუსტება არ მოხდა   - პანდემიის მეორე ტალღა ნორმალური ცხოვრების სრულფასოვან აღდგენას აფერხებს.

გარდა ამისა, კონგრესი სტიმულირების ახალ პაკეტზე ჯერ ვერ თანხმდება, მაშინ, როდესაც სწორედ ამ პაკეტზეა დიდწილად დამოკიდებული აღდგენის პროცესის გაგრძელება.

მაგრამ ყველაფერი ამის მიუხედავად, ეკონომიკის მთავარი შემაფერხებელი ძალა კვლავ კორონავირუსია - დაინფიცირების მასშტაბები არ კლებულობს და მაღალი სიკვდილიანობა ეკონომიკაზე ძალიან ნეგატიურად აისახება.

საბოლოოდ კი ამერიკისთვის ჭეშმარიტება ისეთივე მარტივია, როგორც დანარჩენი მსოფლიოსთვის - ეკონომიკის მდგრადი ზრდა და აღდგენა მხოლოდ ვაქცინის გამოჩენის შემდეგ იქნება შესაძლებელი.

Goldman Sachs-ის გათვლებით ამერიკის მოსახლეობის 40% კორონავირუსისგან აცრილი უკვე 2021 წლის მარტისთვის იქნება, ხოლო ამით გამოწვეული ეკონომიკური ზრდა მოსალოდნელზე სწრაფი და მასშტაბური იქნება.

მაგრამ ეს ყველაფერი - ხვალ იქნება. დღეს კი პანდემია ამერიკის ეკონომიკას კვლავ უტევს, თუმცა, შედეგები ისეთი მძიმე არაა, როგორც მოსალოდნელი იყო - გაკოტრებების და უმუშევართა რაოდენობის მაჩვენებლები მაინც, ყველაფრის მიუხედავად, 2008-2009 წლის კრიზისთან შედარებით ნაკლებია.

მოსახლეობის მდგომარეობა შესაძლოა უახლოეს თვეებში, დახმარების სხვადასხვა პროგრამების დასრულების შემდეგ დამძიმდეს იმ  პირობებში, როდესაც სტიმულირების ახალი პაკეტი ჯერაც არაა კონგრესის მიერ დამტკიცებული.

ასე რომ, ყველაზე რთული თვეები ამერიკას, განსაკუთრებით კი მის ღარიბ მოსახლოებას, ჯერ კიდევ წინ აქვს.

economist.com