„თევზს ადამიანები პანდემიამდე უფრო ყიდულობდნენ, კრიზისის პერიოდში მოთხოვნა შემცირდა, რადგან ხალხი მაკარონზე და ბურღულეულზეა გადასული, თავის გასატანად ცხოვრობენ, ხოლო ვინც თავის გასატანად ცხოვრობს 15 და 20 ლარიან თევზს ნამდვილად ვერ იყიდის“, - ამის შესახებ  განუცხადა„კომერსანტს“ შპს „ენ პროდუქტის“ გენერალურმა დირექტორმა ნინი გაგნიძემ. კომპანია, რომელიც ძირითადად ტენდერებში მონაწილეობს ახლა ბიზნესის გადარჩენის ეტაპზეა გადასული. ნინო გაგნიძის განმარტებით, თევზზე მოთხოვნა საგრძნობლად შემცირდა, ხოლო ფასები გაიზარდა.

„მოთხოვნა რა თქმა უნდა შემცირებულია, რადგან ხალხს ფული არ აქვს, შეიძლება იაფფასიანი თევზი შეიძინო, თუმცა ძვირადღირებულ თევზს ადამიანები ვეღარ ყიდულობენ. მომწოდებლები გვეუბნებიან რომ კრიზისში არიან, ყველა წუწუნებს, პროდუქტს ნორმალურად ვერ ჰყიდიან. რეალიზაციის პრობლემა ყველას შეექმნა, საუბარი არ არის მხოლოდ ტენდერებზე და თევზზე, ქვეყანაშია ესეთი სიტუაცია, ხალხი უმუშევარია და ფული არ აქვთ. რძის ნაწარმიც და ხორციც გაძვირებულია, ადამიანები ვერც ამ პროდუქტებს ყიდულობენ“, - განმარტავს ნინო გაგნიძე.

ნინო გაგნიძის განმარტებით, კომპანიისთვის პროდუქტის რეალიზაციის მთავარი ადგილი ამ ეტაპზე საბავშო ბაღია, თუმცა მისი განმარტებით მოთხოვნა განახევრებულია, რადგან ბაღები სრული დატვირთვით არ მუშაობენ.

„ბაღში ორაგული შეგვაქვს, ვიცოდი, რომ თევზი 7 ლარი ღირდა, ტენდერი 9 ლარში მოვიგე, ახლა კი თევზის ფასი 9 ლარამდე გაიზარდა. ვისაც ძველი ტენდერები, ძველ ფასებში ჰქონდა მოგებული იმ კომპანიებს კრიზისმა მნიშვნელოვანი დარტყმა მიაყენა. ორაგული იმიტომ, შედის ბაღში, რომ თანხას სახელმწიფო იხდის. ჩვენთვის ესეც პრობლემა გახდა, რადგან საბავშო ბაღები იკეტება, ბევრი ბავშვი აღარ დადის. ადრე თუ იყო  100 კგ. შეკვეთა ახლა განახევრებულია. მოგებაზე აღარ ვმუშაობთ, ნაკისრი პასუხისმგებლობები კი ბოლომდე უნდა მივიყვანოთ. გვიწევს თავის გატანა, რათა შავ სიაში არ მოვხვდეთ, ხელშეკრულება არ გავაფუჭოთ, ჯარიმები არ დაგვაკისრონ და ა.შ.“, - განმარტავს კომპანიის გენერალური დირექტორი.

კიდევ ერთი პრობლემა რომელზეც შპს „ენ პროდუქტში“ საუბრობენ გაუფასურებული ეროვნული ვალუტაა. ნინო გაგნიძის თქმით, გაუფასურებულმა ლარმა კომპანიის ხარჯები კიდევ უფრო გაზარდა, რადგან პროდუქტის შეძენა, ლარის კურსის გამო გაზრდილი ფასით უწევთ.

„ფასი ბოლო 7 თვის განმავლობაში შეიცვალა. იქედან გამომდინარე, რომ თევზი ამერიკიდან შემოდის მიმწოდებლები, შეძენას დოლარში ახორციელებენ, შესაბამისად ჩვენც პროდუქტს დოლარის პროპორციულად, ლარში ვყიდულობთ. გვიწევს გაზრდილი ფასებით შეძენა. არჩევნები, რომ არ ყოფილიყო დარწმუნებული ვარ ლარის კურსი დოლართან მიმართებით 4 ლარი იქნებოდა“, ამბობს ნინო გაგნიძე.

ნინო გაგნიძე აცხადებს, რომ მმართველმა გუნდა იმ საგადასახადო შეღავათებით, რომელიც კორონავირუსით გამოწვეული პანდემიის გამო დააწესა, ბიზნესს გადარჩენის საშუალება მისცა, თუმცა მისივე თქმით, შეღავათები მომავალშიც უნდა გაგრძელდეს, წინააღმდეგ შემთხვევაში ქვეყანაში გარკვეული ბიზნესები მოკვდება.

„ყველაზე კარგი რაც გააკეთეს არის, ის, რომ საშემოსავლო გადასახადი შეამცირეს, ტენდენცია თუ გაგრძელდება და დღგს- გადასახადი შემცირდება და ქვეყანაში სხვადასხვა ბიზნესი არ მოკვდება. ფუნქციონირებას გავაგრძელებთ, უბრალოდ ყველაფერს გააჩნია ადაპტაციის უნარი, ყველა ვერგებით გარემოს, რა მოთხოვნაც იქნება ბაზარზე იმ მოთხოვნას მოვერგებით. თუ გვრჩებოდა 1 000 ლარი დაგვრჩება 500 ლარი, მაგრამ მუშაობას ნელ-ნელა გავაგრძელებთ, რათა არ ჩავიძიროთ და ელემენტარულად არ გავკოტრდეთ. საბავშვო ბაღები რომ დაიკეტოს, სამსახური აღარ მაქვს. ამაზე დამოკიდებული ჩემი ოჯახიც და ძალიან ბევრი ადამიანი ჩემ გარშემო.მგონია, რომ ქვეყანაში ბევრი რამ არჩვენების შემდეგ გადაწყდება, ან დავიღუპებით ან რაღაც გვეშველება“, - აცხადებს ნინო გაგნიძე.

ბაჩო ადამია