ელექტრომობილების მწარმოებელი კომპანია Tesla-ს საბაზრო კაპიტალიზაციამ პირველად 100 მილიარდ დოლარს გადააჭარბა. ამის შესახებ Reuters-ი წერს.

გამოცემის ინფორმაციით, 21 იანვარს Tesla-ს ერთი აქციის ღირებულებამ $555,1 დოლარი შეადგინა, კომპანიის კაპიტალიზაცია კი 110,1 მილიარდ დოლარს მიაღწია. მეორე დღეს აქციის ღირებულება 547,2 დოლარამდე შემცირდა, კაპიტალიზაცია კი 98,6 მილიარდამდე.

Bloomberg-ის ინფორმაციით, აქციების ფასის ზრდა 2019 წლის მესამე კვარტალში კომპანიის ფინანსურმა წარმატებამ და ჩინეთში ქარხნის გახსნას უკავშირდება. თუ Tesla-ს დამფუძნებელი ილონ მასკი კომპანიის კაპიტალიზაციას 100 მილიარდის ნიშნულზე დააბრუნებს და ამ მაჩვენებელს ნახევარი წლის განმავლობაში შეინარჩუნებს, ჯილდოს სახით 346 მილიონ დოლარს მიიღებს.

2018 წელს მასკმა Tesla-ში ფიქსირებულ ხელფასზე უარი თქვა. მას შემდეგ მისი ანაზღაურება კომპანიის ფინანსურ მაჩვენებლებს უკავშირდება. ბოლო 3 თვის განმავლობაში Tesla-ს აქციები სამჯერ გაიზარდა.

2018 წლის აგვისტოში კი მასკმა Twitter-ზე დაწერა, რომ ბირჟაზე Tesla-ს აქციებს 420 დოლარად გამოისყიდის, როცა მათი საბაზრო ღირებულება 350 დოლარს შეადგენდა. აშშ-ის ფასიანი ქაღალდების და ბირჟების კომისიამ დაადგინა, რომ თავისი ტვიტით მასკმა ბირჟის მონაწილეები შეცდომაში შეიყვანა, მასკი 20 მილიონი დოლარით დააჯარიმა და კომპანიის დირექტორთა საბჭოს ხელმძღვანელის პოსტის დატოვება აიძულა, თუმცა მასკმა გენერალური დირექტორის თანამდებობა შეინარჩუნა.

imedinews.ge