Tesla-ს საბაზრო კაპიტალიზაცია 3 იანვარს $145 მლრდ-ით $1.205 ტრლნ-მდე, მისი დამფუძნებლის ილონ მასკი ქონება კი $33 მლრდ-ით $304 მლრდ-მდე გაიზარდა. ნახტომისებური ზრდის მიზეზი კვარტალური ანგარიში გახდა. ოქტომბრიდან დეკემბრის ჩათვლით ტესლამ 309 ათასი ელექტრომობილის გაყიდვა შეძლო, რაც გასული წლის ანალოგიური პერიოდის მაჩვენებელს 71%-ით, 2018 წლის ოთხივე კვარტალის ჯამურ მაჩვენებელს კი 26%-ით აღემატება.

2021 წელს ტესლამ ჯამურად 936 ათასი ელექტრომობილი გაყიდა. მსგავსი სტატისტიკა ტოიოტასთვის საგანგაშო იქნებოდა, ტესლასთვის კი ტრიუმფის მიზეზი გახდა. ის ერთადერთი ტრილიონიანი კომპანიაა არათუ ელექტრომობილებში, არამედ მთლიანად ავტოწარმოებაში. 2016 წელს ტესლამ მხოლოდ 76 ათასი ელექტრომობილის გაყიდვა მოახერხა, 2018 წელს 245 ათასის, 2020 წელს კი 499 ათასის. ბოლო ერთ წელიწადში ტესლას გაყიდვები 87%-ით, ბოლო 5 წელიწადში კი 1130%-ით გაიზარდა.

ტესლა დაახლოებით იგივეს ამბობს ელექტრომობილების წარმოებაში, რასაც 1 საუკუნის წინ ფორდი ამბობდა ავტოწარმოებაში. ელექტრომობილების წილი მსოფლიოს ავტოპარკში 1%-ს ძლივს აღწევს, თუმცა ახალ ავტომობილებში ბევრ ქვეყანაში უკვე ორნიშნა პროცენტული მაჩვენებელი უკავია და ნორვეგიაში ლიდერობს კიდეც. 2030 წლიდან ევროპის ქვეყნების უმეტესობა შიდაწვის ძრავიანი ავტომობილების წარმოებასა და იმპორტის აკრძალვას გეგმავს, 2040 წლიდან კი გზებზე გადაადგილებასაც. ელექტრო ბატარეა ბენზინის ერთადერთი კონკურენტი არ არის, თუმცა დღევანდელი გადმოსახედიდან ელექტრომობილს უფრო მეტი შანსი აქვს ვიდრე წყალბადზე ან სხვა რომელიმე ალტერნატიულ საწვავზე მომუშავე ავტომობილს.

2022 წლის დამდეგისთვის სერიულ გაყიდვებში ტესლა მხოლოდ 4 მოდელით არის წარმოდგენილი: Model S, Model X, Model 3 და Model Y. მათგან ყველაზე პოპულარული Model 3-ა. თუ Model S-ის ფასი $89 000-დან იწყება და $124 000-ზე ადის, Model 3-ის შეძენა $40 000-ადაც შეიძლება. უახლოეს პერიოდში დაგეგმილია პიკაპის, სპორტული ჰიპერქარისა და 40 ტონიანი სატვირთოს დამატებაც.

ელექტრომობილების ბაზარზე ტესლასთან შედარებით ბევრად უფრო იაფი ევროპული და აზიური მოდელებიცაა წარმოდგენილი, თუმცა სიტყვა „ელექტრომობილის“ ხსენებაზე ყველას თუ არა უმრავლესობას მაინც თვალწინ ტესლა წარმოუდგება.

ჯერ კიდევ გასულ წელს ილონ მასკი პირველი ადამიანი გახდა, რომლის ქონებამაც $300 მლრდ-ს გადააჭარბა. მასკი თანამოქალაქე და კოსმოსურ ტურნეში მეტოქე ჯეფ ბეზოსს $108 მლრდ-ით უსწრებს. Tesla-სა და SpaceX-ის მოსალოდნელი შემდგომი წარმატებების ფონზე პლანეტის პირველ ტრილიონერად ქცევის შანსი სწორედ მასკს აქვს.