ცნობილი და მდიდარი ადამიანების დიეტები, ზოგადად, სახალისო თემაა, თუმცა სილიკონის ველში მილიარდერებს ის სულ სხვადონეზე აჰყავთ.
Amazon-ის დამაარსებელმა და სადღეისოდ ყველაზე მდიდარმა ადამიანმა მსოფლიოში, ჯეფ ბეზოსმა, აღიარა, რომ ახალგაზრდობაში ის ჯანმრთელი რაციონით არ გამოირჩეოდა და 90-იან წლებში ყოველი მისი დილა ერთი ქილა ორცხობილით იწყებოდა.
„როდესაც დავოჯახდი, დილაობით მთელ ქილა Pillsbury-ის ვცლიდი, თანაც, კარაქით და, თქვენ წარმოიდგინეთ, მაინც დაფასავით გამხდარი ვიყავი. ჩემი მეუღლე ამას ყოველ დილას უყურებდა და, ბოლოს მითხრა - „რას აკეთებ? იცი მაინც ამას რაშემცველობა აქვს?“... და ეს ყველაფერი არაა. 2010 წელს, ერთ-ერთი ტექნოლოგიური ბიზნესის შეძენის შემდეგ, ბეზოსმა შეუკვეთა კერძი, რომელშიც შედიოდა: ხმელთაშუა ზღვის კალმახი, ნივრის იოგურტი და კვერცხი, - წარმოუდგენელი ნაზავი..
ჯეფ ბეზოსი ცნობილია იმითაც, რომ 2018 წელს მილიარდერთა კლუბში ვახშამზე შემწვარი იგუანა მიირთვა... წლები გავიდა და მეუღლემ მაკენზიმ ჯეფი ამ უცნაურ მიდრეკილებებს თითქოს გადააჩვია. მან ორგანული კვების სუპერმარკეტი WholeFoods შეიძინა და ბეზოსის მენიუში ტოსტები ავოკადოთი შეიცვალა, თუმცა, მოგვიანებით, მათი ხმაურიანი განშორების შემდეგ, ის ძველ ჩვევებს დაუბრუნდა და ლოს-ანჯელესში, თავის სახლში, რბილი ნაყინის აპარატიც დაამონტაჟა.
Facebook-ის დამაარსებელს მარკ ცუკერბერგს უცნაური ახირება დასჩემდა 2011 წლიდან., - მან გადაწყვიტა, რომ შეჭამს მხოლოდ იმ ცხოველების ხორცს, რომლებსაც თვითონვე დაკლავს. ერთხელ მან სახლში Twitter-ის დამაარსებელი ჯეკ დორსი დაპატიჟა, რომელიც ჰყვება, რომ მარკი მას საკუთარი ხელით, ლაზერული პისტოლეტით დაკლული და, ამავე დროს, რატომღაც, თხის ცივი ხორცით გაუმასპინძლდა.
„თხის ხორცი ღუმელში იყო და ნახევარი საათი ველოდებოდით მის დამზადებას. ბოლოს და ბოლოს მარკმა ხორცი მაგიდაზე დადო, თუმცა ის ცივი აღმოჩნდა. ეს დაუვიწყარი იყო. იმ საღამოს მე სალათით შემოვიფარგლე,“ - იხსენებს დორსი.
პერიოდი, როდესაც Facebook-ის დამაარსებელი თხებს კლავდა, ალბათ, წარსულს ჩაბარდა, რადგანაც მას დღეს შინაური თხა, სახელად ბიტკოინი, ჰყავს, თუმცა, მისი კვების რეჟიმი ექსტრავაგანტური რჩება. ცუკერბერგმა აღიარა, რომ ზოგჯერ იმდენად გატაცებულია საქმით, რომ ჭამა ავიწყდება, რის გამოც, მისივე თქმით, მან 10 ფუნტით დაიკლო.
უცნაური და საეჭვო დღის განრიგით გამოირჩევა Tesla-ს და SpaceX-ის გენერალური დირექტორი ილონ მასკიც. მისი დღე 5-წუთიან ბლოკებადაა დაყოფილი, ის არ პასუხებს სატელეფონო ზარების დიდ ნაწილს და დღე-ღამეში მაქსიმუმ 6 საათი სძინავს. ერთ-ერთ ინტერვიუში მასკმა აღიარა რომ მეტწილად სადილობს დღეში 5 წუთი, ძირითადად, საქმიანი შეხვედრების დროს.
„რომ მქონდეს საშუალება ნაკლები ვჭამო და მეტი ვიმუშაო, ჭამაზე დროს საერთოდ არ დავკარგავდი,“ - თქვა მან ერთ-ერთ ინტერვიუში.
კანადაში უნივერსიტეტში სწავლის დროს, მასკი ჭამაზე დღეში 1 დოლარს გამოყოფდა. მის მენიუში ძირითადად ჰოთ-დოგები, ფორთოხალი, მწვანე წიწაკა და პასტა შედიოდა.
„არასდროს არავის მოუწოდებ იცხოვრონ დღეში 1 დოლარზე. ეს მაინც და მაინც სასიამოვნო არაა,“ - განაცხადა მან.
ასაკთან ერთად, როგორც ჩანს, მასკში კარგი საჭმლისადმი სიყვარული იღვიძებს.
„არჩევანი რომ მქონდეს, მირჩევნია ნაკლები ვიცხოვრო, მაგრამ გემრიელად ვჭამო და, შესაძლებელი რომ იყოს, საერთოდ არ დავკავდებოდი სპორტით,“ - აღიარა ტექნო-მილიარდერმა.
ავტორი: თენგიზ აბლოთია.
წყარო: daily star