ტექდათვალიერება საბურავებს, ავტონაწილებსა და მომსახურებას გააძვირებს

ტექდათვალიერება საბურავებს, ავტონაწილებსა და მომსახურებას გააძვირებს

access_time2017-10-07 16:00:00

ავტომობილების ტექდათვალიერების ვალდებულება სათადარიგო ნაწილებისა და საბურავების გაძვირებას გამოიწვევს. 


პარალელურად მოიმატებს ავტოხელოსნების მომსახურების საფასურიც. როგორც გაზეთი „რეზონანსი წერს, იმპორტიორები ვარაუდობენ, რომ მანქანის მოწყობილობის რამდენიმე დეტალის ფასი ნამდვილად აიწევს, განსაკუთრებით ეს ეხება ისეთ ნაწილს, რომელზეც ბოლო დრომდე ყველაზე ნაკლები მოთხოვნა იყო. დეფიციტი მოსალოდნელი არ იქნება, მაგრამ ფასები შეიცვლება.



ტექდათვალიერება არ არის ერთადერთი საკითხი, რაც ავტონაწილებისა და მომსახურების ფასზე იმოქმედებს. ლარის გაუფასურებისა და იმ ტენდენციის გამო, რომელიც დღესდღეობით სავალუტო ბაზარზეა, გაძვირება ისედაც გარდაუვალია.



მიუხედავად ამისა, ავტოსათადარიგო ნაწილების ბიზნესის წარმომადგენლები ფიქრობენ, რომ ფასთა ცვლილება ყველა მარაგნაწილს არ შეეხება.



კომპანია ავტობანის დამფუძნებელი ბაკურ ხუნდაძე ვარაუდობს, რომ ავტომობილისთვის აუცილებელ სათადარიგო დეტალებს მასშტაბურად არავინ გააძვირებს, მაგრამ არ არის გამორიცხული, მოვაჭრეების ნაწილმა სიტუაციით მართლაც ისარგებლოს.



ეს ბიზნესია და ყველაფერი ისე არ ხდება, როგორც ვგეგმავთ. ყოველთვის შეიძლება სიტუაციის შეცვლა, განსაკუთრებით - როცა საქმე ფასს ეხება. ტექდათვალიერების ამოქმედებასთან დაკავშირებით, არ გამოვრიცხავ, ზოგიერთმა იმპორტიორმა სიტუაცია სათავისოდ გამოიყენოს და პროდუქცია გააძვიროს. ალბათ, ფასს მოუმატებენ ისეთ ნაწილებს, რომლებიც დღესდღეობით ძნელად იშოვება.



ჩემი აზრით, კატალიზატორებზე გაიზრდება მოთხოვნა. იგი ერთ-ერთი ძვირი დეტალია მანქანებში. რა თქმა უნდა, ყველა შეეცდება, რომ ჩამოიტანოს, მაგრამ გარკვეული პრობლემა მაინც მოსალოდნელია. ავტობაზარი საქართველოში ერთ-ერთი ყველაზე კონკურენტუნარიანია. ვერავინ დააბრალებს რომელიმე კომპანიას მონოპოლიურ საქმიანობას, ასეთი ფაქტი არ გვაქვს. ძალიან დიდი კონკურენციაა, მეწარმეები დაბალი მარჟით მუშაობენ და ბიზნესი აბსოლუტურად თავისუფალია. ბაზარი თავად დაარეგულირებს ფასს. თუ ვინმე გაძვირებას შეეცდება, ეს იქნება მოკლევადიანი ეფექტი და ძალიან მალე მოგვარდება სიტუაცია, - აცხადებს რეზონანსთან ხუნდაძე.



ცალკე თემაა მეორეული საბურავები, რომელთა რეალიზაციას ტექდათვალიერების პროცესი ხელს შეუშლის. იმპორტიორები ფიქრობენ, რომ ამ ბიზნესს ქვეყანაში ძალიან გაუჭირდება.




საბურავების ბიზნესის მიმართ სახელმწიფო ჯერ კიდევ არ არის ბოლომდე გარკვეული, ტექდათვალიერების პროცესში სრულიად ახალ საბურავებს მოითხოვენ, თუ კარგი ხარისხის მეორეული პროდუქციაც იქნება დაშვებული. ასეა თუ ისე, ჯერ უნდა გაიწოვოს ქვეყანაში უკვე იმპორტირებული საბურავები და მერე დაწესდეს აკრძალვა, თუ ეს აუცილებელი გახდა.



უამრავი ადამიანია ამ ბიზნესში და რეალურად ძალიან გაუჭირდებათ. მაშინ, ჯერ უნდა აეკრძალათ მეორეული საბურავების შემოტანა და მერე შემოეღოთ სტანდარტი. ყველაფერს თავისი ეტაპი აქვს.



კანონმდებლების მიმართ ნამდვილად გვიჩნდება უნდობლობა, როცა ტრანსპორტის სფეროს რეგულაციებს შეეხება საქმე. ამ შემთხვევაში კონკრეტულად საბურავების ბიზნესზეა საუბარი, - ამბობს ბაკურ ხუნდაძე.



ავტონაწილების მასობრივ გაძვირებას გამორიცხავს, მაგრამ გამონაკლის შემთხვევებში საფასო ცვლილებას ელოდება იმპორტიორი ელგუჯა ჯამაგიძეც. მისი აზრით, მსხვილი ბიზნესი არსებულ გამოწვევას გაცილებით უპრობლემოდ გაართმევს თავს.



ტექდათვალიერებისთვის საჭირო ავტონაწილები ბაზარზე ისედაც შემოტანილია. ბიზნესმა ამაზე უკვე იზრუნა, მაგრამ გააჩნია, ნაწილების დამატება რა კატეგორიის მანქანებზე გახდება საჭირო. არა მგონია, მასობრივი გაძვირება მივიღოთ, მაგრამ მოთხოვნა აშკარად მოიმატებს. მართალია, მანქანის ზოგიერთი დეტალი შეიძლება, გაძვირდეს, მაგრამ დეფიციტს არ ველოდები. კეთილსინდისიერი ბიზნესმენი ამ სიტუაციით არ ისარგებლებს. ეს ტენდენცია ბაზრობებზე უფრო მოსალოდნელია.



ბევრი მანქანა დადის დღეს კატალიზატორის გარეშე. ამ დეტალზე აშკარად გაჩნდება მოთხოვნა და შეიძლება, დეფიციტიც შეიქმნას. ასეთ შემთხვევაში ფასიც მოიმატებს. ეს ერთადერთი ნაწილია, რომელზეც 100%-ით შემიძლია თქმა, რომ გაძვირდება, - ამბობს ჯამაგიძე.



სპეციალისტები აქცენტს ავტონაწილების ხარისხზე აკეთებენ. ეკო ტრანსპორტ ცენტრის აღმასრულებელ დირექტორ ვასო ურუშაძის ინფორმაციით, საქართველოში შემოდის საერთაშორისო და ევროსტანდარტების აკრედიტაციის გარეშე დამზადებული სატრანსპორტო საშუალებების არალიცენზირებული ნაწილები, რომლებიც ბაზარზე ხელმისაწვდომიცაა და იაფიც.



უხარისხო ნაწილების იმპორტიორ ქვეყნად მხოლოდ ჩინეთი არ უნდა მივიჩნიოთ, სხვა ქვეყნებიც არ აკლებენ. საქართველოში მსგავს იმპორტს არავინ აკონტროლებს. ამიტომ დაბალი ხარისხის ავტონაწილების წარმოება და იმპორტზე გატანა ყველა ქვეყანაში შესაძლებელია, - ამბობს ურუშაძე და დასძენს, რომ საქართველოში არავინ ამოწმებს იმპორტირებული პროდუქციის ბრენდის ნამდვილობას, გვხვდება წარწერები, რომლებიც თითქოს ევროპულ, იაპონურ ბრენდს მიეკუთვნება, სინამდვილეში, ის არის ე.წ. პატენტი, რომელსაც არანაირი კავშირი არ აქვს იმ ბრენდთან, რომლის მარკირებაც მასზეა დატანილი.


მძღოლებმა ერთ კონკრეტულ მარკას უნდა მიანიჭონ უპირატესობა და იმ ბრენდის ტექნიკური აგრეგატები გამოიყენონ, იქნება ეს მეორეული თუ ახალი სათადარიგო ნაწილები. რა თქმა უნდა, ახალი დეტალების გამოყენება კარგია, მაგრამ ძნელია, ყველას ვურჩიოთ მათი შეძენა.



ბევრად მნიშვნელოვანია, ხარისხზე გააკეთონ აქცენტი და გაითვალისწინონ ის ფაქტი, რომ ავტომობილების ნაწილების მწყობრიდან გამოსვლამ არ მოახდინოს გავლენა მოძრაობის უსაფრთხოებაზე და ადამიანების ჯანმრთელობა რისკის ქვეშ არ დააყენოს, - განუცხადა რეზონანსს ურუშაძემ.

 



BAG ინდექსი: დასაქმების ბარომეტრი გაუმჯობესდა, თუმცა კვლავ ნეგატიურია

BAG ინდექსი: დასაქმების ბარომეტრი გაუმჯობესდა, თუმცა კვლავ ნეგატიურია
access_time2020-08-04 11:30:28
BAG ინდექსის ყოველკვარტალური კვლევის ფარგლებში საქართველოს ბიზნეს ასოციაციის გამოკითხული წევრების მოლოდინი დასაქმებასთან დაკავშირებით მნიშვნელოვნად არის გაუმჯობესებული. BAG-ის დასაქმების ბარომეტრი, რომელიც მომდევნო სამი თვის განმავლობაში ასოციაციის წევრების მიერ დასაქმების სავარაუდო ცვლილებას ასახავს, 2020 წლის მეორე კვარტლის ბოლოს ჩატარებული კვლევის საფუძველზე, კვლავ უარყოფითია. თუმცა, აღნიშნული მაჩვენებელი პირველ კვარტალთან შედარებით მნიშვნელოვნად გაუმჯობესდა და -2.8 ქულა შეადგინა....

საპენსიო აქტივებს 68 მლნ-ის სარგებელი დაერიცხა

საპენსიო აქტივებს 68 მლნ-ის სარგებელი დაერიცხა
access_time2020-08-04 12:10:05
საპენსიო აქტივებმა 890 მილიონი ლარი შეადგინა, საიდანაც 1.7% ვადიან დეპოზიტებზე, 25.2% სარგებლიან ანგარიშებზე, ხოლო 73.1% სადეპოზიტო სერტიფიკატებშია ინვესტირებული. ინფორმაციას საპენსიო სააგენტო ავრცელებს. ამჟამად, საპენსიო აქტივების 100% ლარშია დენომინირებული. საპენსიო აქტივებზე დარიცხული წლიური ეფექტური სარგებელი 11.4%-ია, რაც ორჯერ მეტია, ვიდრე ქვეყანაში არსებული წლიური ინფლაცია (ივლისის მდგომარეობით 5.7%). საპენსიო აქტივებზე დარიცხული სარგებელი 68 მილიონ ლარს...

თბილისის ახალი სატრანსპორტო მასტერ-პლანი - პრიორიტეტი ფეხით მოსიარულე და საზოგადოებრივი ტრანსპორტია - თედო ისაკაძე

თბილისის ახალი სატრანსპორტო მასტერ-პლანი - პრიორიტეტი ფეხით მოსიარულე და საზოგადოებრივი ტრანსპორტია - თედო ისაკაძე
access_time2020-08-04 11:10:59
თბილისის საკრებულოს სატრანსპორტო საკითხთა კომისიის თავმჯდომარე თედო ისაკაძე სოციალურ ქსელში ჭავჭავაძის გამზირის ახალი სატრანსპორტო სქემის შესახებ პოსტს აქვეყნებს, რომელსაც კომერსანტი უცვლელად გთავაზობთ: „კამათს არ ექვემდებარება, რომ ნებისმიერი მოქალაქის შეუვალი უფლებაა გამოთქვას აზრი, მათ შორის კრიტიკული, ნებისმიერ საკითხზე, მითუფრო თემაზე, რომელიც მის ყოველდღიურ ცხოვრებას ეხება, თუმცა... დავიწყოთ იმით, რომ თბილისის ახალი...

მარტივი, უსაფრთხო და მოქნილი Apple Pay ციფრული საფულე პროკრედიტ ბანკის მომხმარებლებისთვის!

მარტივი, უსაფრთხო და მოქნილი Apple Pay ციფრული საფულე პროკრედიტ ბანკის მომხმარებლებისთვის!
access_time2020-08-04 09:25:35
დღეიდან, პროკრედიტ ბანკი მოხმარებელს გადახდის თანამედროვე, მარტივ და დაცულ მეთოდს - Apple Pay ციფრულ საფულეს სთავაზობს.სერვისით სარგებლობა ბანკის მასტერქარდ ბარათის მფლობელებს iPhone-ის, Apple Watch-ის, iPad-ის და Mac-ის გამოყენებით შეუძლიათ. შესყიდვა ყველა იმ ობიექტში სრულდება, რომელსაც უკონტაქტო გადახდის მხარდაჭერა აქვთ, ამასთანავე აპლიკაციებსა და ინტერნეტ ვებ-გვერდებზე.უსაფრთხოება სიმარტივესთან ერთად Apple Pay-ის მთავარი...

TheTimes: ბიზნესმა ჰაკერებს გამოსასყიდის სახით 2019 წელს 25 მლრდ. დოლარი გადაუხადა

TheTimes: ბიზნესმა ჰაკერებს გამოსასყიდის სახით 2019 წელს 25 მლრდ. დოლარი გადაუხადა
access_time2020-08-03 19:55:48
კიბერ-დამნაშავეებმა 2019 წელს მხოლოდ ბრიტანულ ბიზნეს-კომპანიებს 250 მლნ. დოლარზე მეტი გამოსძალეს. ჰაკერები, ძირითადად  ცნობილ კომპანიებს რუსეთიდან ან აღმოსავლეთ ევროპიდან ვირუსული პროგრამებით უტევენ, შემდეგ კი ქსელებთან წვდომის აღდგენის სანაცვლოდ მათგან მილიონებს ითხოვენ. კომპანიებს მათი პრობლემების გასაჯაროება, მონაცემთა დაკარგვა და რეგულატორების მხრიდან ჯარიმების დაკისრება აშინებთ, ამიტომაც ისინი დღეს უფრო მეტად, ვიდრე გასულ წლებში, ფულის გადახდისთვის მზად...


მსგავსი სიახლეები

up