ამ დროისთვის ინფექციურ საავადამყოფოში სულ წევს 46 ავადმყოფი, მათგან 30 კორონავირისით დაინფიცირებულია, ამის გარდა 7 ადამიანი ქვეყნის სხვადასხვა კლინიკაშია მოთავსებული- ამის შესახებ ინფექციური საავადმყოფოს დირექტორმა ჟურნალისტებთან საუბრისას განაცხადა.

თენგიზ ცერცვაძის თქმით, ამ დროისთვის ვითარება არ შეცვლილა და ინფიცირებულთა რაოდენობა კვლავ 38-ია.

პაციენტებზე საუბრისას, მან აღნიშნა, რომ 2 პაციენტის მდგომარეობა მძიმეა, რამდენიმე ავადმყოფის კი პრობლემური.

„პნევმონია აქვს სულ 11 პაციენტს. ველოდებით 12 ადამიანის ანალიზის პასუხს. რაც შეეხება არასრულწლოვნებს, მათი მდგომარეობა კარგი არა, მაგრამ მსუბუქი და დამაკმაყოფილებელია"- განაცხადა თენგიზ ცერცვაძემ.

ვირუსის მეოთხეულ გავრცელებაზე დასმული კითხვის საპასუხოდ, თენგიზ ცერცვაძემ აღნიშნა, რომ ამ თემაზე ექსპერტების შეფასება გაიყო.

„ჩემი პირადი მოსაზრებაა და რამდენადაც ვიცი, ექსპერტების უმეტესობის, რომ ეს არ იყო მეოთხეული გავრცელება, რამდენადაც ის პაციენტი ძალიან დამაჯერებლად არა, მაგრამ მაინც ამბობდა, ვისგან დაინფიცირდა. ამიტომ ეს არ არის მეოთხეული გავრცელება ან თუ არის, ეს არის ერთადერთი შემთხვევა“- განაცხადა ცერცვაძემ.

საქართველოში კორონავირუსი 38 ადამიანს დაუდასტურდა, მათგან ერთი ინფექციური კლინიკიდან უკვე გაეწერა. ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

imedinews.ge