ინფქციური საავადმყოფოს ხელმძღვანელი დაუმორჩილებლობის აქციის საჭიროებას ვერ ხედავს, რადგან მიიჩნევს, რომ ისედაც მინიმალური შეზღუდვაა ქვეყანაში დარჩენილი, კომენდანტის საათის სახით, დღეს კი საქართველო ერთ-ერთი ყველაზე ნაკლები შეზღუდვების მქონე ქვეყანაა ევროპასა და ამერიკაში. ამის შესახებ თენგიზ ცერცვაძემ ჟურნალისტებს განუცხადა.

თენგიზ ცერცვაძის განცხადებით, კომენდანტის საათიც ყოველგვარი დოლ-გარმონის გარეშე მოიხსნება.

„მაგალითად, საფრანგეთში კომენდანტის საათი 18:00 საათიდან იწყება, ინგლისში, გერმანიაში, სხვაგან მოქალაქეს უფლება არ აქვს, საშვის გარეშე გამოვიდეს ბინიდან. ამიტომ, რომის პაპზე მეტი კათოლიკები ნუ ვიქნებით და ნუ მოვინდომებთ იმაზე მეტს, რასაც ეპიდსიტუაცია ამ ეტაპზე იძლევა. დღეს გვაქვს საშუალება, შევირგოთ ის შეზღუდვების მოხსნა, რომელიც გატარდა და პირველ რიგში, ძალიან დიდი საქმე იყო, რომ ტრანსპორტი ამოქმედდა.

შემდეგ იგეგმება საკლასო ოთახებში სწავლის განახლება, რესტორნების გახსნა და ფაქტობრივად რჩება „კომენდანტის საათი“. რახან, ჩვენ ეს მოვახერხეთ, ეს იოლი არ ყოფილა. იმის მაგივრად, რომ ეს მონაპოვარი გავამყაროთ და ერთმანეთს დავუდგეთ გვერდით, პირბადეების ტარებით, სოციალური დისტანცირებით და სხვა, რა მოხდა - ძალიან ცუდი რამ. იყო საპროტესტო აქცია კომენდანტის საათის გაუქმების მოთხოვნით. ეს მიმაჩნია პოპულისტურ, გაუმართლებელ, პროვოკაციულ ნაბიჯად და რატომ. ღრმად ვარ დარწმუნებული, რომ ის კატეგორია, რომელიც დაუმორჩილებლობის ფორმით აპროტესტებდა კომენდანტის საათს, სხვა არაფერი დარჩათ გასაპროტესტებელი. ქვეყანა შესანიშნავად მართავს კოვიდსიტუაციას, საათივით აწყობილად მუშაობს კლინიკური სექტორი, მაქსიმალურად მოიხსნა შეზღუდვები - იმის მაგივრად, რომ ამას მადლიერება და გვერდით დგომის სურვილი გამოეწვია, ზოგიერთში გამწარების და გაბოროტების სურვილი გამოიწვია - რომ თუ ყველაფერი კარგად არის, ისინი ფუნქციას კარგავენ, ეს აშკარად იკითებოდა, რაც ძალიან სამწუხაროა“, - აცხადებს თენგიზ ცერცვაძე.

მისივე თქმით, აქციის მონაწილეთა მიზანი, როგორც ჩანს, ეპიდსიტუაციის გამწვავება იყო ახალი შემთხვევების მატებისგენ, რომ ეს შემდეგ მთავრობისთვის დაებრალებინათ.

თენგიზ ცერცვაძის თქმით, დაუმორჩილებლობის აქციის მონაწილეებს ქვეყანაში პანდემიის დასრულება არ აინტერესებთ და პირიქით, აღიზიანებთ, რომ პანდემია დაძლევისკენ მიდის.

„როგორც ცეცხლთან, ისე არ შეიძლება პანდემიასთან თამაში, ვიწრო პარტიული ამბიციების გავლენების ქვეშ. აქ ყველა უნდა ვიყოთ პრინციპული, თანმიმდევრულ და უნდა ვაკეთოთ ის, რისი კეთებაც საჭიროა“, - აღნიშნა თენგიზ ცერცვაძემ.

საქართველოში კორონავირუსი დღეს კიდევ 204 ადამიანს დაუდასტურდა, 736 კი გამოჯანმრთელდა.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

imedinews.ge