ერთ-ერთი უმნიშვნელოვანესი ღონისძიებაა მასობრივი ტესტირება, რომელიც მეოთხეული გადაცემის პირობებში არის ერთ-ერთი ყველაზე ეფექტური საშუალება ეპიდემიის მასშტაბების შეზღუდვისთვის, - ამის შესახებ ინფექციური საავადმყოფოს დირექტორმა „საზოგადოებრივი მაუწყებლის“ ეთერში განაცხადა.
თენგიზ ცერცვაძის განცხადებით, აქამდე ტესტირება მხოლოდ ლუგარის ცენტრში ხდებოდა და შემდეგ მას დაემატა კიდევ რამდენიმე დაწესებულება.
„ამ სპეციალიზებული დაწესებულებების შესაძლებლობები იყო შეზღუდული და იკვლევდნენ, მხოლოდ იმ პირებს, ვისაც აღენიშნებოდა სიმპტომები და ბოლო 14 დღის მანძილზე იმოგზაურეს მაღალი რისკის ქვეყნებში, ან კონტაქტი ჰქონდათ იქიდან ჩამოსულ პირებთან. მაგრამ ახლა დადგა დრო, როდესაც იმდენი პიროვნება იქნება გამოსაკვლევი, რომ თუნდაც 5 ან 10 დაწესებულება ამას ვერ აუვა. ეს მასობრივი ტესტირება, რომ ძალიან ბევრ ლაბორატორიას, მათ შორის კერძოებს, მიეცემათ ტესტირების შესაძლებლობა, თან გამარტივებული მეთოდებით“ - განაცხადა თენგიზ ცერცვაძემ.
მისი თქმით, სწრაფი და გაფართოებული ტესტირების დროს, გამოყენებული იქნება სწრაფი, მარტივი ტესტები, რაც საშუალებას მოგვცემს, ვისაც აქვს რაღაც სიმპტომი ყველამ ჩაიტაროს გამოკვლევები.
„შეიძლება ავად გახდეს პიროვნება, რომელმაც არ იცის, ვისთან იყო კონტაქტში და ასეთ პიროვნებებს რომ შეუზღუდავად ექნებათ ტესტირების შესაძლებლობა, ეს ნიშნავს იმას, რომ ასევე შეუზღუდავად იქნება გამოვლენილი ყველა პაციენტი და არა მარტო ის, ვინც რისკის ჯგუფს განეკუთნება. ყველა მათგანი მოთავსდება სტაციონარში, ან მათი ნაწილი გაივლის ბინაზე მკურნალობას, ეს შეზღუდავს ეპიდემიის გავრცელების მასშტაბებს“ - განაცხადა თენგიზ ცერცვაძემ.
საქართველოში კორონავირუსი 38 ადამიანს დაუდასტურდა, მათგან ერთი ინფექციური კლინიკიდან უკვე გაეწერა. ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.
imedinews.ge