„ტენდერებში მონაწილეობას აზრი აღარ აქვს, სახელმწიფოს შარშანდელი ფასები აქვს დაფიქსირებული“ - ამის შესახებ „კომერსანტს“ კომპანია „კლინტექ“-ის დამფუძნებელმა და გენერალურმა დირექტორმა ლადო ჭელიძემ განუცხადა. პროფესიონალური სარეცხი და პერსონალის ჰიგიენის საშუალებების უმსხვილეს მწარმობელ - დისტრიბუტორ კომპანიაში განმარტავენ, რომ სახელმწიფო ტენდერებში, სადაც მათი თქმით, მოგების დაბალი მარჟაა, „კლინტექ“-ი არ მონაწილეობს, რადგან ლარის რეკორდულად გაუფასურების ფონზე სახელმწიფო შესყიდვებში მონაწილეობის მიღება კომპანიისთვის წამგებიანია.
„ზოგადად ჩვენი კომპანია B2B მიმართულებით ვმუშაობთ, ვემსახურებით სასტუმროებს, რესტორნებს, მოლებს, ტენდერებში ვიღებთ მონაწილეობას. თუმცა აღსანიშნავია, რომ სახელმწიფოს ტენდერებში, უწყებებს შარშანდელი ფასები აქვთ დაფიქსირებული. ფაქტობრივად სახელმწიფო შესყიდვებში მონაწილეობას ვეღარ ვღებულობთ, რადგან შარშანდელთან შედარებით ლარი დაახლოებით 18 % არის გაუფასურებული. სახელმწიფო ტენდერებში მოგების ისედაც დაბალი მარჟაა, აქედან გამომდინარე, კომპანია ზარალზე გავა. 2020 წელს ისე გამოვიდა, რომ ჩვენი კომპანია სახელმწიფო ტენდერებში ვეღარ ვმონაწილეობთ, თუ არ ჩავთვლით იმ გამონაკლისებს, სადაც ადგილბრივი წარმოების პროდუქციით შეგვიძლია მონაწილეობა მივიღოთ“, - განაცხადა ლადო ჭელიძემ.
კიდევ ერთი საკითხი, რომელზეც „კლინტექ“-ის დამფუძნებელი და გენერალურმა დირექტორი ლადო ჭელიძე ამახვილებს ყურადღებას კორონავირუსით დაზარალებული სტუმართ-მასპინძლობის სექტორია, რომელსაც ქვეყანაში შექმნილი ეპიდემიოლოგიური სიტუაციის გამო დისტრიბუტორების დავალიანება დაუგროვდა.
„ჰორეკას კუთხით ბრუნვა 80% გაჩერდა, რაღაც რაოდენობით დავალიანება დარჩათ, მაგრამ ვეცადეთ, რომ თანხა მაქსიმალურად ამოგვეღო. თუმცა აღსანიშნავია ის ფაქტი, რომ სეტქორს დავალიანება ჰქონდათ თებერვალ- მარტში, როცა ლარის კურსი დოლართან მიმართებით 2,9 ლარი იყო, თანხა კი ახლახანს ჩაგვირცხეს, როცა ეროვნული ვალუტის კურსი 3,2 - ლარია. როდესაც დიდ თანხას ეხება საქმე კომპანიისთვის უკვე ესეც ზარალია. „კლინტექ“-ის ბრუნვასთან შედარებით, კლიენტებს ჩვენ შემთხვევაში დიდი დავალიანებები არასდროს ჰქონიათ, ეს თანხა დაახლოებით 150 000 ლარია“, - აცხადებს ლადო ჭელიძე.
ბაჩო ადამია