თავისუფლების მოედანზე სასტუმრო „მონოგრაფი“, რომელიც პანდემიის გავრცელებამდე, თებერვლის დასაწყისში გაიხსნა და მხოლოდ ერთი თვე შეძლო ბაზარზე ოპერირება, კვლავ ფუნქციონირებს. როგორც სასტუმროს საზოგადოებასთან ურთიერთობის სამსახურში განმარტავენ, ვიზიტორების აქტიურობა ბოლო რამდენიმე დღის მანძილზე თვალშისაცემია. მიუხედავად ამისა, თათული ღვინიაშვილი განმარტავს, რომ ახლად გახსნილი სასტუმროსთვის სამი თვით დაკეტვა ძალიან მძიმე აღმოჩნდა.
„ჩვენი ლოკაცია, თავისუფლების მოედანი ფაქტობრივად ქალაქის ათვლის წერტილია. თებერვალში საკმაოდ ძლიერი სტარტი ავიღეთ და ერთ თვეში მოგვიწია სასტუმროს დაკეტვა, შესაბამისად, ბაზარზე ოპერირება ცოტა ხანს შევძელით. ძალიან დიდი დარტყმა იყო ჩვენთვის სასტუმროს დახურვა პანდემიის გამო. ეს იყო მძიმე სამი თვე, რადგან დიდი რესურსი ჩაიდო სასტუმროს ამუშავებაში. შემდეგ დავიწყეთ Covid 19-თან ადაპტირებაზე ფიქრი და გამოიკვეთა მიმართულებები, რა კუთხითაც უნდა გვემუშავა. მალევე სახელმწიფომ გაავრცელა კონკრეტული სამუშაო გეგმა სასტუმროს ბიზნესისთვის. აღვნიშნავ, რომ ჩვენთან ჯანდაცვის მსოფლიო ორგანიზაციის მიერ გამოქვეყნებული ყველა რეკომენდაცია დაცულია. მიუხედავად ყველაფრისა, დისტანციურად ვმუშაობდით, რომ წამოწყებული საქმეები არ შეგვეჩერებინა და ვისახავდით სამომავლო გეგმებს. ვეცადეთ, რომ თანამშრომლების მაქსიმალური რაოდენობა შეგვენარჩუნებინა.
8 ივნისს გაიხსნა რესტორნები და უნდა აღინიშნოს, რომ გახსნიდან ყოველი დღე გვაქვს დატვირთული. რაც შეეხება უცხოელ ვიზიტორებს, ველოდებით საზღვრების გახსნას. თუმცა, ადგილობრივი ტურიზმის სტიმულირებისთვის მოსახლეობას სხვადასხვა შეთავაზებებს გავუკეთებთ,“ - აცხადებს თათული ღვინიაშვილი.
ამჟამად, სასტუმროს მენეჯმენტში ჩართულია შვეიცარული საკონსულტაციო კომპანია „დევპორტი“ და მისი წარმომადგენელი მანუელ ლოხერი. „მონოგრაფის“ გუნდი სწორედ კომპანიასთან ერთად მუშაობს მიმდინარე და სამომავლო პროექტებზე.
რაც შეეხება სამომავლო გეგმებს, კონკრეტული პროექტების შესახებ თათული ღვინიაშვილი ინფორმაციას არ ასაჯაროვებს, თუმცა აღნიშნავს, რომ სიახლები მოსალოდნელია და ეტაპობრივად გახდება ცნობილი.
„ძალიან ამბიციური გეგმები გვაქვს და გახსნის დღიდან ვმუშაობთ ამ საკითხზე . გვქონდა შეხვედრები დისტანციურად და მომავალშიც გავაგრძელებბთ. ჯერ არ გავავრცელებთ ინფორმაციას რა პროცესები მიმდინარეობს, თუმცა ნელნელა ყველაფერს გავაჟღერებთ,“-აღნიშნა ღვინიაშვილმა.
Monograph-ი თავისუფლების მოედანზე ბუტიკური „ლაქშერის“ ტიპის სასტუმროა, სადაც ერთიანდება 36 ნომერი, ტერასა, რესტორანი „სომინი“. ეს არის პირველი სასტუმრო საქართველოში, რომელიც კლასიკური ლაქშერის მინიმალისტურ მიმართულებას სთავაზობს მომხმარებელს.
სასტუმროს ფასადი კულტურული მემკვიდრეობის ძეგლს წარმოადგენს, რის გამოც სარესტავრაციო სამუშაოების დასრულება გაჭიანურდა. როგორც ცნობილია, სასტუმროში 100-ამდე ადამიანია დასაქმებული.
გასულ წელს პროექტის განმახორციელებელი კომპანია Well house-ი განმარტავდა, რომ საერთაშორისო ბრენდის შემოყვანა სასტუმროში არ იგეგმება და „მონოგრაფი“ ქართულ ბრენდად ჩამოყალიბდა. მათივე ინფორმაციით, ინვესტიციის ოდენობა 20 მილიონი დოლარი იყო.
მარიამ მორგოშია