ყაზბეგის ქუჩაზე ყავის ლაბორატორია Coffe Lab-ი, 2016 წელს გიორგი აივაზიანმა დააფუძნა. პანდემიის მიუხედავად, ღია სივრცის გამო მომხმარებლების ნაკლებობა კაფეს არ უგრძვნია.

Coffee Lab-ი მეოთხე წელია არსებობს და ორი მიმართულებით ავითარებს ქვეყანაში ყავის ინდუსტრიას - ერთი არის კაფე „ყავის ლაბორატორია“ , ხოლო მეორე მიმართულება ყავის დისტრიბუცია ოფისებსა და სხვადასხვა კვების ობიექტებში. როგორც გიორგი აივაზიანი ამბობს, ოფისებისა და რესტორნების დახურვის გამო ყავის დისტრიბუციის მიმართულება დიდ დანაკლისს განიცდის.

„თავიდან, როდესაც ინფიცირების 3 შემთხვევა იყო და გამკაცრდა ყველაფერი, მაშინ ძალიან შემცირდა ხალხის რაოდენობა, ყველაფერი დაკეტეს და ჩვენც დავიხურეთ. მერე გავხსენით ისევ Coffee Lab-ი და საკმაოდ კარგად დავიწყეთ მუშაობა, ზაფხული კარგი პერიოდი იყო ჩვენთვის. მიუხედავად იმისა, რომ დისტანციის აუცილებლობის გამო, ნაკლებ ხალხს ვემსახურებოდით, ჩვენი „ყავის ლაბორატორია სრულად ივსება დღემდე.  

მეორე მიმართულება კი, რაც ყავის დისტრიბუციას გულისხმობს, სრულად ჩავარდნილია. ჩვენ ყავას და ყავის აპარატებს ვაწვდიდით ოფისებს, რესტორნებს, სასტუმროებს - ახლა ოფისების უმეტესობა არ მუშაობს. კაფეები და რესტორნები, რომელთაც ყავას ვაწვდიდით, უმეტესად  ტურისტულ ლოკაციებზე იყო განთავსებული და ბევრი დაიკეტა, დავალიანებებიც ჰაერშია.  Covid 19-ამდე 100 პარტნიორი გვყავდა, ახლა - ძალიან ცოტა, რადგან ოფისები დაიკეტა და დისტანციურ რეჟმზე გადავიდნენ, რესტორნები კი რა მდგომარეობაში არიან კარგადაა ცნობილი,- ამბობს ბიზნესმენი.

მიუხედავად იმისა, რომ კომპანია არ გეგმავდა ქსელის გაფართოებას, პანდემიამ გიორგი აივაზიანს გადააწყვეტინა, რომ ყავის ლაბორატორიების რამდენიმე ობიექტი მსგავს კრიზისულ სიტუაციაში უფრო მომგებიანია. უახლოეს მომავალში „აქსის თაუერსში“ და ფალიაშვილის ქუჩაზე კიდევ ორი ყავის ლაბორატორია გაიხსნება, ამასთან კი ევროპულ-ქართული ღია სამზარეულო, რომელიც ბიზნესმენის თქმით, Casual – Dinning სტილს განეკუთვნება.  

„მიზნად არ მქონდა, რომ ბევრი „ყავის ლაბორატორია“ მქონოდა, ჩვენი მიზანი იყო ის, რომ ჩვენი ყავა სხვადასხვა ობიექტებზე ყოფილიყო და ამიტომაც განვავითარეთ მიწოდების სერვისი. ჩვენ ვართ ყავის მომხალავები და ხარისხიანი ყავის მიმწოდებლები. პანდემიამ კი გვაჩვენა, რომ უფრო მდგრადი არის ასეთი ქსელის შექმნა, როცა შენს ხელშია მართვა, რადგან პანდემია  Coffee Lab-ზე არ აისახა.

ახლა ვაკეთებთ ერთ „ყავის ლაბორატორიას“ ფალიაშვილის და ბაზალეთის ქუჩების კვეთაზე. პირველ სართულზე იქნება coffee lab-ი და მეორე სართულზე რესტორანი ღია სამზარეულოთი. ასევე „აქსის თაუერსის“ პირველ სართულზე ვგეგმავთ food court-ში შესვლას, რომლის გახსნაც მარტის პირველ ნახევარში იგეგმება - მეტად გაშლას არ ვაპირებთ.

რაც შეეხება რესტორანს, მზარეული მომხმარებლის წინ ამზადებს საკვებს, ეს კონცეპტუალურად ძალიან საინტერესოა. მენიუც საინტერესო იქნება - ეს იქნება ქართულის ნაზავი ევროპულთან. ჩვენ გვყავდა ჩამოყვანილი შეფი ახალი ზელანდიიდან, რომელმაც იცის საქართველოს გემოები და ერთობლივი მენიუ შევიმუშავეთ, რომელსაც Casual-Dinning-ს ეძახიან,” - განმარტა გიორგი აივაზიანმა.

კომპანია უკვე ოთხი წელია როგორც კომერციულ ინდუსტრიულ ყავას, ასევე ლიმიტირებული ტიპის სპეციფიურ მარცვლებს ამუშავებს, რომელიც უფრო ძვირადღირებულია და მსოფლიოს ყავის მოსავლის 3-4 პროცენტს შეადგენს.

Coffee Lab-ის გაფართოების და ახალი ობიექტების გახსნის საინვესტიციო მოცულობა 150 ათასი დოლარია.  ხოლო რესტორნის საინვესტიციო მოცულობა 200 ათას დოლარს შეადგენს.  

მარიამ მორგოშია