სჭირდება თუ არა დედაქალაქს განაშენიანების გაგრძელება და საცხოვრებელი კორპუსების დამატება, — ამ თემაზე, ცოტა ხნის წინ კომპანია „რედიქსის“ დამფუძნებელმა ლაშა პაპაშვილმა აღნიშნა, რომ თბილისში საცხოვრებელი სახლების მშენებლობის წინააღმდეგია. ის ამბობს, რომ დედაქალაქი 20 წელია რაც შეივსო და მას არც ერთი აგურის დამატება აღარ სჭირდება.

„კომერსანტი“ ამ თემაზე სამშენებლო და დეველოპერული კომპანიების პოზიციით დაინტერესდა. სამშენებლო კომპანია „ანაგის“ ხელმძღვანელი ირაკლი გოგოლაშვილი აღნიშნავს, რომ დედაქალაქის ურბანულ განვითარებაში პრობლემები ნამდვილად არსებობს, თუმცა სრულად გაჩერება არც გამოსავალია და არც ქალაქის განვითარების საწინდარი.

„ჩვენთან პროექტის შესასრულებლად მოსულ დამკვეთს ყველა ბერკეტი შეთანხმებული აქვს ნებართვასთან დაკავშირებით. ჩვენ კლასიკური მშენებლები ვართ. როდესაც ყველაფერი ნორმებში ჯდება, მერე ხდება პროექტის დაწყება.

ურბანულ განვითარებაში ზოგადად პრობლემები არის, მაგრამ ეს ფართო განხილვის საგანია და შესაბამისმა სპეციალისტებმა უნდა იმსჯელონ ამ თემაზე. თუმცა სრულად გაჩერება განვითარებას არ ნიშნავს. მშენებლობები რეგულაციებს უნდა დაექვემდებაროს, უნდა იყოს შესაბამისი დასაშვები ზონები. უფრო სწორი იქნება, თუ ამაზე ურბანისტები იმსჯელებენ“- განმარტავს ირაკლი გოგოლაშვილი.

„არსის“ გენერალური დირექტორის ბესიკ ორთოიძის აზრით, საქართველოშ დემოგრაფიული პროცესების მიმდინარეობა და თაობების სხვადასხვა საცხოვრებლებში გადანაწილების მოთხოვნა, არ იძლევა ქალაქში მშენებლობების გაჩერების საფუძველს. როცა მოთხოვნა აღარ იარსებებს, მხოლოდ მაშინ შეიძლება ამაზე ფიქრი.

„რა თქმა უნდა, ცალსახად ვერ დავეთანხმები პოზიციას, რომ უნდა შეჩერდეს კორპუსების მშენებლობები.  რომ გადავხედოთ, ნამდვილად არის ქაოსური განაშენიანება, არის უბნები სადაც ზედმეტიც კი იყო ის, რაც გაკეთდა. ასევე არის უბნები, სადაც საჭიროა კარგი ურბანული განვითარება. მაგალითისთვის ძველი ქარხნების ტერიტორიები რომ ავიღოთ, ეს უნდა შეიცვალოს. საცხოვრებელი სახლი რომ არ ავაშენოთ, რა ვუყოთ მოთხოვნას, ძველ შენობებს, კომუნისტური პერიოდის ნაგებობებს, რომელსაც ჩანაცვლება სჭირდება.

კიდევ ერთი მნიშვნელოვანი ფაქტორია დემოგრაფია - იყო დრო, როდესაც რამდენიმე თაობა ერთად ცხოვრობდა. ევროპამ ეს პერიოდი გადალახა და ახლა ჩვენთან მიმდინარეობს პროცესი, როცა შვილები ცალკე საცხოვრებელზე ზრუნავენ. როდის უნდა ვთქვათ, რომ საკმარისია საცხოვრებელი კორპუსები? როცა არ იქნება მოთხოვნა. შეიძლება ვიზრუნოთ კორპუსების სიმაღლეზე. მაგრამ საერთოდ რომ აღარ აშენდეს საცხოვრებელი სახლები, ამას არ ვეთანხმები. შეიძლება ქალაქის დაგეგმარების სწორი სტრატეგია შემუშავდეს, რითაც სიტუაცია გაუმჯობესდება“ - ამბობს ბესიკ ორთოიძე.

„მშენებლობა აღარ გვინდა ამ ქალაქში განსაკუთრებით საცხოვრებელი კორპუსების. ეს არის ჩემი მოლოდინი და თხოვნა ყველასთან რომ შეაჩერონ ყველაფერი. არსებულს თუ გადავაკეთებთ და ძველს თუ აჟურში მოვიყვანთ, თორე საცხოვრებელი სახლების მშენებლობების წინააღმდეგი ვარ. 20 წლის წინ შეივსო თბილისი, არც ერთი აგური არ სჭირდება თბილისს“, - განაცხადა გადაცემა Forbes Talks-ში სტუმრობისას ბიზნესმენმა.