თბილისის ზღვის ჰოსპიტალი კორონავირუსით ინფიცირებული პაციენტების მისაღებად მზადაა, - ამის შესახებ კლინიკის დირექტორმა კახა ბეროზაშვილმა განაცხადა.მისივე თქმით, კლინიკას სულ 97 საწოლი აქვს, 19 ხელოვნური სუნთქვის აპარატით. 25 საწოლია რეანიმაციულ განყოფილებაში.

„კლინიკის გადაკეთება ფუნქციურად ცხელების ცენტრად მოხდა 28 მარტს, ბრძანებით. სხვა პაციენტების, ზოგადი სომატური პაციენტების მიღება ჩვენთან შეჩერებულია. ვიღებთ მხოლოდ დაუზუსტებელი ცხელების მქონე პაციენტებს. ხდება მათი გამოკვლევა და პასუხების მიხედვით - ჰოსპიტალიზაცია, ან თვითიზოლაციაში გაშვება. რაც შეეხება რესურს, კლინიკას აქვს 97 საწოლი, მათგან 19 ხელოვნური სუნთქვის აპარატია, 25 საწოლია რეანიმაციულ განყოფილებაში, კლინიკა სრულადაა აღჭურვილი და მზადაა კორონავირუსით ინფიცირებული პაციენტების მისაღებად“, - განაცხადა თბილისის ზღვის ჰოსპიტალის კლინიკურმა დირექტორმა, კახა ბეროზაშვილმა ტელეკომპანია „მთავართან“ საუბრისას.

არსებული ინფორმაციით, თბილისში ცხელების სულ ორი ცენტრი იქნება. ერთ-ერთია თბილისის ზღვის ჰოსპიტალი და ასევე იქნება რესპუბლიკური საავადმყოფო.საქართველოში კორონავირუსის 115 შემთხვევა დადასტურდა. ამ დროისთვის ქვეყანაში კორონავირუსისგან 22 ადამიანი განიკურნა.

ბოლო მონაცემებით კარანტინის რეჟიმშია 5 106 ადამიანი, სტაციონარში მეთვალყურეობის ქვეშ კი 294 მოქალაქე რჩება.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა.

imedinews.ge