ტურისტებისთვის და ძველ თბილისში სეირნობის მოყვარულთათვის ერთ-ერთი ყველაზე პოპულარული, კოტე აფხაზის (ლესელიძის) ქუჩა იყიდება, ან ქირავდება. ადგილი სადაც რვა თვის წინ უამრავი ადამიანი იყრიდა თავს დღეს ცარიელია. ვეღარსად შეხვდებით ადამიანებს დიდი ზურგჩანთებით, რომლებიც მუდმივად იღიმოდნენ და უამრავ ფოტოს იღებდნენ. დღეს აქ არავის ეღიმება, ან ვის გაუღიმონ? ქართლის დედის, ალი და ნინოს თუ კახელი მიხოს ქანდაკებებს? მთელ ქუჩაზე მხოლოდ რამდენიმე ღია სუვენირების მაღაზიას შეხვდებით, რა თქმა უნდა ცარიელს. ფაფახები და ფიალები დღეს არავის სჭირდება. საქართველოს მოსახლეობას საერთოდ სხვა საზრუნავი აქვს, როგორ გადარჩეს მაშინ როდესაც ქვეყანაში სოციალურ-ეკონომიკური მდგომარეობა დღითიდღე მძიმდება.

თემაზე მუშაობის დროს ლესელიძის ქუჩაზე მდებარე ერთ-ერთი სუვენირების მაღაზია დაგვხვდა ღია. როგორც გაირკვა ობიექტი ღია არ ყოფილა უბრალოდ სხვადასხვა ნივთების დასასაწყობებლად იყვნენ მისულები. მაღაზიის მფლობელი, რომელმაც ვინაობის გამხელა არ ისურვა აცხადებს, რომ ბიზნესი ძალიან მძიმე მდგომარეობაშია. მისი თქმით, დაახლოებით 8 თვეა კომპანიას შემოსავალი არ ჰქონია. ახალგაზრდა ქალი ბინის გაყიდვას გეგმავს, მიზეზი საბანკო ვალდებულებებია.

„არ ვმუშაობთ, უბრალოდ სხვა მაღაზიები დავცალეთ და ერთ მაღაზიაში ვაერთიანებთ. გამოჩნდა ერთი ღვთისნიერი ადამიანი, რომელიც იჯარის თანხას არ გვახდევინებს სანამ ტურიზმი არ გაიხსნება. სახელმწიფო დახმარებით მხოლოდ 300 ლარი ავიღე და ღვთის ანაბარად დავრჩი, სხვა შემოსავალი არ მაქვს. მარტო ბანკებმა სასწაული გაგვიკეთეს, კი 6 თვე გადაგვივადეს მაგრამ, ახლა 1 100 დოლარის ნაცვლად 1 600 დოლარი უნდა გადავიხადო, ჯამში სესხი 8 000 დოლარით გამიძვირდა. ტურიზმი ისევ იგივე მდგომარეობაშია საიდან უნდა გადავიხადო ეს თანხა არ ვიცი. დავიწყე იმაზე ფიქრი, რომ სახლი გავყიდო, უძრავი ქონების ვებ-გვერდზე განცხადება უკვე დადებული მაქვს, სანამ ბანკი ჩამომართმევს, მირჩევნია მე გავყიდო.ვითხოვ, რომ საზღვრები გახსნან ან ფულადი დახმარება გაგვიწიონ სანამ საზღვრები გაიხსნება, რათა თავი გადავირჩინოთ. მთელი 8 თვე ჩვენთვის ზარალია, ტურისტი აღარ დადის ქუჩაში და სუვენირს ვინ იყიდის“ ,- განაცხადა სუვენირების მაღაზიის მფლობელმა.

ტურისტების ნაკლებობა ლესელიძის ქუჩაზე, მარტის თვეში შეამჩნიეს მაჭახელაში. სწორედ ამიტომ კომპანიამ რესტორნის დახურვის გადაწყვეტილება მიიღო. „მაჭახელას ქსელის“ მთავარი მენეჯერი გიორგი გოგოლიძე ამბობს, რომ ქვეყანაში რთული ეპიდემიოლოგიური სიტუაციაა და ამ ეტაპზე სხვას ვერაფერს გააკეთებენ.

„ლესელიძის ფილიალი ივნისის თვეში დავკეტეთ მიზეზი იყო ის, რომ ადამიანების რაოდენობამ იკლო. როდესაც ობიექტი დავხურეთ ესეთი რთული სიტუაცია ქვეყანაში არ იყო. პანდემიის გამო6 ფილიალის მუშაობა დროებით შევაჩერეთ, ხოლო მეშვიდე ლესელიძეს რესტორანი საერთოდ დავხურეთ. როდესაც სიტუაცია უკეთესობისკენ შეიცვლება, დახურული ობიექტების მუშაობას მაშინ განვაახლებთ“, - განმარტავს გიორგი გოგოლიძე.

დახურულია ბრენდ Materiel-ის მაღაზიაც, სივრცე სადაც ახალგაზრდა ქართველი დიზაინერების ნამუშევრები იყრიდა თავს ცარიელია. ძველი თბილისის ცენტრში მუშაობის გაგრძელება ვერც ქართულმა ბრენდულმა მაღაზია „DOTS“ -მა შეძლო. 

ლესელიძის ქუჩაზე ვეღარ შეხვდებით ქართულ ტკბილეულსაც, დახლები სადაც ადრე ფერადი ჩურჩხელები, ჩირები და ტყლაპები იყო გადმოფენილი ახლა ცარიელია. დაიხურა სწრაფი კვების ობიექტებიც, ცარიელია სასტუმროები. დღეს ყველანი მოლოდინის რეჟიმზე არიან გადასულები, ერთის მხრივ ელოდებიან საქართველოს მთავრობის ახალ გადაწყვეტილებებს, ხოლო მეორეს მხრივ ელოდებიან ტურისტებს, ტურისტებს რომლებიც მათი შემოსავლის ერთადერთი წყარო იყო.

ბაჩო ადამია