ქართული წარმოების სატვირთო ვაგონებზე მოთხოვნამ იკლო. ამის მიზეზი პანდემიაა, რის გამოც თბილისის ვაგონშემკეთებელმა კომპანიამ შუა აზიის ბაზარი პრაქტიკულად დაკარგა. ამის შესახებ ,,კომერსანტს“ ვაგონშემკეთებელი კომპანიის ტექნიკურმა დირექტორმა მამუკა დოლიძემ აცნობა.
,,ჩვენ მიერ წარმოებული ვაგონები, ძირითადად, ყაზახეთსა და სხვა პოსტსაბჭოთა ქვეყნებში გადის. ბოლო დრომდე აქტიურად ვახდენდით ექსპორტს შუა აზიის ქვეყნებში, მაგრამ ამ მხრივ პანდემიამ საკმაოდ დაგვაზარალა. ამ ეტაპზე ეს მიმართულება დროებით შეჩერებულია. რაც შეეხება შეკვეთებს, ძირითადად ონლაინ რეჟიმში ხდება. პანდემიამდე აქტიურად ჩამოდიოდნენ პარტნიორები, მოლაპარაკებებს ვმართავდით, რის შესაძლებლობაც ახლა ნაკლებადაა. თუმცა, საქმიანობას ჩვეულებრივ ვაგრძელებთ, ვაწარმოებთ ახალ ვაგონებს, გვაქვს რესურსი, რომ მოვამარაგოთ მთელი პოსტსაბჭოთა სივრცე და რამდენიმე სხვა ქვეყანაც, თუ მოთხოვნა იქნება. რაც შეეხება წარმადობას, თვეში 50 ვაგონი იწარმოება. უმეტესობა ექსპორტზე გადის, ადგილობრივ ბაზარზე მარტო საქართველოს რკინიგზაა შემსყიდველი“, - განმარტავს დოლიძე.
როგორც ცნობილია, ვაგონების დეფიციტს რიგი ქვეყნები განიცდიან, მათ შორის რუსეთიც, სადაც რეგისტრირებული 1,2 მილიონი ვაგონიდან 40% გამოყენებისთვის უვარგისია. შესაბამისად, ქვეყნის ნახშირის, მარილისა და სხვა ნედლეულის მწარმოებლები გადაზიდვის მხრივ დიდ პრობლემებს აწყდებიან.
მამუკა დოლიძის ინფორმაციით, რუსეთის მხრიდან ქართულ ვაგონზე მოთხოვნა ჯერჯერობით არ არის, თუმცა, შეკვეთების შემთხვევაში, კომპანიას აქვს რესურსი, რომ ექსპორტი ამ მიმართულებითაც განახორციელოს.
რაც შეეხება დასაქმებას, მამუკა დოლისძის ინფორმაციით, თბილისის ვაგონმშენებელ კომპანიაში 400-მდე ადამიანია დასაქმებული, ხოლო საშუალო ხელფასი 1000 ლარს შეადგენს.
შეგახსენებთ, რომ თბილისის ვაგონმშენებელი კომპანია წარმოადგენს ,,საქართველოს ვაგონმშენებელთა ჰოლდინგში“ შემავალ კომპანიას, „ელექტროვაგონმშენებელი ქარხანასა“ და „რუსთავის მეტალურგიული კომბინატთან“ ერთად. ჰოლდინგის მთავარი მამოძრავებელი ძალა სწორედ „ვაგონმშენებელი კომპანიაა“, სადაც ხდება ყველა სახის ვაგონების მშენებლობა და რემონტი. რუსეთისა და უკრაინის შემდეგ, საქართველო ერთადერთი ქვეყანაა, რომელმაც ვაგონმშენებლის სტატუსი მოიპოვა და კვლავ ლიდერია კავკასიაში რკინიგზის მოძრავი შემადგენლობის შეკეთებისა და მშენებლობის დარგში.
კომპანია ფლობს შესაბამის სერთიფიკატს/ლიცენზიას, რომლის ფარგლებშიც ახორციელებს ყველა ტიპის სატვირო და სამგზავრო ვაგონების, ელმავლებისა და ელექტრომატარებლების ახალი გოგორწყვილებისა და მარაგ ნაწილების წარმოებასა და შეკეთებას.
დამატებით შესაძლებლობებს წარმოადგენს, ასევე, მშენებლობისთვის საჭირო ლითონ-კონსტრუქციების წარმოება.
მარი ჩიტაია