ამ სეზონზე შიდა ტურიზმი კარგი იყო და აქტიურად დავიტვირთეთ, თუმცა ეს ვერ აკმაყოფილებს იმ საჭიროებებს, რაც დღეს ბაზარს აქვს,- ამის შესახებ „კომერსანტთან“ „აჭარა ჯგუფის“ დირექტორთა საბჭოს თავმჯდომარემ ვალერი ჩეხერიამ განუცხადა.

„ეს არის ძალიან რთული პერიოდი სასტუმროებითვის და ზოგადად სტუმარმასპინძლობის სექტორითვის. ძალიან კარგად იმუშავა ყაზბეგის rooms-მა და მუშაობს დღემდე. რაც  შეხება თბილისის სასტუმროებს, ფაქტობრივად ერთი სართულით ვმუშაობთ. რესტორნები მუშაობს საკმაოდ დატვირთულად, თუმცა სასტუმროების გამო ბიზნესს ძალიან დიდი თანხები დააკლდა შემოსავლების ნაწილში,“- ამბობს ჩეხერია.  

როგორც ცნობილია, „აჭარა ჯგუფის“ აღმასრულებელი ხელმძღვანელი ვალერი ჩეხერია ჯგუფის დირექტორთა საბჭოს თავმჯდომარე გახდა. მანვე აღნიშნა, ჯგუფი სწრაფი ტემპებით ვითარდება და ახლა ბიზნესის ყველა მიმართულებას თავისი ხელმძღვანელი ყავს.

„აჭარა ჯგუფი ძალიან სწრაფად იზრდება, ჩვენთან სტრუქტურა შეცვალა ჩამოვაყალიბეთ დირექტორთა ბორდი და ამჟამად ამ ბორდის  ხელმძღვანელი ვარ. ყველა მიმართულებას თავისი ხელმძღვანელი ყავს და ყველანი ვალდებული არიან ბორდის წინაშე. ნინო ზამბახიძე ბორდის ხელმძღვანელია სოფლის მეურნეობის მიმართულებით, სხვა მიმართულებები ძირითადად შიდა კადრებით დავაკომპლექტეთ,“ - ამბობს „აჭარა ჯგუფის“ დირექტორთა საბჭოს თავმჯდომარე.

რაც შეეხება დაგეგმილ და შეყოვნებულ პროექტებს, ერთერთი ასეთია ბათუმის Rooms-ი, რომლის მშენებლობაც მომავალ წელს განახლდება, ხოლო ჯგუფის მიერ აბასთუმანში შესყიდული სანატორიუმში ახალი Rooms-ის პროექტის მზადება აქტიურ ფაზაშია.

„ჩვენ ვაგრძელებთ აქტიურად სოფლის მეურნეობის პროექტს.  ვგეგმავთ და დაწყებული გვაქვს, ასევე აბასთუმნის პროექტზე მუშაობა,  ვფიქრობთ ძალიან საინტერესო იქნება პანდემიის შემდეგ ეს მიმართულება, რაც ეკოტურიზმის კატეგორიაში გადის.  ერთადერთი პროექტი, რისი გადავადებაც მოვითხოვეთ, ეს არის ბათუმის Rooms-ი, რომლის დაწყებაც წელს გვინდოდა და გადავავადეთ მომავალი წლისთვის. სხვა მიმართულებას ბიზნესში, ჯერ არ ვფიქრობთ, გვინდა მეტი ინვესტიცია სოფლის მეურნეობის მიმართულებით.  ეს არის ის ძირითადი ბიზნესი, რომელიც რჩება დღის წესრიგში. “ - აღნიშნავს ვალერი ჩეხერია.