თბილისის საერთაშორისო აეროპორტი გაფართოვდება. აღნიშნულს თბილისის საერთაშორისო აეროპორტის განვითარების გეგმა ითვალისწინებს, რომელზეც მუშაობა ამ წუთებშიც მიმდინარეობს. როგორც TAV Georgia-ს გენერალურმა მენეჯერმა თეა ზაქარაძემ ჟურნალისტებთან საუბრისას განაცხადა, საბოლოო გადაწყვეტილება, გააგრძელებს თუ არა, 2027 წლის შემდეგ, TAV Georgia თბილისისა და ბათუმის საერთაშორისო აეროპორტების მართვას, მარტის ბოლოს იქნება მიღებული და, ასევე, იმ პროექტების საინვესტიციო ღირებულებაც დაზუსტდება, რაც განვითარების გეგმის მიხედვით ამ აეროპორტებში უნდა განხორციელდეს. თეა ზაქარაძის განმარტებით, თბილისის საერთაშორისო აეროპორტში ახალი, უფრო დიდი ტერმინალი აშენდება.
„მიმდინარეობს მუშაობა თბილისის საერთაშორისო და ბათუმის საერთაშორისო აეროპორტების განვითარების გეგმებზე. ფრანგული კომპანია მათზე მუშაობის ბოლო ეტაპზეა. ამჟამად საქართველოს მთავრობასთან გავდივართ ყველა იმ ნიუანსსა და დეტალს, რაც აეროპორტს რეალურად სჭირდება. იმიტომ, რომ მისი განვითარებისთვის ძალიან მნიშვნელოვანია, რომ ყველა ხედვა და მოთხოვნა, რაც დღეს სახელმწიფოს აეროპორტთან მიმართებაში აქვს, იყოს შეჯერებული და შესრულებული. ჩვენ დღემდეც, კომპანია უკვე 18 წელია თბილისისა და ბათუმის საერთაშორისო აეროპორტებს მართავს, საკმაოდ ბევრი წარმატება გვქონდა და გვინდა ქვეყანას განახლებული აეროპორტები ჰქონდეს. ამაზე ვმუშაობთ. განვითარების კონკრეტული გეგმა თბილისის საერთაშორისო აეროპორტში ახალი ტერმინალის მშენებლობას ითვალისწინებს. არსებული ტერმინალი უკვე მოძველებულია, თითქმის 18 წლისაა. იგეგმება, ასევე, სამუშაოები აეროდრომზე და საჰაერო ხომალდების სტენდების დამატება. ძალიან მასშტაბურ პროექტებს ვგეგმავთ“, - განაცხადა თეა ზაქარაძემ. მისი თქმით, აღნიშნული პროექტის განხორციელებისათვის სოლიდური მოცულობის ინვესტიცია იქნება საჭირო.
რაც შეეხება TAV Georgia-ს, მას თბილისის საერთაშორისო აეროპორტის ოპერირების ვადა 2027 წლის თებერვალში ეწურება, ხოლო ბათუმის აეროპორტში — 2027 წლის მაისში. თუმცა, აეროპორტების მმართველ კომპანიასა და საქართველოს მთავრობას შორის ოპერირების ვადის გაზრდაზე მოლაპარაკებები ინტენსიურად მიმდინარეობს.