თბილისის მერია ვარკეთილში 13 მლნ. ლარად მულტიფუნქციურ სპორტულ ცენტრს აშენებს. 180-ე საჯარო სკოლასთან სპორტულ კომპლექსს 18 828 კვ.მ ფართობი დაეთმობა. როგორც „კომერსანტმა“ გაარკვია, ტერიტორიაზე მხოლოდ ერთი, ორსართულიანი შენობა განთავსდება. პირველ სართულზე მდებარეობს რესეფშენი კაფით, გამანაწილებელი დერეფანი, ვესტიბულე, მოსასვენებელი სივრცე, კომბინირებული სპორტდარბაზი გასახდელებით და სველი წერტილებით, ორი საცურაო აუზი, ასევე გასახდელებით და სველი წერტილებით. საზაფხულო სივრცე შეზლონგების განსათავსებლად, ექიმის ოთახი, საუნა, მასაჟის ოთახები, სპორტული ორთაბრძოლებისა და ტანვარჯიშის დარბაზები.
მეორე სართულზე განთავსებულია ფიტნეს დარბაზი, სახელოვნებო სკოლა, საკონფერენციო სივრცე, რეკრეაციული ზონები და ტერასა.
მიწის ნაკვეთი თბილისის მუნიციპალიტეტის საკუთრებაა. როგორც განმარტებით ბარათში ვკითხულობთ, ტერიტორიაზე მხოლოდ ერთი შენობა განთავსდება. მოეწყობა შენობასთან მისასვლელი საავტომობილო გზა და ღია, 75 მანქანაზე გათვლილი ავტოსადგომი. დარჩენილი ტერიტორიაზე კი ახალი ხე-მცენარეები დაირგვება.
ტენდერი დედაქალაქის მთავრობამ უკვე გამოაცხადა, წინადადებების მიღება პირველ ოქტომბერს დაიწყება და 6 ოქტომბერს დამთავრდება. სამშენებლო სამუშაოები ხელშეკრულების გაფორმებიდან 400 დღეში უნდა დასრულდეს. შესასრულებელი სამუშაოს საგარანტიო ვადა კი 3 წლით განისაზღვრა.
მომზადებული დოკუმენტის თანახმად ტერიტორიის განვითარების მიზანია არსებულ განაშენიანებულ საცხოვრებელ ზონაში შეიქმნას საუბნო ტიპის მრავალფუნქციური სპორტული ინფრასტრუქტურა. განმარტებით ბარათში ვკითხულობთ, რომ სპორტკომპლექსის მიზანია არსებულ საცხოვრებელ გარემოში მობინადრე ყველა ასაკის მოქალაქეს შეუქმნას ხელმისაწვდომობა სხვადასხვა ტიპის სპორტული და კულტურული აქტივობებისათვის, ჯანსაღი ცხოვრების წესის დამკვიდრებისათვის და მომავალი თაობების სპორტში უფრო მეტად ჩართულობისათვის.
ბაჩო ადამია