თბილისის მერია გუდიაშვილის მოედანზე არსებული სივრცეების აუქციონზე გატანას გეგმავს. ამის შესახებ თბილისის მერმა კახა კალაძემ მუნიციპალიტეტის მთავრობის სხდომაზე განაცხადა.

მიიღე ინფორმაცია უფრო სწრაფად ჩვენს Telegram-ზე.

კალაძემ თბილისის ვიცე-მერს აღნიშნულთან დაკავშირებით ბიზნესსექტორთან კომუნიკაცია დაავალა და გუდიაშვილის მოედნის განვითარების პერსპექტივებზე ისაუბრა.

„რამდენიმე თვის წინ ჩვენ გვქონდა პრეზენტაცია და საზოგადოებას ვაჩვენეთ თუ რამდენად ლამაზი გამოვიდა გუდიაშვილის მოედანი რეაბილიტაციის შემდეგ. თითოეულ ძეგლს და ორნამენტს, დეტალს ძალიან დიდი ყურადღება ეთმობა და მოწიწებით ვუფრთხილდებით, რომ კულტურული მემკვიდრეობა შევინარჩუნოთ. გუდიაშვილის მოედანი დღეს მთლიანად არის მოწესრიგებული, მიმდინარეობს სამუშაოების მეორე ეტაპი, სადაც 16 სახლი დაემატა და რეაბილიტაცია უტარდება. თუმცა, პირველი ნაწილს, რომელიც ჩვენ დავასრულეთ, სჭირდება პატრონი, ვინც მოუვლის, მიხედავს და სწორი ფორმით გამოიყენებს. ერთია, ძეგლების სილამაზე, მეორეა, ეკონომიკური მხარე. ჩვენ მივცემთ ბიზნესსექტორს შესაძლებლობას, რომ ეს სივრცეები, რომელიც მუნიციპალური საკუთრებაა გამოიყენონ. ჩვენ მოვამზადებთ დოკუმენტაციას, რომ მოხდეს ამ სივრცეების გამოტანა და გასხვისება ბიზნესსექტორზე რომ შემდეგ ეს ყველაფერი სწორად იქნეს გამოყენებული. თუმცა, ამ პროცესში პარალელურად იქნება ჩართული დედაქალაქის მერია, რომ გუდიაშვილის მოედანი არსებული სივრცე იყოს სწორად განვითარებული და არ მივიღოთ ისეთი კაფე-ბარები, რომელიც შეიძლება მისაღები არ იყოს დედაქალაქისთვის და გარკვეულ პრობლემებს წარმოადგენდეს. ეს ყველაფერი უნდა გაკეთდეს ისე, რომ მიზიდულობის ცენტრი იყოს, ადგილი, სადაც თითოეულ თბილისელს და ჩამოსულ სტუმარს ექნება სურვილი მივიდეს გუდიაშვილის მოედანზე დაისვენოს და გაერთოს.

მინდა დავავალო თბილისის ვიცე-მერს, ირაკლი ხმალაძეს დაიწყოს კომუნიკაცია ბიზნესსექტორთან, დავიწყოთ პრეზენტაციების გაკეთება და რაც შეიძლება ძალიან სწრაფად გამოვიტანოთ აუქციონზე არსებული სივრცეები. ამ შენობების შემდგომ გამოყენებას და განვითარებას პირადად ჩემთვის დიდი მნიშვნელობა აქვს. დარწმუნებული ვარ, ინტერესი დიდი იქნება და ბევრი ადამიანი მიიღებს აუქციონში მონაწილეობას“, - განაცხადა კალაძემ.