თბილისის ისტორიულ უბანში, სადგურის მოედანზე მრავალფუნქციური შენობის მშენებლობაზე დედაქალაქის მთავრობამ ინვესტორს უარი უთხრა. როგორც „კომერსანტმა“ გაარკვია არქიტექტურის სამსახურმა გაითვალისწინა კულტურული მემკვიდრეობის დაცვის საბჭოს რეკომენდაცია და მიზანშეწონილად მიიჩნია, რომ განმცხადებელს უარი უნდა ეთქვას მოთხოვნის დაკმაყოფილებაზე. ოფიციალური დოკუმენტის მიხედვით ირკვევა, რომ საპროექტო ნაგებობის მოცულობა, სიმაღლე და გაბარიტი არ არის მიზანშეწონილი აღნიშნული უბნის ისტორიული განაშენიანებისთვის.

ფიროსმანისა და ფოცხვერაშვილის ქუჩების გადაკვეთაზე მრავალფუნქციური კომპლექსი მშენებლობისთვის მიწის ნაკვეთის სამშენებლოდ გამოყენების პირობების დადგენა პირველად 2016 წელს მოითხოვეს, თუმცა მერიამ მიიღო გადაწყვეტილება, რომ საკითხი განუხილველი დარჩენილიყო. იქედან გამომდინარე, რომ ტერიტორია ისტორიულ ზონაშია, დამკვეთს დაევალა წარმოადგინა ისტორიული კვლევა და სრულყოფილი დასაბუთება, რისი წარმოდგენის შემდეგაც საკითხი სპეცნებართვის ფარგლებში იქნებოდა განხილული.

მიწის ნაკვეთის სამშენებლოდ გამოყენების შემდეგი მცდელობა ფრიდონ გოგალაძეს 2019 წლის იანვარში ჰქონდა. დამკვეთის განცხადება მერიამ არც ამჯერად დააკმაყოფილა. უწყებაში განმარტეს, რომ ტერიტორია მდებარეობს საზოგადოებრივ-საქმიანი ზონა 2-ში და და სატრანსპორტო ზონა 1 - ში.  დედაქალაქის მთავრობაში განმარტეს, რომ აღნიშნულ ზონაში ობიექტის საცხოვრებელი ფუნქციით დატვირთვა საჭიროებდა სპეციალურ შეთანხმებას. შესაბამისად, საკითხი განხილულ უნდა ყოფილიყო ურბანულ სამსახურში, რისთვისაც საჭირო იყო ახალი განაცხადის ატვირთვა ურბანული განვითარების საქალაქო სამსახურში. მხოლოდ ამის შემდეგ იქნებოდა შესაძლებელი მსჯელობა მიწის ნაკვეთის სამშენებლოდ გამოყენების პირობების დამტკიცებაზე.

2019 წლის მაისში ფრიდონ გოგალაძემ განაცხადი კიდევ ერთხელ შეიტანა. თუმცა საკითხი არქიტექტურის სამსახურმა არც ამჯერად განიხილა, მიზეზი ამჯერად არასრულყოფილი დოკუმენტაცია იყო. თუმცა აღსანიშნავია, რომ დამკვეთს ამჯერად წარდგენილი ჰქონდა წინასაპროექტო ისტორიულ-არქიტექტურული კვლევა, სადაც წერია, რომ საპროექტო მიწის ნაკვეთზე მონიშნულია გარევაჭრობისთვის და სხვა დანიშნულებისთვის განკუთვნილი უსახური შენობა ნაგებობები, რომლებიც არაურბანული, ქაოსური და მოუწესრიგებელი ნაშენებია. აღნიშნული ფუნქციით დატვირთული სივრცე ასევე ანტისანიტარიის კერას შექმნიდა. ყოვლად მიუღებელი  მსგავსი სივრცის არსებებობა ისტორიული განაშენიანების რეგულირების ზონაში.

არასრულყოფილი დოკუმენტაციის გამო არქიტეტურის სამსახურმა  დამკვეთს,  ოთარი მჭედლიშვილს, 2020 წელსაც  უარი  უთხრა. მიუხედავად იმისა, რომ დამკვეთმა ხარვეზები გამოასწორა, მრავალფუნქციური შენობის განთავსების მიზნით მიწის ნაკვეთის სამშენებლოდ გამოყენების პირობების დადგენის საკითხი განიხილა თბილისის მუნიციპალიტეტისა და საქართველოს განათლების, მეცნიერების, კულტურისა და სპორტის სამინისტროს წარმომადგენელთაგან მერიაში შექმნილმა კულტურული მემკვიდრეობის დაცვის საბჭომ  რომლის გადაწყვეტილების საფუძველზეც აღნიშნულ საკითხი არ დაკმაყოფილდა.

ბაჩო ადამია