პატარკაციშვილების ოჯახი თბილისის ცირკის შენობას უკვე მეხუთე წელია ყიდის, თუმცა მყიდველი ობიექტს ამ დრომდე არ გამოუჩნდა. საბროკერო კომპანია Colliers International Georgia-მ ისტორიული ობიექტი მრავალფუნქციური განვითარების პოტენციალით გასაყიდად 2017 წლის ოქტომბერში გამოიტანა. როგორც ცოტა ხნის წინ Colliers-ში „კომერსანტს“ განუცხადეს, კომპანია უკვე აღარაა დაკავებული ცირკის შენობის გაყიდვით, თუმცა მიზეზების დასახელებისგან თავი შეიკავეს.
შენობის მფლობელმა მზია პატარკაციშვილმა განგვიმარტა, ცირკის გაყიდვასთან დაკავშირებით წლების შემდეგაც არანაირი წინსვლა არ ყოფილა და სიტუაცია უცვლელია.
ნეოკლასიკური, მრგვალი ფორმის 5 სართულიანი ნაგებობა, რომლის საერთო ფართი 4,750 კვ.მეტრია, პატარკაციშვილების ოჯახს ეკუთვნის, როგორც ცნობილია ცირკის სტატუსის შეცვლა არ შეიძლება, რაც აბრკოლებს პოტენციურ მყიდველს დაინტერესებისგან.
ცირკი ამ დრომდე მინიმალურად დატვირთული და ფაქტობრივად წამგებიანი ობიექტია, პანდემიის გამო კი წარმოდგენები კარგა ხანია აღარ ტარდება.
"ძვირფასო მეგობრებო, სამწუხაროდ, გვიწევს, გითხრათ, რომ 2021 წლის საგაზაფხულო სეზონიც ცირკის-ის გარეშე ჩაივლის.
მთელი ამ დროის განმავლობაში დიდი იმედი გვქონდა, რომ სიტუაცია განიმუხტებოდა და წარმოდგენების ჩატარებას ახლა მაინც შევძლებდით, თუმცა ამჟამინდელი ეპიდემიოლოგიური ვითარება, სახელმწიფოს მიერ დაწესებული მოქმედი ან მოსალოდნელი რეგულაციები და ვაქცინაციის ტემპი არ გვაძლევს საშუალებას, რომ სრულფასოვნად ჩავატაროთ დაგეგმილი წარმოდგენები.
ამ პირობებში, ფაქტობრივად, შეუძლებელია, თქვენი უსაფრთხოება სათანადოდ უზრუნველვყოთ და პასუხისმგებლობა ავიღოთ უცხოელი არტისტების ქვეყანაში ჩამოყვანაზე.
დარწმუნებულები ვართ, რომ ამ ურთულეს პერიოდს ერთად გადავლახავთ და 2021 წლის შემოდგომის სეზონზე ჩავატარებთ წარმოდგენებს," _ ნათქვამია განცხადებაში, რომელიც ცოტა ხნის წინ ცირკის ადმინისტრაციამ გაავრცელა.
ფოტო: ambebi.ge
ცირკი 1939 წელს აშენდა. აღნიშნულ შენობა-ნაგებობას კულტურული მემკვიდრეობის ძეგლის სტატუსი აქვს მინიჭებული. 2017 წელს, როცა პატარკაციშვილების ოჯახმა ცირკი გასაყიდად გამოიტანა, Colliers International Georgia-ში აცხადებდნენ, რომ მისი ფასი 18 მლნ დოლარი იყო.
მეცხრამეტე საუკუნის 90-იან წლებში ძმებმა ნიკიტინებმა გოლოვინსკის პროსპექტზე ააშენეს ცირკის შენობა რომელიც მეოცე საუკუნის დასაწყისში დაიწვა. 1914 წელს ესიკოვსკიმ მეორე შენობა ააშენა ახლანდელი ღვინის ქარხნის ტერიტორიაზე.
30 იან წლებში თბილისის ორივე ცირკი სახელმწიფო ცირკების გაერთიანების დაქვემდებარებაში გადავიდა.
ასევე დაიწყო კაპიტალური ცირკის მშენებლობა რომელიც 1939 წლის ბოლოს დასრულდა. 1940 წელს დაიწყო სტაციონალური ცირკის შენობის ფუნქციონირება, რომლის დირექტორი ცნობილი მომღერალი და ველოსიპედისტი ლადო კავსაძე იყო.
მარიამ მორგოშია