თბილისის ცენტრში კიდევ ერთი მრავალფუნქციური კომპლექსი აშენდება. საცხოვრებელ და კომერციულ ობიექტს ქავთრაძის ქუჩაზე „ნიუ გრუპ ქავთარაძე“ აშენებს, პროექტის დამკვეთი ლაშა ბაგრატიონია. როგორც „კომერსანტმა“ გაარკვია, მშენებლობის ნებართვა კომპანიამ გასული წლის ნოემბერში მიიღო, ახლა „ნიუ გრუპ ქავთარაძე“ თბილისის არქიტექტურის სამსახურთან მრავალფუნქციური კომპლექსის პროექტს ათანხმებს.
საპროექტო მიწის ნაკვეთის ფართობი 2 854 კვ.მ-ს შეადგენს, განაშენიანების ფართობი 2 122 კვ.მ ხოლო საერთო ფართობი 13 605 კვ.მ აქედან საცხოვრებელი ფართი 5 171 კვ.მ უკავია, საოფისე ფართს 1 207 კვ.მ შეადგენს ხოლო კომერციული ფართის ოდენობა 1 706 კვ.მ-ია. მრავალფუნქციური კომპლექსში 1786 კვ.მ საზაფხულო ფართს დაეთმობა.
არქიტეტქურის ვებ გვერდზე განთავსებული ინფორმაციის მიხედვით ირკვევა, რომ შენობა 11 მიწისზედა და 2 მიწისქვეშა სართულისგან შედგება. მიწისქვეშა სართულზე -განთავსებულია კომერციული ფართი. პირველ სართულზე განთავსებულია ასევე კომერციული ფართი. კომპლექსში ცალკე განთავსებულია 3 სართულიანი კომერციული ბლოკი და ცალკე 11 სართულიანი საცხოვრებელი ბლოკი. საპროექტო მიწის ნაკვეთზე ბოლო ნაწილში გათვალისწინებულია შენობაში შემოსასვლელი საავტომობილო გზის და მინუს -2 სართულზე პარკინგების მოწყობა.
განმარტებით ბარათში წერია, რომ სტრუქტურული ნაწილი გაძლიერებული ბეტონისაა (კარკასული შენობა), შემავსებლად გამოყენებულია სამშენებლო ბლოკი. შენობის ქუჩის მხარეს ფასადი მოპირკეთდება მუქი და ღია ნაცრისფერი ტრავენტინის ქვით, ასევე ფასადის ნაწილები გაილესება და მოპირკეთდება ბეტონის ფაქტურით. ფასადზე კარ-ფანჯარა შესრულებული იქნება შავი ალუმინის მინა-პაკეტით. შენობის საძირკვლის ტიპი იქნება ფილა.
დოკუმენტში ვკითხულობთ, რომ მიწის ნაკვეთი არსებული დენდროლოგიური პროექტის შესაბამისად კეთილმოეწყობა, დაირგვება ახალი ნარგავები და მოეწყობა მწვანე მოლი. ნაკვეთზე გაჩნდება მხოლოდ 6 საპარკინგე ადგილი აქედან ერთი ავტოსადგომი გათვალისწინებული იქნება შშმ პირთათვის.
ამონაწერით მეწარმეთა და არასამეწარმეო (არაკომერციული) იურიდიული პირების რეესტრიდან ირკვევა, რომ „ნიუ გრუპ ქავთარაძე“ ბაზარზე 2010 წელს დარეგისტრირდა თუმცა კომპანია „შპს იმერიონის“ სახელით ოპერირებდა. სარეგისტრაციო ცვლილება 2019 წელს განხორციელდა. დღეს კომპანიის დირექტორი ლაშა ბაგრატიონია, ხოლო წილის 99.9 %-ს მფლობელი შეზღუდული პასუხისმგებლობის საზოგადოება ნიუ გრუპ, 0.1%-ს კი ლუდმილა შახბაზიანი ფლობს.
თავის მხრივ შპს ნიუ გრუპის დირექტორიც ლაშა ბაგრატიონია, წილის მმართველები კომპანიაში შემდეგნაირადაა გადანაწილებული შეზღუდული პასუხისმგებლობის საზოგადოება თი ელ ჯი 55%, მზია მაღალაშვილი 45%.
შპს თი ელ ჯი-ის დირექტორი და ამავდროულად 100% წილის მფლობელი კი ბექა სურამელია.
ბაჩო ადამია