თბილისის ცენტრში, ჭილაძის ქუჩაძეზე სასტუმრო კომპლექსი შენდება. პროექტი მოიცავს ორი ბლოკისგან შემდგარ სასტუმრეობს „holiday inn express“-სა და „ameri plaza“-ს. პროექტის დამკვეთი შპს „ამერი დეველოპმენტია“.
კომპანიაში მშენებლობის დეტალებზე საუბარი არ სურთ, თუმცა, როგორც „კომერსანტმა“ გაარკვია აღნიშნული ტერიტორია „ამერი დეველოპმენტმა“ 2018 წელს ელექტრონულ აუქციონზე შეისყიდა. 3668 კვ.მ თბილისის ცენტრში ეკონომიკის სამინისტრომ 3 800 000 ლარად გაასხვისა. 2 წლის წინ გაფორმებული ხელშეკრულებით „ამერი დეველოპმენტი“ ვალდებული იყო 42 თვის ვადაში ქონებაზე ან მის ნაწილზე არანაკლებ 80 ნომრის მქონე სასტუმრო აეშენებინა. საპრივატიზებო პირობის შესრულების მიზნით, არანაკლებ ათი მილიონი ლარის ოდენობის ინვესტიცია უნდა განხორციელდებულიყო.
თბილისის არქიტექტურის სამსახურის ვებ-გვერდზე გავარკვიეთ, რომ აღნიშნულ ტერიტორიაზე ა ბლოკის მშნებლობის ნებართვა „ამერი დეველოპმენტმა“ 2018 წელს მიიღო. ხოლო ბ ბლოკის მშენებლობის ნებართვა 2019 წელს.
განმარტებითი ბარათში ვკითხულობთ, რომ ორი ბლოკისგან შემდგარი სასტუმროს კომპლექსში 120 ნომერი მოეწყობა. მიწის ნაკვეთის საერთო ფართობი 3668 კვ.მ-ს შეადგენს. ა ბლოკის განაშენიანების ფართობი 707 კვ.მ- ია ხოლო ბ ბლოკის 660 კვ.მ. ა ბლოკის სერთო ფართობი 6148 კვ.მ- ია, ბ ბლოკის კი 5177 კვ.მ. სასტუმროს ნომრების ფართობი კი 3130.6 კვ.მ- ს შეადგენს.
დოკუმენტში წერია, რომ ა ბლოკი, 12 მიწისზედა და 1 მიწისქვეშა სართულისგან შედგება. მიწისქვეშა სართულზე განთავსებულია კაფე-რესტორანი და სამზარეულო, პირველ სართულზე განთავსებულია მისაღები ღვინისა და სუვენირების მაღაზია და მათი ადმინისტრაცია. მეორე სართულზე ნიშნულზე განთავსებულია ტურისტული, მომსახურების და სარეკლამო სააგენტოები, ასევე ადმინისტრაცია და სათათბიროები.
ასევე ირკვევა, რომ მიწის ნაკვეთი კეთილმოეწყობა, დაირგვება ახალი ნარგავები და მოეწყობა მწვანე მოლი. ასევე ნაკვეთზე გაჩნდება ავტოსადგომები, სულ 13 საპარკინგე ადგილი აქედან ერთი ავტოსადგომი გათვალისწინებული იქნება შშმ პირთათვის.
ოფიციალურ დოუმენტში ვკითხულობთ, რომ სტრუქტურული ნაწილი გაძლიერებული ბეტონისაა, შემავსებლად გამოყენებულია სამშენებლო ბლოკი. შენობის ქუჩის მხარეს ფასადი მოპირკეთდება აგურით, მუქი და ღია ნაცრისფერი ტრავენტინის ქვით, ასევე ფასადის ნაწილები გაილესება და მოპირკეთდება ბეტონის ფაქტურით. ფასადზე კარ-ფანჯარა შესრულებული იქნება შავი ალუმინის მინა-პაკეტით. შენობის საძირკვლი იქნება ფილით.
რაც შეეხება ბ ბლოკს, ბანერის მიხედვით, შენობა 11 სართულიანი იქნება. არქიტექტურის ვებ გვერდზე ატვირთულია კიდევ ერთი დოკუმენტი, რომლის მიხედვითაც ირკვევა, რომ „ამერი დეველოპმენტმა“ განაშენიანების ინტენსივობის კოეფიციენტის გაზრდა მოითხოვა, მოთხოვნა თბილისის ვიცე-მერმა ირაკლი ხმალაძემ დააკმაყოფილა, კომპანიამ კი 2 კოეფიციენტის მომატებაში 40 000 ლარამდე გადაიხადა.
„ამერი დეველოპმენტი“ სასტუმრო კომპლექსის მშენებლობას 2020 წელს დაასრულებს. აღსანიშნავია, რომ პროექტი „სტუდია 9“ მოამზადა, მთავარი არქიტექტორი კი მამუკა ჩხაიძეა.
ბაჩო ადამია
ამერი დეველოპმენტი
