„თბილისის ბალნეოლოგიურ კურორტზე“  საერთაშორისო ბრენდის სასტუმროს გახსნა კორონავრიუსის პანდემიამ შეაფერხა. ამის შესახებ „კომერსანტს“ კურორტის კომერციულმა მენეჯერმა სალომე ყვავილაშვილმა განუცხადა. მისივე განცხადებით, ახალი საერთაშორისო ბრენდის სასტუმრო „თბილისის ბალნეოლოგიური კურორტის“ ტერიტორიაზე მიმდინარე წელს გაიხსნება, თუმცა ბრენდის სახელწოდება კვლავ გასაიდუმლოებულია.

10 მილიონი დოლარის ინვესტიციით „თბილისის ბალნეოლოგიური კურორტის“ განვითარება 2020 წელს სრულდება. ცნობილია, რომ ამ ადგილას 2020 წელს 125-ნომრიანი 4 ვარსკვლავიანი სასტუმრო განთავსდება და სასტუმროების საერთაშორისო ბრენდს საქართველოში ინვესტიცია უკვე განხორციელებული აქვს.

ამ ეტაპზე, კურორტს ერთ-ერთ უმსხვილეს ოპერატორთან მოლაპარაკებების საფუძველზე გაუთქმელობის ხელშეკრულება აქვს დადებული, სწორედ ამიტომ, კონკრეტული ბრენდის დასახელებისგან თავს იკავებს.

„ამჟამად, ყველაფერი შეჩერებული გვაქვს ამ კორონავირუსის გამო, აშენებულია სასტუმრო, უბრალოდ არ ფუნქციონირებს, მხოლოდ შენობაა.  სასტუმროს ბრენდის სახელწოდება გასაიდუმლოებულია. ბალნეოლოგიურ კურორტზე სამედიცინო მიმართულებით სამუშაოები არცერთი დღით არ შეგვიჩერებია,“ - განმარტავს სალომე ყვავილაშვილი.

აბანოთუბანში მდებარე „თბილისის ბალნეოლოგიური კურორტის“ ძველი შენობის 30% ზე მეტი  აღდგენილი და რეაბილიტირებულია. მათ შორის შენარჩუნდა და განვითარდა სამედიცინო მიმართულება, აღდგა ის ტრადიციული ბალნეო პროცედურები, რაც წარსულში არსებობდა. კომპანიამ შეიძინა უახლესი თაობის სამედიცინო და სარეაბილიტაციო აპარატურა,  გახსნა ველნეს სპა მიმართულება

შეგახსენებთ, სახელმწიფო „თბილისის ბალნეოლოგიურ კურორტის“ 100%-ს სახელმწიფო ფლობდა, დირექტორი კი 2000 წლიდან ნიკოლოზ სააკაშვილი იყო. 2014 წელს კომპანიის შემოსავალი 620 000 ლარზე მეტი იყო. 2017 წელს კი  შპს „იალონმა აღნიშნული ობიექტის პრივატიზაციით მთელი რიგი ვალდებულებები აიღო.

1998 წელს შენობას მიენიჭა კულტურული მემკვიდრეობის ძეგლის სტატუსი.

2018 წლის 1 აპრილიდან  კურორტს გენერალური მენეჯერი ლაშა ქევანიშვილი მართავს.

მარიამ მორგოშია