როგორც ცნობილია, 13 ივნისის ტრაგედიის შემდეგ თბილისის ზოოპარკი ეტაპობრივად ცდილობს ახალი ბინა თბილისის ზღვის ტერიტორიაზე დაიდოს. როგორც ზოოპარკის დირექტორი ზურაბ გურიელიძე განმარტავს ცხოველების ნაწილი უკვე გადაყვანილია და ამჟამად აშენებულია დიდი ავიარიუმი, ლეშიჭამია ფრინველებისთვის. პანდემიიდან და რესურსების არასაკმარისობიდან გამომდინარე, თბილისის ზოოპარკმა  მისამართის შეცვლა წელსაც ვერ მოასწრო. თუმცა უკვე გამოცხადებულია ტენდერი აფრიკული ცხოველებისთვის 9 ჰექტარის ფართობის მქონე სავანის გასაშენებლად, რომელიც გურიელიძის ვარაუდოთ მომავალ წელს დასრულდება. ვოლიერის ასაშენებლად გამოყოფილია 2 მლნ 200 ათასი ლარი და მოიცავს სხვადასხვა შენობა ნაგებობებსაც..

„ავიარიუმი დავასრულეთ, ფრინველები ჯერ არ გადაგვიყვანია. ახლა გამოცხადებული გვაქვს ტენდერები და ცოტა იწელება პროცესი. ვაშენებთ აფრიკულ სავანას, რომელიც იქნება ყველაზე დიდი ვოლიერი ზოოპარკში, მისი ფართობი იქნება 8-9 ჰექტარი. ეს ვოლიერი იქნება აფრიკული დიდი ცხოველებისთვის - ბეჰემოტები, ჟირაფები, მარტორქები, ზებრები და ანტილოპები. ამისთვის გამოყოფილია 2 მილიონ 200 ათასი ლარი. ტენდერში კი როგორც ჩვეულებრივად ხდება პროცესი გაიწელა , ვიღაცამ ფასი დააკლო, ვიღაცამ გაუსაჩივრა და ა.შ. სახელმწიფო გვაფინანსებს, მაგრამ თუ იქნება დამატებითი დაფინანსება, ეს ყველაფერი დაჩარქდება. ეს არ იქნება მხოლოდ ვოლიერი, აქ შენობები განლაგდება და გამოვა საკმაოდ კომპლექსური. როდესაც სავანა დამთავრდება ,მცირედ ინფრასტრუქტურულ სამუშაოებს ჩავატარებთ და იმედი გავქვს მომავალ წელს ამ ყველაფერს  საბოლოო სახეს მივცემთ.

აფრიკული ცხოველები გვყავს, ასევე უნდა ჩამოვუყვანოთ წყვილები. მოლაპარაკებებს ვაწარმოებთ სხვადასხვა ზოოპარკებთან, ასევე ჟირაფებზე, ეს ყველაზე რთული იქნება. იმედი გვაქვს რომ მალე შევძლებთ განახლებული ზოოპარკის გახნას.

 ჯერ ადრეა  ზოოპარკში ვიზიტის ფასებზე საუბარი, ვნახოთ გახსნისთვის რა სიტუაცია იქნება. ისეც არ შეიძლება, რომ პირვანდელი ფასი ჰქონდეს იმიტომ, რომ ყველაფერს თავისი შენახვა სჭირდება. აფრიკულ ცხოველებს არ სჭირდებათ განსაკუთრებული პირობები. ბოლოს ალბათ მივიღებთ ისეთ ძვირადღირებულ ზოოპარკს, როგორიც ევროპაშია.

ძველ ტერიტორიაზე ზოოპარკი მუშაობს, სტუმრებიც აქტიურად მოდიან.  ასევე გვინდა ტროპიკარიუმის აშენება ტროპიკული ცხოველებისთვის და ეს საკმაოდ ძვირადღირებული საქმიანობაა თავისი აღჭურვილობით, რომელიც მიკროკლიმატს შეინარჩუნებს,“ - ამბობს გურიელიძე.