დღეიდან თბილისის მასშტაბით ოქროს ბირჟები გაიხსნა. 10 ივნისიდან კი „თბილისი ცენტრალში“ მდებარე ოქროს სავაჭრო სივრცეც განაახლებს მუშაობას. „კომერსანტის“ ინფორმაციით, ობიექტის გახსნის გადადების მიზეზი, პანდემიის გამო დაწესებული რეგულაციებია, რომლის მომზადებაც „თბილისი ცენტრალის“ „ოქროს ბირჟამ“ ვერ მოასწრო.
„კომენრსანტის“ წყაროს ინფორმაციით, დამცავი ბარიერები, რომელიც თანამშრომლებსა და მომხმარებელს შორის უნდა დამაგრდეს თავად მოვაჭრეებმა შეიძინეს და არა სავაჭრო ობიექტმა. ინფორმაციას „თბილისი ცენტრალის“ ადმინისტრაციაშიც გვიდასტურებენ. მათი თქმით, თანხის შეგროვებაზე მოვაჭრეებიც დათანხმდნენ და ამ ნაბიჯის გადადგმა ობიექტის ადმინისტაციას ფინანსური კრიზისის გამო მოუხდა.
„ვემზადებით 10 ივნისისთვის, ეს საორიენტაციო რიცხვია როდესაც ჩვენს სივრცეში არსებული „ოქროს ბირჟა“ გაიხსნება. ვამონტაჟებთ იმ ბარიერებს, რასაც რეგულაცია ითვალისწინებს. ამ ყველაფრის თანხას მოიჯარეებიდანაც ვიღებთ, რადგან ჩვენ გვაქვს ფინანსურად მძიმე მდგომარეობა და ვერ მოვახერხებთ მხოლოდ ჩვენი სახსრებით სამუშაოს შესრულებას. თანხა, რომელსაც შეაგროვებენ არ ეკარგებათ ჩვენს მოიჯარეებს, ჩეკის სახით გატარდება და ეს ინფორმაცია იქნება საჯარო, ჩვენ დამალულად არაფერს ვაკეთებთ“,-აცხადებენ ოქროს ბირჟის ადმინისტრაციაში.
სრული დატვირთვით განაახლა მუშაობა „ოქროს სამყარომ“, სადაც რეგულაციის ყველა სტანდარტი დაცულია და როგორც თანამშრომლები აცხადებენ ბარიერებსა და სხვა აღჭურვილობაზე სავაჭრო ობიექტმა იზრუნა. როგორც „ოქროს სამყაროში“ აცხადებენ, ძვირფას ლითონზე ფასის ზრდის მიუხედავად მასზე მოთხოვნა პანდემიის შემდეგ გაორმაგდა.
„ჩვენი ბაზრობა უკვე გაიხსნა, ადგილზე მისულებს ყველაფერი დაგვხვდა გამყოფი ბარიერით, როგორც მომხმარებელსა და ჩვენს შორის, ასევე თანამშრომლებს შორისაც მინის გამყოფი ზოლიცაა. ამ ყველაფერზე თავად ბაზრობამ იზრუნა. დღეს დილიდან მომხმარებლების სიმრავლეც შეინიშნება, მიუხედავად იმისა, რომ ოქროს ფასმა მოიმატა მაინც იყიდება, პირველივე დღეს გავყიდეთ.ნაკეთობის ფასი 130 ლარია,ჯართის- 95 ლარიფასები გაზრდილია პანდემიის შემდეგ, ამას ლარის გაუფასურებაც დაემატა.“-აცხადებენ ოქროს სამყაროში.
ნათია ლომიძე