თავისუფლების მოედანზე, პუშკინის N 17-ში, რკინის ყველასათვის ნაცნობი კონსტრუქციის დემონტაჟი მოხდება. უკვე წლებია დედაქალაქის ცენტრში რკინებით შემოსაზღვრული ნაგებობის იერსახე არ იცვლება, თუმცა უახლოეს მომავალში ლითონის კონსტრუქციის ნაცვლად დამკვეთი დედაქალაქის ისტორიულ უბანში მრავალფუნქციურ კომპლექსს ააშენებს. პროექტის დამკვეთი საინიციატივო ჯგუფია, რომელიც ადგილზე კომერციული და საოფისე ფართების მოწყობას გეგმავს.

მიმდინარე წლის 19 ოქტომბერს მრავალფუნქციური კომპლექსის პროექტის ავტორმა, შპს „STUDIO 9“-მ დედაქალაქის მთავრობას ესკიზის 2 ვარიანტი წარუდგინა. არქიტექტურის სამსახურმა ერთ-ერთ ესკიზს დადებითი შეფასება მისცა. არქიტექტურული გუნდი ახლა სწორედ ამ მოწონებული ვარიანტის შეთანხმებას ცდილობს. „STUDIO 9“-მ თბილისის მერიას 24 ნოემბერს მიმართა. 

განმარტებით ბარათში ვკითხულობთ, რომ მრავალფუნქციური შენობის ნულ და პირველ სართულზე დაგეგმილია კომერციული ობიექტების - მაღაზიისა და ბარის მოწყობა, ხოლო  2, 3, 4, 5 და მეექვსე სართულები საოფისე ფართებს დაეთმობა.

დოკუმენტის მიხედვით, აღნიშნული ტერიტორიის მოწესრიგება წლების განმავლობაში ვერ მოხერხდა. ბოლო პერიოდში ტერიტორიის მოწესრიგება მესაკუთრის მენაშენეთა ამხანაგობა „პუშკინი 17“-ის მცდელობით დაიწყო.

განმარტებით ბარათში წერია, რომ შენობის არქიტექტურის გადაწყვეტისას „STUDIO 9“-ის ჯგუფმა გაითვალისწინა არსებული ტერიტორიის ისტორიული ურბანული ქსოვილი, აშენებული შენობა ნაგებობების იერსახე. დოკუმენტში ვკითხულობთ, რომ ასევე გათვალისწინებული იქნა ის გარემოება, რომ საპროექტო ტერიტორია წარმოადგენს ერთგვარ გარდამავალ არეალს მაღალი, მასშტაბური მოცულობებსა და დაბალ განაშენიანებას შორის.  გამომდინარე აქედან მათ დაისახეს მიზნად შეექმნათ არქიტექტურული მასშტაბით და იერსახით ერთგვარი შემავსებელი მოცულობა, რომელიც არააგრესიულად ჩაეწერება ისტორიულ განაშენიანებაში.

პროექტს თან ახლავს ტერიტორიის ისტორიულ-არქიტექტურული კვლევა, რომელიც ხელოვნებათმცოდნე გია ჭანიშვილმა მოამზადა. დოკუმენტში ვკითხულობთ, რომ ნებისმიერი გეგმარებითი და სარეკონსტრუქციო სახეცვლილების დროს, მაქსიმალურად გათვალისწინებული უნდა იყოს არსებულ ქუჩათა განაშენიანების და ნაგებობების თავისებურებანი, რათა არ დაიკარგოს ამ ურბანული სტრუქტურის მხატვრულ-ისტორიული ღირებულება. ჭანიშვილის თქმით სასურველია, ისეთი ნაგებობის აგება, რომელიც შეესაბამება უბნის ხასიათს და უმტკივნეულოდ ჩაეწერება უბნის ისტორიულ განაშენიანებაში.

ბაჩო ადამია