ყვარელში სპეცოპერაცია წარმატებით დასრულდა, ბანკზე შეიარაღებული თავდამსხმელი დაკავებულია და ყველა მძევალი გათავისუფლებულია.

ამის შესახებ ინფორმაციას შსს ავრცელებს.

„ყველა მძევალი არის თავისუფალი, შეტყობინების მიღებისთანავე სამართალდამცველებმა დაიწყეს აქტიური საგამოძიებო მოქმედებები, ადგილზე იმყოფებიან სხვადასხვა დანაყოფების წარმომადგენლები. ამ წუთებშიც მიმდინარეობს ღონისძიება. გამოძიება არაერთი მუხლით მიმდინარეობს. თანხასთან დაკავშირებით იყო მოთხოვნა“, - განაცხადა შსს-ს საზოგადოებასთან ურთიერთობის სამსახურის ხელმძღვანელმა ქეთი კოვზიაშვილმა.

...

„საქართველოს ბანკის“ ყვარლის ფილიალი უკვე ყველა მძევალმა დატოვა, – ამის შესახებ საქართველოს პირველ არხს კახეთის მხარეში სახელმწიფო რწმუნებულმა, ირაკლი შიოშვილმა განუცხადა.

„მძევალი უკვე აღარ ჰყავს. სხვადასხვა დროს სხვადასხვა თანხას იძახის. ისე, რომ ამჟამად მიმდინარეობს მოლაპარაკება სამართალდამცველებსა და მას შორის. ვნახოთ შედეგი, დაველოდოთ შედეგს. მარტო არის ახლა ბანკში თავად. ჯერ არაფერს ამბობს, მოლაპარაკება მიმდინარეობს“, – განაცხადა ირაკლი შიოშვილმა.

...

თვითმხილველის ინფორმაციით, ყვარელში, „საქართველოს ბანკში“ შეჭრილმა მძევლების ნაწილი გაათავისუფლა.

როგორც აღნიშნული პირი ამბობს, მძარცველს ხელყუმბარა აქვს.

„ბანკში დასალაგებლად შევდიოდი და ეს კაცი გამოვარდა, ხელში „ლიმონკა“ აქვს. დაიყვირა „გადით ახლავე გარეთო“ და გამოვვარდი. შიგნით დარჩენილია მძევლები. როგორც ვიცი ადამიანების ნაწილი დარჩა, ასევე, თანამშრომლებიც. ბანკში დაახლოებით, 20-მდე თანამშრომელი მუშაობს. რომ იყვირა გარეთ გადითო, თავიდან მეგონა ხუმრობდა... შემეშინდა და გამოვიქეცი. შეფუთული იყო, სათვალე ეკეთა“, - განაცხადა ბანკის ფილიალის დამლაგებელმა.

...

საქართველოს ბანკის ყვარლის ფილიალში შეჭრილი შეიარაღებული პირი მძევლების გათავისუფლების სანაცვლოდ 500 000 ლარს ითხოვს.

გავრცელებული ინფორმაციით, ამ დროისათვის ბანკში დაახლოებით 15 ადამიანი იმყოფება, რომელთა შორის როგორც მომხმარებლები, ისე ბანკის თანამშრომლები არიან.

...

ყვარლის მერის როსტომ სესიაშვილის განცხადებით, ჯერჯერობით არ არის დადგენილი იმ პირის ვინაობა, რომელიც ყვარელში, “საქართველოს ბანკის“ ფილიალში შეიჭრა. როგორც მან „მაესტროს“ ეთერში განმარტა, სამართალდამცავები ცდილობენ, რომ მასთან კომუნიკაცია შედგეს.

მისი თქმით, ამ ეტაპზე დაზუსტებით უცნობია, თუ რამდენი ადამიანი იმყოფება ბანკის ფილიალში.

„სამართალდამცავები ადგილზე უსაფრთხოების ყველა ნორმას იცავენ. მიმდინარეობს გამოძიება. ჯერჯერობით ვინაობა დადგენილი არ არის. ყველა სამართალდამცველი ადგილზეა მობილიზებული და ყველაფერს აკეთებენ იმისთვის, რომ მოქალაქეების უსაფრთხოება დაცული იყოს. ამ ეტაპზე ჩემთვის უცნობია, რამდენი მოქალაქე და რამდენი თანამშრომელია ადგილზე. სამართალდამცავები ცდილობენ, რომ კომუნიკაცია შედგეს“, - განაცხადა სესიაშვილმა.

...

შსს ადასტურებს, რომ საქართველოს ბანკის ფილიალში, ყვარელში, შეჭრილია შეიარაღებული პირი. პოლიცია ყვარელში, ჭავჭავაძის ქუჩაზეა მობილიზებული. 

„პირველადი ინფორმაციით, საქართველოს ბანკის ფილიალში შეჭრილია შეიარაღებული პირი.

თავდასხმის შესახებ შეტყობინების მიღებისთანავე პოლიციის თანამშრომლებმა, მყისიერი რეაგირების რეჟიმში შემოსაზღვრეს შემთხვევის ადგილის მიმდებარე ტერიტორია. ამჟამად ადგილზე მობილიზებული სამართალდამცველები ატარებენ ყველა საჭირო და გადაუდებელ ღონისძიებას, ასევე მიმდინარეობს საგამოძიებო და ოპერატიული ღონისძიებები.

შინაგან საქმეთა სამინისტრო მოუწოდებს მედიის წარმომადგენლებს - დაიცვან უსაფრთხოების ნორმები და დაემორჩილონ ადგილზე პოლიციელთა მითითებებს“ – ნათქვამია შინაგან საქმეთა სამინისტროს განცხადებაში.

მომხდარზე სხვა დეტალები ამ დროისთვის უცნობია.