აუდიტის სახელმწიფო სამსახურმა რიგი დარღვევების, კონტროლის მექამიზმის არ არსებობისა და სხვა შეუსაბამობების გამო თავდაცვის სამინისტროს შემოწმებისას უარყოფითი დასკვნა გასცა. მხოლოდ ნაშთების შედარებისას 697 მლნ ლარიანი უზუსტობა აღმოჩნდა.

დასკვნის თანახმად სამინისტროს ბალანსზე არსებული ქონება 1994 წლის სახელმძღვანელოს მიხედვით Excel-ის ფაილშია აღწერილი, რომელიც აღრიცხვა-ანგარიშგების მეთოდოლოგიის მარეგულირებელ ნორმატიულ აქტებთან შესაბამისობაში არ არის. განსხვავებული ფორმატისა და არაიდენტიფიცირებული მონაცემების გამო კი რაოდენობრივი აღრიცხვისა და თანხობრივი ინფორმაციის ერთმანეთთან დაკავშირება პრაქტიკულად შეუძლებელია.

სამხედრო ქვედანაყოფებიდან მიღებული ფინანსური ინფორმაციის მხოლოდ ყოველთვიური ჯამის აღრიცხვის გამო სარდლობებისა და ქვედანაყოფების დონეზე სააღრიცხვო მონაცემები არაინფორმაციულია, ხოლო ფინანსების მართვის დეპარტამენტის მიერ სრულყოფილად ვერ ხორციელდება ეკონომიკური მოვლენების კონტროლი.

ერთ-ერთი მნიშვნელოვანი დარღვევევის შედეგად, არასწორი აღრიცხვიანობის გამო აუდიტმა 697 მლნ ლარიანი უზუსტობა აღმოაჩინა. დარღვევა ამ მოცულობის თანხის გაფლანგვა-მითვისებას არ გულისხმობს. სამინისტროს განმარტებით, 2020 წელს განხორციელდა შესაბამისი ღონისძიებები მონაცემებს შორის სხვაობების შემცირების მიზნით და აღნიშნული უზუსტობების ჯამური მაჩვენებელი მნიშვნელოვნად შემცირდა.

აუდიტის სამსახურმა სამინისტროს რეკომენდაცია მისცა, რომ სამართლიანი და უტყუარი ფინანსური ანგარიშგების მომზადების მიზნით, შეიმუშაოს ერთიანი, სრულყოფილი ორგანიზაციული სისტემა და ინსტრუქცია, რომელიც უზრუნველყოფს სამინისტროს ფინანსების მართვის დეპარტამენტში წარდგენილი ინფორმაციის სანდოობას, ნაშთებისა და ოპერაციების ურთიერთშესადარისობას, აღრიცხვის დროულობას, სისრულესა და სიზუსტეს.

2019 წლის 31 დეკემბერის მდგომარეობით თავდაცვის სამინისტროს დაქვემდებარებაში მყოფ მთელ რიგ ობიექტებზე ინვენტარიზაცია ან საერთოდ არ იყო ჩატარებული, ან იყო, მაგრამ არასრულყოფილად. ჩამონათვალს შორის მოხვდა იარაღის მწარმოებელი - დელტაც, სადაც ინვენტარიზაცია არასრულად ჩატარდა.

აღრიცხვიანობაში არსებულ პრობლემების განმარტებისას სამინისტროში აღნიშნეს, რომ დარღვევის მიზეზი აქტივების ღირებულების გარეშე არსებობაა, რაც მათ იძულებულს ხდის ინვენტარი მხოლოდ რაოდენობრივად აღრიცხონ.

პრობლემის გაგრძელებაა ის ფაქტი, რომ თავდაცვის სამინისტრო, სხვა ძალოვანი უწყებების მსგავსად ფლობს სპეციფიკურ აქტივებს, (ნაწილი გადმოცემულია საბჭოთა კავშირის დაშლის შედეგად, ნაწილი შეძენილია 1990-იან წლებში, მიღებულია სხვადასხვა სახელმწიფოსგან) რომელთა ფასები გარკვეულ შემთხვევებში ობიექტური მიზეზების გამო უცნობია. აუდიტის სამსხაურის დასკვნით აღნიშნული ნაკლოვანების გამოსწორება კომპლექსურ მიდგომას და შეფასების პოლიტიკის შემუშავებას საჭიროებს. სამინისტროს განმარტებით, დაწყებულია ღონისძიებების განხორციელება აღნიშნული მიმართულებით შესაფერისი მიდგომებისა და პოლიტიკის ჩამოყალიბებისთვის

კიდევ ერთი დარღვევა რომელიც აუდიტის სამსახურმა აღმოაჩინა ძველი ნაშთებია. თავდაცვის სამინისტრო ბალანსზე იტოვებს 239 მლნ ლარის, ისეთ დებიტორულ დავალიანებას, რომელიც 1996-2010 წლებშია წარმოშობილი და თანხების მიღების ალბათობა აღძრული სისხლის სამართლის საქმეების მიუხედავად ძალიან დაბალია. აუდიტის რეკომენდაციის მიხედვით სამინისტრომ უნდა შექმნას სპეციალური კომისია, რომელიც შესაბამისი დოკუმენტების მოძიებისა და ხანდაზმულობის ვადის გათვალისწინებით დებიტორული დავალიანების მოცულობის კორექტირებას მოახდენს.