20 წლის განმავლობაში ქართული ჯარი არასოდეს არ გამოკვებილა ნედლი, გაუყინავი, ახალი ხორცით. მე ეს პრობლემა მოვაგვარე და ამას იმიტომ არ ვამბობ, რომ ვიღაცამ მადლობა მითხრას, - ამის შესახებ თავდაცვის მინისტრმა, ირაკლი ღარიბაშვილმა „რუსთავი 2“-ის ეთერში განაცხადა.

„მინდა ვისარგებლო შემთხვევით და მხოლოდ და მხოლოდ საზოგადოებისთვის გავაკეთო რამდენიმე განმარტება ჯარისკაცების კვებასთან დაკავშირებით. როგორ საუბრობენ ჩემზე ამას, როცა ჯარში ხორცის და კვების პრობლემა იყო წლების განმავლობაში მოუგვარებელი. 20 წლის განმავლობაში ქართული ჯარი არასოდეს არ გამოკვებილა ნედლი, გაუყინავი, ახალი ხორცით. მე ეს პრობლემა მოვაგვარე და ამას იმიტომ არ ვამბობ, რომ ვიღაცამ მადლობა მითხრას. მე ეს დავისახე მიზნად და გავაკეთე. შეიძლება, ჩემამდე იყო რაღაც პრობლემები, მაგრამ ეს ყველაფერი მე მოვაგვარე. ეს ყველაფერი ჯარმა უნდა შეაფასოს. ჯარი და ჯარისკაცები არის ჩემთვის ჩემი მთავარი მაკონტროლებელი. დაე, მათ განსაზღვრონ ვინ რა შეასრულა და ვინ - არა“, - განაცხადა ირაკლი ღარიბაშვილმა.

მინისტრის თქმით, მისი მთავარი საზრუნავი არის, რომ მაქსიმალური ყურადღება გამოიჩინოს რეალური ქმედებით და არა მხოლოდ ლამაზი სიტყვებით.

„პირველი, რაც მე დავისახე, არის სოციალური მიმართულება, ხელფასების მატება, კარგი სადაზღვევო პაკეტი. ასევე მაინტერესებდა მენახა საშუალო დონის ბაზა და წავედით კოჯორში. ის, რაც ვნახე, იყო აბსოლუტურად მიუღებელი, შოკირებული დავრჩი. მე არ მინდა წინამორბედებზე საუბარი, ეს წლების განმავლობაში დაგროვდა. ყველაფერი რაც დავიწყეთ, ეფუძნება ფართომასშტაბიან კომპლექსურ მიდგომას. მე ვუთხარი ჩემ გუნდს, რომ ჯარისთვის ვაკეთებთ საუკეთესოს. 250 ობიექტის სრული გადაიარაღება ხდება. ყველა ყაზარმა წლის ბოლომდე იქნება დასრულებული“, - განაცხადა ირაკლი ღარიბაშვილმა.

Imedinews.ge