საქართველოდან ირანის მიმართულებით ფრენები ჩვეულ რეჟიმში მიმდინარეობს. ამის შესახებ „კომერსანტს“ თბილისის საერთაშორისო აეროპორტის მმართველ კომპანია Tav Georgia-ში განუცხადეს. მათი განცხადებით, ამ დროისთვის თეირანის მიმართულებით ფრენებს 2 ავიაკომპანია (Taban Airlines და Qeshm Air) ახორციელებს. როგორც Tav Georgia-ში განმარტავენ, ამ ეტაპზე რეისები გაუქმებული არ არის.
რაც შეეხება ერაყის მიმართულებას, თბილისის საერთაშორისო აეროპორტის მმართველ კომპანიაში აცხადებენ, რომ წლების წინ ავიაკომპანია Georgian Airways-ი ახორციელებდა თბილისი -ერმილის მიმართლებით ფრენებს ახორციელებდა. აღნიშნულ რეისზე დაფრინავდა ავიაკომპანია „მაშადიც“. „უკვე წლებია ერაყის მიმართულებით ფრენები თბილისის საერთაშორისო აეროპორტიდან აღარ ხორციელდება“-აცხადებენ Tav Georgia-ში.
Georgian Airways-ის გენერალური დირექტორის რომან ბოკერიას განმარტებით, ავიაკომპანიას პირდაპირი რეისები ირანის მიმართულებით არ აქვს. „სრულდება მხოლოდ ჩარტერული რეისები, რომელიც დამოკიდებულია დამკვეთ კომპანიებზე“-აცხადებს ბოკერია.
შეგახსენებთ, ირანმა სარაკეტო თავდასხმა განახორციელა ამერიკულ ბაზებზე ერაყში, მანამდე კი რამდენიმე დღით ადრე აშშ-ის მიერ ბაღდადის საერთაშორისო აეროპორტში განხორციელებულ სამხედრო ოპერაციას ირანელი გენერალი ყასემ სოლეიმანი ემსხვერპლა. რეგიონში შექმნილი დაძაბული ვითარებით შეშფოთებულები არიან სხვადასხვა ქვეყნის ავიაკომპანიების წარმომადგენლები.
შექმნილი სიტუაციიდან გამომდინატე, მალაიზიის, სინგაპურისა და ჩინეთის ავიახაზებმა განაცხადეს, რომ ისინი თავიდან აირიდებენ ირანის საჰაერო სივრცის გამოყენებას.როგორც სინგაპურის ავიახაზებში განაცხადეს, ისინი ყველა ავიარეისს ირანის საჰაერო სივრციდან სხვა მიმართულებით გადაიტანენ. მსგავსი განცხადება ცოტა ხნის წინ გაავრცელა ჩინეთის ავიახაზებმაც.
ბაჩო ადამია