დაავადებათა კონტროლის ეროვნული ცენტრის არაგადამდებ დაავადებათა დეპარტამენტის ხელმძღვანელის, ლელა სტურუას განცხადებით, კვლევები, რომლებიც კორონავირუსთან ბრძოლაში თამბაქოს ეფექტურობაზე მიუთითებს, მცდარი მეთოდოლოგიით არის ჩატარებული.

მისივე თქმით, თამბაქოს მომხმარებლებში გართულებები, ინტენსიური თერაპიის ბლოკებში მოთავსების მაჩვენებელი და ლეტალური შემთხვევების რიცხვი გაცილებით მაღალია, ვიდრე არამწეველ კოვიდ-პაციენტებში.

„თამბაქოსთან და კორონავირუსთან დაკავშირებით ვრცელდება ინფორმაცია, თითქოს ნიკოტინი და თამბაქოს მოხმარება იცავს ადამიანს კოვიდ-ინფექციისგან. ეს არის მითი, რომელიც არანაირად არ შეესაბამება სიმართლეს. თვითონ მწეველი, თავისი ჩვევით არის ძალიან მაღალი რისკის მატარებელი. ხელი, რომელიც შეიძლება იყოს დაბინძურებული, მას მიაქვს ტუჩებთან და ეს ეხება როგორც ჩილიმს, ასევე ელექტრონულ სიგარეტს. ჩილიმის შემთხვევაში ვითარება კიდევ უფრო გართულებულია, ვინაიდან მოწევა საერთო მილაკიდან ხდება, რაც დაინფიცირების რისკს ზრდის. თუ ადამიანს პირბადე უკეთია, მისი მოხსნა უწევს, რაც ასევე ზრდის რისკს. უამრავი კვლევა ადასტურებს, რომ თამბაქოს მომხმარებლებში გართულებები, ინტენსიური თერაპიის ბლოკებში მოთავსების მაჩვენებელი და ლეტალური შემთხვევების რიცხვი გაცილებით მაღალია, ვიდრე არამწეველ კოვიდ-პაციენტებში. რაც შეეხება ე.წ. ფრანგულ კვლევებს, ისინი მცდარი მეთოდოლოგიით არის ჩატარებული, რის შესახებაც ფრანგი მეცნიერებიც საუბრობენ. მცდარი მეთოდოლოგია გულისხმობს იმას, რომ პაციენტები იყვნენ კლინიკის ექიმები, რომლებშიც მოწევის მაჩვენებელი ისედაც დაბალი იყო. არ იყო განხილული მწვავე და გართულებული შედეგები და ა.შ. რაც ყველაზე მთავარია, კვლევის ერთ-ერთ ძირითად ავტორს აქვს მჭიდრო კავშირი და მრავალწლიანი ურთიერთობა თამბაქოს ინდუსტრიასთან. ამ მცდარი ინფორმაციის გავრცელებამ ძალიან ცუდი შედეგი გამოიღო. სხვადასხვა ქვეყანაში ადამიანებმა გადაწყვიტეს სიგარეტის დიდი რაოდენობით შეძენა. სწორედ ამის აღსაკვეთად საფრანგეთის მთავრობამ ზედმეტი რაოდენობით სიგარეტის გაყიდვა აკრძალა. მოვუწოდებ ყველას, არ დაუჯერონ ან მითს. თამბაქოს მოხმარება ვერ იქნება კარგი ჯანმრთელობისთვის და ვერ დაგვიცავს ინფექციური დაავადებებისგან“, - აცხადებს ლელა სტურუა.

იმედინიუსი