ეროვნებით ირანელმა ჯავად საათიანმა საქართველოში კომპანია S.M 4 Family 2012 წელს დააფუძნა. კომპანია სამშენებლო ინვენტარით დედაქალაქსა და რეგიონებში სხვადასხვა ობიექტებს წლებია ამარაგებს. თუმცა 2019 წელს ბუღალტრის მიერ თანხების მითვისების გამო კომპანიას ფინანსური პრობლემები შეექმნა. რის შემდეგაც სახელმწიფოსთვის გადასახდელი ჯარიმებისა და საურავების თანხა კომპანიას 200 პროცენტით გაეზარდა.
ინვესტორი თითქმის ერთი წელია შემოსავლების სამსახურთან და პრემიერის აპარატთან ცდილობს მიაღწიოს საგადასახადო შეთანხმებას, თუმცა ამ დრომდე უშედეგოდ.
„კომერსანტი“ უცხოელი ინვესტორის წარმომადგენელსა და ადვოკატს ესაუბრა, რომლებიც განმარტავენ, რომ ჯავად საათიანს ამჟამად დაყადაღებული აქვს ყველა ქონება და მიუხედავად იმისა, რომ მან თანხის ნაწილი გადაიხადა, სახელმწიფო სტრუქტურები არავითარ დათმობაზე არ მიდიან და თანხის ერთიანად გადახდას სთხოვენ.
„ინვესტორს ჰყავდა ბუღალტერი , რომელიც კომპანიის დაარსების დღიდან მუშაობდა S.M 4 Family-ში. მას შემდეგ, რაც მან კომპანიის თანხები მიითვისა, ბუღალტერის მიმართ აღიძრა სისხლის სამართლის საქმე და ბუღალტერი ბრალდებულის სახით პასუხისგებაში იქნა მიცემული. ირანელი ინვესტორი აღმოჩნდა მისი დაქირავებული ბუღალტრის მიერ მოტყუებული.
მიუხედავად ბუღალტრის დანაშაულისა და მითვისებული თანხებისა, საგადასახადო შემოსავლების სამსახურმა ინვესტორის ორგანიზაციას ამ მითვისებული თანხების ბიუჯეტში გადაუხდელობის გამო დაარიცხა გადასახადის გადახდა. მათ შორის სანქცია-საურავები და ჯარიმები, რომელთა მოცულობამ 200 000 ლარს გადააჭარბა.
ირანელ ინვესტორს ჰქონდა მცდელობა მიეღწია საგადასახადო შეთანხმებისთვის. სახელმწიფო სტრუქტურებს სთხოვდა ჯარიმების შემცირებას, ხოლო ძირი თანხის გადახდაზე თანახმა იყო. შემოსავლების სამსახურმა შეთანხმების გაფორმებაზე უარი უთხრა რამოდენიმეჯერ და თანხების ერთიანად გადახდას მოსთხოვა. ინვესტორი იძულებული გახდა ცოტა ხნის წინ წერილი პრემიერ მინისტრისთვის მიეწერა, რათა დაკისრებული კატასტროფული ჯარიმები მოეხსნათ და იმედი აქვს გარკვეული რეაგირების. „მას არ დაუმალავს გადასახადი, მისმა ბუღალტერმა ფარულად მიითვისა თანხები და დანაშაული ჩაიდინა, გადავიხადეთ ძირითადი დავალიანება და ჯარიმები მაინც მოგვიხსნან„ - განმარტავს კომპანიის წარმომადგენელი ია ტრაპაიძე.
ამჟამად, ჯავად საათიანის კომპანიას სულ სამი ტიპის თანხა აქვს გადასახდელი -ძირი თანხა 5 000 ლარი, ამ ძირ თანხაზე დაკისრებულია 52 ათასი და 127 ათასი, ჯამურად 200 პროცენტიანი ჯარიმა. გარდა ამისა კომპანიას 27 ათასი ლარი უკვე გადახდილი აქვს, ითხოვს საგადასახადო შეთანხმებას ჯარიმების მოხსნაზე და ასევე ქონებაზე და ანგარიშებზე დადებული ყადაღის მოხსნას, რაც არ დაუკმაყოფილდა.
"მაშინ, როცა ინვესტორები სანთლითაა საძებნელი, იმის მაგივრად რომ ხელი შეუწყონ ასეთ ვითარებაში, უარს იღებს ყველა საშეღავათო მოთხოვნაზე.
ჯავად საათიანი რამდენიმე ქონებას ფლობს საქართველოში და აპირებდა დამატებითი ინვესტიციების განხორციელებას. თუმცა ამ ეტაპზე მიწაც დაყადაღებული აქვს სხვა ყველანაირ ქონებასთან ერთად. იმის ნაცვლად რომ საგადასახადო შეთანხმებას მიაღწიოს შემოსავლების სამსახურთან, ხელი შეუწყონ და არ გააქციონ ინვესტორი ქვეყნიდან, ყველაფერი პირიქით ხდება. ის ითხოვს საურავებისა და ჯარიმების მოხსნას, დარჩენილი ძირ თანხას კი გადაიხდის.
იმედი გვაქვს პრემიერი მაინც გაითვალისწინებს ამ სიტუაციას და დაავალებს შემოსავლების სამსახურს შესაბამისი ზომების მიღებას,“ - ამბობს ია ტრაპაიძე.