თაფლისგან დამზადებული პროდუქტები - თაფლიანი წყალი, ლუდი, ძმარი და სხვა ნატურალური პროდუქტები დაახლოებით 2 წელია, ქართულ ბაზარზე ZZip-ის ბრენდით გამოდის. წარმოება თავდაპირველად თაფლიანი წყლით დაიწყო. როგორც კომპანია ,,ზზიპის“ დამფუძნებელი, მეწარმე ლუკა სულაბერიძე ,,კომერსანტთან“ ამბობს, მისი მიზანი იყო ისეთი პროდუქტის შექმნა, რომელიც ადამიანებს ჯანსაღი ცხოვრების წესის დანერგვაში დაეხმარებოდა და პარალელურად მეფუტკრეობის განვითარებასაც შეუწყობდა ხელს.

„ქართული თაფლიანი სასმელების უნიკალურობა ისაა, რომ 100%-ით ნატურალურია და არანაირი ქიმიური დანამატი არ გააჩნია. იქიდან გამომდინარე, რომ თაფლიანი წყლის ვარგისიანობა 24 საათს არ აღემატება, შეიქმნა პროდუქტი, რომელიც სრულად ნატურალურია და  შენახვის ერთწლიანი ვადა აქვს მცირე დეტალის დახმარებით - ეს არის  თაფლით სავსე ბოთლის თავსახური, რომლის გახსნის შემდეგ თაფლი წყალში იღვრება ანუ თაფლი და წყალი ერთმანეთისგან არის განცალკევებული, რაც იძლევა იმის საშუალებას, რომ თაფლმა არ დაკარგოს თავისი სასარგებლო თვისებები და ამავდროულად მისი ვადა იყოს ხანგრძლივი. ამ ეტაპზე ,,ზზიპის“ ბრენდით ბაზარზე 7 დასახელების თაფლი იყიდება. ამავე დროს, 4 განსხვავებული არომატის წყალი და 2 სახის თაფლიანი ძმარი.

ვფლობთ 3 კაფე-მაღაზიას, მათგან ერთ-ერთი განთავსებულია ახალ სავაჭრო სივრცეში ,,ბაზარი ორბელიანზე“, სადაც მომხმარებელს ,,ზზიპის“ ყველა პროდუქტის ყიდვა შეუძლია, ასევე ადგილობრივი სუპერმარკეტების დახლებზეც, საკმაოდ ფართო სეგმენტს მოვიცავთ“, - ამბობს ლუკა სულაბერიძე ,,კომერსანტთან“.

ახალგაზრდა მეწარმე გეგმავს პროდუქტის გატანას ექსპორტზეც და ვარაუდობს, რომ პირველი პარტია ევროპისა და ახლო აღმოსავლეთის ქვეყნების მიმართულებით წლის ბოლომდე გავა.

,,ჩვენი პროდუქტის ანალოგი ქართული ბაზრისთვის იშვიათია, ამიტომ ვგეგმავთ საქართველოს ბაზრის სრულად ათვისებას და შემდეგ უკვე პროდუქციის ექსპორტზე გატანას. ამ გამოწვევის დაძლევაში დამეხმარა სააგენტოს ექსპორტის მენეჯმენტის კურსი, რომელიც ჩემთვის და ჩემი კომპანიის განვითარებისთვის მნიშვნელოვანი იყო.  ვფიქრობ, წლის ბოლომდე ამ გამოწვევისთვის მზად ვიქნებით. ექსპორტის კუთხით ევროპა ყველაზე მიმზიდველია, თუმცა ვგეგმავთ ახლო აღმოსავლეთის ქვეყნებთან, ასევე თურქეთთან თანამშრომლობას, სადაც ჩვენი ნაწარმის შეტანას ვგეგმავთ“, - ამბობს ლუკა  სულაბერიძე.

ცნობისთვის, „ზზიპი“ თაფლის შემცველი პროდუქტების მწარმოებელი კომპანიია. ადგილობრივებისგან შეძენილი თაფლი ჩამოსხმამდე ლაბორატორიულ შემოწმებას გადის.

საწარმო ჩარგალში მდებარეობს და ამ ეტაპზე 20-მდე ადამიანს ასაქმებს.

მარი ჩიტაია