საქართველოს მეცხრე მოწვევის პარლამენტს უფლებამოსილების ვადა 31 ოქტომბერს ეწურება. ოთხი წლის წინ, 2016 წელს წინასაპარლამენტო არჩევნების დროს, ფრაქციამ „ქართული ოცნება-დემოკრატიული საქართველო“ მოსახლეობას სოციალური კეთილდღეობა და სწრაფი განვითარება დაპირდა. თუმცა, მმართველობიდან ოთხი წლის შემდეგ მოსახლეობა შიმშილობის ზღვარზეა, საქართველოში ფასების საერთო დონე კი რეკორდულად იზრდება. „კომერსანტი“ დაინტერესდა ამ დროის განმავლობაში რა გააკეთეს მმართველი პარტიის დეპუტატებმა მთავარი დანაპირების - „კეთილდღეობის და სწრაფი განვითარების“ შესასრულებლად, რის გამოც ოთხი წლის წინ ამომრჩევლებს ხმას სთხოვდნენ. როგორ აფასებენ საკუთარ სიტყვას და საქმეს დეპუტატების სავარძლებიდან და რას ეუბნებიან ამომრჩევლებს.

„კომერსანტი“ აგრძელებს სტატიების ციკლს, სახელწოდებით — რა წვლილი შეიტანა ქართველი ხალხის კეთილდღეობასა და სწრაფ განვითარებაში თითოეულმა დეპუტატმა ამ ოთხი წლის განმავლობაში.

საქართველოს პარლამენტის ჯანდაცვის კომიტეტის წევრს, ლევან ბეჟანიძეს მიაჩნია, რომ  ბოლო წლებში დაპირება „კეთილდღეობა და სწრაფ განვითარებას“ სიტყვა „სწრაფი“ დააკლდა, თუმცა სტაბილურობით კმაყოფილია.

„სტაბილურობა ხომ იყო ქვეყანაში? ხომ იყო განვითარება -  შეიძლება დაბალი, მაგრამ იყო. შემცირდა სიღარიბეც, დიდი წინსვლები არა, მაგრამ რაც არის ხომ მცირე ნაბიჯებით მივიღეთ. დემოკრატიის მხრივ არის დიდი და სერიოზული მიღწევები ქვეყანაში. მეც პარლამენტში ვმუშაობდი და ჩემი წვლილი შევიტანე ამ ყველაფერში.  ერთობ კარგი  კანონპროექტები იყო იყო, როგორიცაა შრომის კოდექსი, კანონები, რაც წარმოებას უწყობს ხელს, ბიზნესს უწყობს ხელს. ასე რომ, კმაყოფილი ვარ. სიღარიბე არ მომსპარა ქვეყანაში, მაგრამ შემცირდა. მთავარია სტაბილურობა, რომ მერე განვითარება გვქონდეს. სწრაფს ვერ დავარქმევდით, მაგრამ იყო განვითარება,“ - ამბობს დეპუტატი.

პარლამენტის განათლების კომიტეტის თავმჯდომარე გენადი მარგველაშვილი თავის კომპეტენციაში არსებული სფეროს მთავარ გამოწვევად კვალიფიციური კადრების ქვეყნიდან გადინებას მიიჩნევს, თუმცა აღნიშნავს, რომ განათლებაში განხორციელებული ცვლილებები, რაც ჯერ კიდევ პროცესშია, მოგვიანებით გამოიღებს შედეგს.

„ძალიან ბევრი ნაბიჯი გადაიდგა კეთილდღეობისთვის და ბევრი რჩება გამოწვევაც, თავი არ უნდა მოვიტყუოთ. მაგრამ არც ის უნდა ვიძახოთ, რა გვეშველება. ნებისმიერ დროს, ამ გამოწვევებს სჭირდება ადეკვატური პასუხი. მე შემიძლია განათლების მიმართულებაზე ვისაუბრო, სადაც ბევრია გასაკეთებელი და ეს გრძელვადიან პერსპექტივაში გამოჩნდება.  ბავშვი სკოლაში არ უნდა მიდიოდეს იმისთვის, რომ ფაქტები დაიმახსოვროს, არამედ შემქმნელი გახდეს ამოცანის, რაც სჭირდება ჩვენს ქვეყანას სამომავლოდ. როგორც ჩანს, ეს საკმაოდ შრომატევადი სამუშაოა და მოითხოვს დროს. ამ მიმართულებით ბევრი რამ გაკეთდა -  პედაგოგების გადამზადება, ხელფასების ეტაპობრივი ზრდა და ასე შემდეგ. ადრე არავის უდოდა სკოლაში პედაგოგად წასვლა, ახლა ძალიან ბევრს უნდა. უნდა დაიხვეწოს პროგრამები, ინფრასტრუქტურა. მნიშვნელოვანი პრობლემა იყო მუდმივად ტვინების გადინება, როცა წარმატებული კადრები ჰარვარდის, პრინსტონის უნივერსიეტებს ირჩევდნენ. ახლა არის იმის შანსი, რომ ჩვენთან ქუთაისის უნივერსიტეტებში დასაქმდნენ გონიერი ახალგაზრდები.

რაც შეეხება ონლაინ სწავლებებს, ეროვნული სასწავლო გეგმის ერთერთი კომპონენტია მისი გაციფრულება. სამწუხაროა, რომ პედაგოგებზე უკეთ შეიძლება მოსწავლემ იცოდეს პროგრამები.  პანდემიიდან გამომდინარე ვალდებული ვართ, რომ ასეთ რეჟიმში ვიყოთ. ვიცი ყველას მონატრებული აქვს აუდიტორიები და კლასები, პრაქტიკული სამუშაოები. დარწმუნებული ვარ მსოფლიო ამ გამოწვევას გაუმკლავდება. ეს პერიოდი გაციფრულების თვალსაზრისით გარკვეულწილად დაგვეხმარება, ეს უნდა გამოვიყენოთ ჩვენს სასარგებლოდ,“ - ამბობს გენადი მარგველაშვილი.