„პანდემიის მიუხედავად, რა თქმა უნდა, ბევრად მეტის გაკეთება შეიძლებოდა, ვიდრე გაკეთდა. მე ვგულისხმობ ეკონომიკის გზას, რასაც უნდა მოჰყოლოდა სიღარიბის აღმოფხვრა უფრო დაჩქარებული ტემპებით. თუ საშუალოდ გვქონდა 4 -5 პროცენტიანი, ან 3.5 პროცენტიანი ზრდა ეკონომიკაში, ამ ზრდის გაორმაგება სწორი ეკონომიკური პოლიტიკის შემთხვევაში სავსებით შესაძლებელი იყო,“ - ასე აფასებს 2020 წლის დასასრულს, ეკონომიკის ყოფილი მინისტრი გიორგი ქობულია მმართველი გუნდის ეკონომიკურ პოლიტიკას.
ცნობისთვის, საქართველოში ღარიბი ადამიანების რიცხვმა 1 მლნ-სს გადააჭარბა და ბოლო ერთ წელიწადში სახელმწიფოს მხრიდან საარსებო შემწეობას დაახლოებით, 23,8%-ით მეტი ადამიანი საჭიროებს.2020 წლის ნოემბერში უკიდურესად გაჭირვებულთა კატეგორიის ადამიანების რიცხვი წინა წლის ანალოგიურ პერიოდთან შედარებით 99 304 ადამიანითაა გაზრდილი..
წლის შეჯამებისას, გიორგი ქობულია მთავრობის ეკონომიკური პოლიტიკის მიღმა დარჩენილ ისეთ სექტორებზე აკეთებს აქცენტს, რომელთაც მისი აზრით, ეკონომიკური ზრდის გაორმაგება უნდა გამოეწვია, მათ შორისაა ხელისუფლებისა და მუშა ხელის კვალიფიკაციის ამაღლება და სწორი მოტივაცია, ინსტიტუციური რეფორმები და სტრატეგიულად მნიშვნელოვანი სექტორების განვითარება.
„ძირითადად, აქცენტების გაკეთება საჭიროა სისტემურ დაბროკლებებზე, ისეთებზე როგორიცაა - მუშა ხელის კვალიფიკაციის ამაღლება, ბიუროკრატიული ბარიერების აღმოფხვრა ჩვენს ხელისუფლებაში, ხელისუფლების და მთავრობის კვალიფიკაციის ამაღლება და მათი სწორი მოტივაცია - ასეთი ტიპის სისტემურ ღონისძიებებზე მაქვს აქცენტი. ასევე, რა თქმა უნდა, ინსტიტუციური რეფორმების წარმატებით დასრულება აუცილებელია, როგორიცაა სასამართლოს რეპუტაციის ამაღლება, მიწის რეფორმის დასრულება და ამ ყველაფერს მოჰყვებოდა უფრო სწორი ნაბიჯები ხელისუფლების მხრიდანაც, რომ ხელი შეეწყო ჩვენი სტრატეგიული სექტორების განვითარებისთვის. როგორც ვიცით, ენერგეტიკის სექტორში პრაქტიკულად არაფერი გაკეთებულა, კვების მრეწველობაში შეიძლებოდა ბევრად მეტის გაკეთება, საექსპორტო მიმართულებების განვითარება შეიძლებოდა ბევრად უფრო სწრაფად. მაგალითად, შეგვეძლო მეტი ყურადღება დაგვეთმო ევროპასთან საკონტეინერო კავშირის დამყარებაზე და ასე შემდეგ.
მომავალი წელი იქნება მძიმე იმიტომ, რომ ინფექციის კონტროლზეა დამოკიდებული არა მხოლოდ ქვეყანაში, არამედ გლობალურად. ჩვენ ტურიზმზე ვართ დამოკიდებული და მნიშვნელოვანია, რომ ჩვენს პარტნიორ ქვეყნებშიც მოხდეს პანდემიის გავრცელების კონტროლი, რომ ჩვენ მივიღოთ ტურისტული ნაკადები, რაც იქნება ყველაზე სწრაფი საშუალება, რომ ჩვენი ეკონომიკა გავაჯანსაღოთ,“ - განმარტავს გიორგი ქობულია.