სებ-ის პოლიტიკა აშშ დოლარის შესყიდვასთან დაკავშირებით მიმაჩნია, რომ არის სწორი, - აცხადებს „კომერსანტის“ მმართველი პარტნიორი და „ჯეოქეისის“ მკვლევარი გიორგი აბაშიშვილი, რითაც ის საქართველოს ეროვნული ბანკის სავალუტო აუქციონზე სებ–ის მიერ 40 000 000 აშშ დოლარი შესყიდვის ფაქტს გამოეხმაურა, რომლის საშუალო შეწონილმა გაცვლითმა კურსმა 2.7096 შეადგინა.
აბაშიშვილი ამბობს, რომ სწორედ დღეს არის დრო რეზერვების შევსების.
„ზოგადად უნდა გავითვალისწინოთ ერთი რამ, რომ როგორც ბიზნესისთვის ისე მოსახლეობის გარკვეული ნაწილისთვის, როგორც ეროვნული ვალუტის კურსის სწრაფი გამყარება, ისე სწრაფი გაუფასურება პრობლემურია, ანუ არაპროგნოზირებადია. შესაბამისად, დღეისათვის, საჭიროა სიტუაციის დასტაბილურება. ნამდვილად არ მიმაჩნია, რომ დღევანდელი და დღემდე დაფიქსირებული კურსი ასახავს იმ რეალურ წონასწორობას, რომელიც უნდა იყოს და რომელიც უნდა არსებობდეს ბაზარზე.
სწორედ ამიტომ ვფიქრობ რომ სებ-მა სწორი გადაწყვეტილება მიიღო. სწორედ ახლა არის დრო სავალუტო რეზერვების შევსების და ამ პერიოდში, ამ დროის გამოყენება არის აუცილებელი. ყოველთვის ვისმენთხოლმე რატომ არ ხარჯავს სებ-ი რეზერვებს და ახლა სამწუხაროდ არავისგან არ გვესმის ინფორმაცია, ან მოწოდება თუ რატომ არ აგროვებს სებ-ი რეზერვებს. მინდა ღიად ვთქვა, რომ ახლა არის დრო და აუცილებლობა, რომ რეზერვების დაგროვების და ალბათ სებ-ს უფრო ზუსტი გათვლა აქვს ახალ წონასწორობასთან დაკავშირებით. მაგრამ მე მგონია, რომ გარკვეული პერიოდის განმავლობაში სებ-მა უნდა გააგრძელოს უცხოური ვალუტის შესყიდვა, აცხადებს აბაშიშვილი.
აღსანიშნავია, რომ 24 მაისიდან დღემდე სებ-მა ბაზრიდან 80 მლნ დოლარი ამოიღო.