რუსეთიდან საქართველოში ფულადი გზავნილების შეიძლება შემცირდეს, ხოლო მომსახურების საკომისო გაძვირდეს. ასეთი საფრთხე საერთაშორისო საგადახდო სისტემა SWIFT-დან რუსული ბანკების სავარაუდო გათიშვას უკავშირდება, რაზეც სამშაბათს CNN წყაროებზე დაყრდნობით იუწყება. ასეთი პუნქტი შესაძლოა შევიდეს სანქციების იმ პაკეტში, რომელსაც ვაშინგტონი მოსკოვს უკრაინაში შესაძლო შეჭრის გამო უმზადებს.
ცხადია, სანქციის ამოქმედება სერიოზულ საფრთხეს შეუქმნის რუსეთიდან ფულად გზავნილებს. საქართველო წლების განმავლობაში ყველაზე მეტ ფულად გზავნილებს, ქვეყნების მიხედვით, სწორედ რუსეთიდან იღებს.
ფინანსური ბაზრის მკვლევარი, ანალიტიკოსი ნიკა შენგელია ვარაუდობს, რომ სანქციების დაკისრების შემთხვევაში რუსული ახალი საგადახდო სისტემა ინტეგრირებას მოახდენს რამდენიმე დიდ ჩინურ და ევროპულ ბანკებთანაც, რის შესაძლებლობასაც მას მსხვილი ექსპორტიორი ქვეყნის სტატუსი აძლევს.
,,სანქციების დაწესებაზე აშშ-ის მხრიდან საუბარი იყო 2014 წელსაც და ეს საკითხი წელსაც გააქტიურდა. რამდენადაც ჩემთვის ცნობილია, Mir-ის გადარიცხვის სისტემა მალე ჩინეთის ბანკებთანაც სინქრონიზირდება. ანუ, თუ გაითიშება SWIFT-ის სისტემა, ყველა შემთხვევაში რუსული ახალი საგადასახდელო სისტემა ინტეგრირებული იქნება რამდენიმე დიდ ჩინურ და ევროპულ ბანკებთანაც, რადგანაც ენერგომატარებლების - გაზისა და ნავთობის ერთ-ერთი მსხვილი ექსპორტიორია მსოფლიოში. თუკი მას დაუწესებენ სანქციებს, მაშინ გადაუკეტავს გაზს ევროპას, რაც ზამთრის პირობებში არავის უნდა. სიახლე არ არის, რომ თავად ამერიკული კომპანიები ყიდულობენ ურალ ნეფტის პროდუქციას - მძიმე ნავთობპროდუქტებს და თუკი მყიდველის მხრიდან არ განხორციელდება ფულადი ტრანზაქციები, ისე ამ შესყიდვებს ვერ განახორციელებენ“, - განმარტავს ნიკა შენგელია ,,კომერსანტთან“.
რაც შეეხება საქართველოს მოქალაქეებს, ემიგრანტებს, შენგელიას თქმით, გარკვეული პრობლემა შეექმნებათ გადმორიცხვასთან დაკავშირებით, კერძოდ, ფულადი ტრანზაქციები რუსეთიდან შემცირდება და მომსახურების საკომისიოებიც, სავარაუდოდ, გადაიხედება.
„პირველ რიგში, დაზარალდება რუსეთი, რადგან ნედლეული და სხვა სახის შესყიდვები რომ დასჭირდეს ევროპიდან, თანხის გადარიცხვას ვერ შეძლებს. თუმცა ეს დროებითია, ალტერნატიული შესაძლებლობა გამოჩნდება, თანამედროვე ტექნოლოგიები ამის საშუალებას იძლევა. შესაბამისად, SWIFT-ის სისტემა საბანკო ან სხვა სისტემით ჩანაცვდება, რომელიც მომავალში აუცილებლად გამოჩნდება. როგორც არ უნდა მოხდეს, შემცირდება გადარიცხვები მოცულობა, მაგრამ საშუალოვადიან პერიოდში პრობლემა მოგვარდება. საკომისიოები ამ ეტაპზე თუ 1-1,50 %-ის ფარგლებშია რუბლში, შეიძლება 2%-მდე გაიზარდოს, რითაც კომერციულ ბანკებს შემოსავალი გაეზრდება“, - აცხადებს ნიკა შენგელია.
ფინანსური ბაზრის მკვლევარი ფიქრობს, რომ გავრცელებული განცხადება უფრო გამაფრთხილებელი ხასიათისაა და, სავარაუდოდ, არ ამოქმედდება. მით უმეტეს, როგორც შენგელია აცხადებს, ამით ევროპა დგება რეალური საშიშროების წინაშე — ცისფერი ნაკადის გარეშე დარჩეს.
როგორც CNN-ის მიერ გავრცელებული ინფორმაციიდან ირკვევა, რუსეთისთვის სანქციების ახალი პაკეტის საკითხზე ბაიდენის ადმინისტრაცია ევროპელ პარტნიორებთან მოლაპარაკებებს აწარმოებს და ქმედებების კოორდინირების იმედი აქვს.
ერთ-ერთი ანონიმური მაღალჩინოსნის თქმით, იმ შემთხვევაში, თუ რუსეთი უკრაინას თავს დაესხმება, მის წინააღმდეგ ისეთი მკაცრი სანქციები დაწესდა, როგორც ჯერ არც ერთი ქვეყნის მიმართ - ირანის და ჩრდილოეთ კორეის გარდა.
მარი ჩიტაია