ჭიათურის რაიონში, სოფელ სვერში არსებული სათავგადასავლო ბანაკი საქართველოში ჩარჩენილი ტურისტებისა და ფრილანსერებისთვის ერთერთ მიმზიდველ ადგილად იქცა. ბანაკის გახსნის იდეა ექსტრემალური სპორტისა და მეკლდეურების ჯგუფს გაუჩნდა. ეს არის პიონერული იდეა, რომელიც თავდაპირველად მოგზაურებისთვის იყო გათვლილი, თუმცა ამჟამად პანდემიისა და ფასების რეგულირებამ ადგილობრივების დაინტერესებაც გამოიწვია. კლდეზე ცოცვა, კარვების გაშლა , ველოტურები, ტბაზე გასეირნება - ჭიათურაში ეს ყველაფერი ლევან გოგოლაძემ ბიზნესად ერთი წლის წინ აქცია.
„სვერის სათავგადასავლო ბანაკის კონცეფცია არის ის, რომ სთავაზობს ადამიანებს არა მარტო სანახაობას და დათვალიერებას არამედ აქტიური ჩართულობით თავგადასავლების ძიებას და ამ კუთხით საინტერესო დასვენებას, რაც დაკავშირებულია ფიზიკურ აქტიოვბასთან . ჭიათურა იძლევა იმის საშუალებას, რომ მსგავსი წამოწყება განავითარო. ტურისტებს სისტემურ სერვისს ვთავაზობთ - აქ არის ხელმისაწვდომი სხვადასხვა აქტივობა, ტბის ტურები, კანიონინგის ტურები, კლდეზე ცოცვის ტურები, ისტორიული ადგილების მონახულება, ველოტურები და მღვიმის ტურები - ყველაფერი ეს არის სვერის სათავგადასავლო ბანაკიდან უახლოეს მანძილზე და არ გვიწევს ტურისტის შორს წაყვანა. აქამდე ბიზნესის გათვლა იყო აქტიური ცხოვრების მოყვარული ადამინების მოზიდვა, პირველ რიგში კი უცხოელების. შემდეგ პანდემიამ დაგვანახა ის, რომ პოზიციონირება უნდა შეგვეცვალა და გადავერთეთ ქართველ მომხმარებელზე და დავამატეთ აქტივობები ბანაკშიც და არა მხოლოდ ექსტრემალურ ადგილებში. ფასები პანდემიის შემდეგ გავყავით სამზე და მოვარგეთ ქართულ ბაზარს. ჩვენ კომერციული ინტერესები გვერდზე გადავდეთ და ახლა ჩვენი სურვილია ამ ყველაფრის პოპულარიზაცია მოვახდინოთ. ჩამოდიან ოჯახები, უცხოელები, ადგილობრივი ან ჩარჩენილი ტურისტები. ყველას უკვირს რომ ჭიათურაში ეს პოტენციალი არსებობს,“- განმარტავს სვერის სათავგადასავლო ბანაკის დამფუძნებელი ლევან გოგოლაძე.
ბანაკმა რამდენიმე დღის წინ ტურიზმის ეროვნული ადმინისტრაციის მიერ ორგანიზებულ მედიატურს უმასპინძლა, სადაც ბანაკის დამფუძნებლებმა უსაფრთხოების ყველა წესის დაცვით მოახდინეს ყველა აქტივობის მედიისთვის გაცნობა.
მარიამ მორგოშია