სუსტი ლარის პოლიტიკა საქართველოსთვის მომგებიანი არ აღმოჩნდა. ამის შესახებ უკვე ბიზნესმენებიც ხმამაღლა ალაპარაკდნენ. ეროვნული ბანკის მიდგომას აკრიტიკებენ ანალიტიკოსებიც და აცხადებენ, რომ ამ მხრივ არსებული პოლიტიკა შესაცვლელია.
ბიზნესმენი, „რედიქს ჯგუფის“ მფლობელი ლაშა პაპაშვილი ლარის კურსის სტაბილურობასთან დაკავშირებით ეროვნული ბანკის პოლიტიკას კიდევ ერთხელ უპირისპირდება და აცხადებს, რომ სებ-ის ინტერვენციები მოჩვენებითია.
„ეროვნული ბანკის მიერ სავალუტო რეზერვების გაყიდვების პოლიტიკა რომ არაეფექტურია, ამას ადასტურებს მცირე და საშუალო ბიზნესის მდგომარეობა, რომელიც დღეს მძიმე სიტუაციაშია”, - განაცხადა ბიზნესმენმა და დასძინა, რომ მთავრობამ და ეროვნულმა ბანკმა ყველაფერი უნდა გააკეთონ, რათა პანდემიის პერიოდი მაინც შედარებით მყარი ლარით გადავიაროთ.
„ბოლო 2 წლის განმავლობაში ეროვნული ბანკისა და ეკონომიკური ბლოკის მინისტრების საყურადღებოდ მინდა ვთქვა, რომ კურსთან მიმართებაში მათი პოლიტიკა აბსოლუტურად კოლაფსშია. სუსტი ლარის პოლიტიკამ არ გაამართლა და დაუშვებელია ამის ასე გაგრძელება. ყველა ღონე უნდა იხმაროს ხელისუფლებამ, მათ შორის უნდა ხარჯონ რეზერვები, რომ პანდემიის პერიოდი მაინც შედარებით მყარი ლარით გადავიაროთ.
სამწუხაროდ, ეროვნული ბანკის ინტერვენციები მოჩვენებითია, ერთი ხელიდან გამოდის ლარი ბაზარზე, ანუ იბეჭდება მეტი ლარი და მისი სტერილიზაცია არ ხდება, ანუ ადეკვატური დოლარი არ იყიდება. ეს მოჩვენებითია. არ ვიცი, რატომ უშვებს ამას მთავრობა, მაგრამ ეროვნული ბანკი რომ შეცდომაშია, ეს ფაქტია. ეს ეტყობა ბიზნესებს იმიტომ, რომ უკიდურესად მძიმე მდგომარეობაშია მცირე და საშუალო ბიზნესი“, - აღნიშნა „საქმის კურსში“ ბიზნესმენმა.
ეროვნული ბანკის სწორი პოლიტიკა განსაკუთრებით მნიშვნელოვანია ასეთ კრიზისულ ვითარებაში, როდესაც ყოველმხრივ პრობლემებია. ახალგაზრდა ფინანსისტთა და ბიზნესმენთა ასოციაციის ანალიტიკოსი გიორგი კაპანაძე ერთ-ერთი მათგანია, ვინც ამ მოსაზრებას იზიარებს და აცხადებს, რომ აუცილებელია, ქვეყნის ეროვნული ვალუტა მყარი იყოს, რაც როგორც ბიზნესსა და ეკონომიკას, ისე მოსახლეობასაც დაეხმარება.
„ზოგადად, ეროვნული ვალუტის სტაბილურობა რომ აუცილებელია და კურსის მსგავსი მერყეობა და გაუფასურება რომ არ უნდა იყოს ქვეყანაში, ბუნებრივია, ამ ყველაფერს ვეთანხმები. ბიზნესისთვის, ეკონომიკისა და მოსახლეობისთვის მნიშვნელოვანია, რომ ქვეყანაში გვქონდეს სტაბილური ეროვნული ვალუტა. რაც უფრო ხშირად იქნება რყევა და კურსის გაუფასურება, მით უფრო რთულ ვითარებაში იქნება ბიზნესი თუ წარმოება. ბიზნესმენები ყოველთვის საუბრობენ იმაზე, რომ მნიშვნელოვანია ქვეყანაში მყარი ეროვნული ვალუტის არსებობა.
ეროვნული ბანკი ამბობს, რომ ინფლაცია ნორმის ფარგლებშია, მაგრამ ჩვენს ქვეყანაში პროდუქციის, დაახლოებით, 60-70% იმპორტირებულია და, შესაბამისად, კურსის მერყეობა და გაუფასურება აისახება ფასებსა და იმ პროდუქტზე, რომელსაც მოსახლეობა ყიდულობს. სწორედ ამიტომ მე ვეთანხმები ამ მოსაზრებას და მიმაჩნია, რომ ქვეყანაში აუცილებლად გვჭირდება მყარი ეროვნული ვალუტა, რაზეც უნდა იზრუნოს სებ-მა.
მყარი ლარი არა მარტო პანდემიის პირობებში, არამედ ისედაც მნიშვნელოვანია, რადგან ეს გარემოება ბიზნესს სტაბილურობის გარანტიას აძლევს და უქმნის იმის საფუძველს, რომ თავიანთი საქმიანობა გააგრძელონ.
დღევანდელი ტიპის ინტერვენციები არ არის ეფექტური. აუცილებელია უფრო აქტიური მოქმედებები სავალუტო ბაზარზე. საჭიროების შემთხვევში მუდმივად უნდა ხდებოდეს დოლარის მასის მიწოდება, არ ვგლისხმობ, რომ მაინცდამაინც ძალიან ბევრი დოლარი იყოს მიწოდებული. ინტერვენციები უნდა ხორციელდებოდეს მუდმივ რეჟიმში, როგორიც სებ-ს ჰქონდა პანდემიის საწყის ეტაპზე”, - განაცხადა გიორგი კაპანაძემ „რეზონანსთან”.
2020 წლის განმავლობაში ეროვნულმა ბანკმა ლარის გაცვლითი კურსის მერყეობის შესარბილებლად 22 სავალუტო ინტერვენცია განახორციელა და 747.2 მილიონი აშშ დოლარი გაყიდა. 17 ნოემბრის ვაჭრობის შედეგად, საქართველოს ეროვნული ვალუტა გაუფასურდა. ამჟამად ერთი დოლარის ღირებულება 3.3021 ლარია, ხოლო ევროსთან მიმართებით გაცვლითი კურსი 3.9209 ლარის ნიშნულზეა.
resonancedaily.ge