მთავრობამ კორონავირუსის გავრცელების საპრევენციო ღონისძიებების ფარგლებში არაერთი  გადაწყვეტილება მიიღო.მათ შორის კაფეებს, რესტორნებსა და ბარებს რეკომენდაცია ეძლევათ, დროებით შეზღუდონ მოქალაქეების უშუალო მომსახურება და აამოქმედონ მხოლოდ ე.წ. მიტანის სერვისები. „კომერსანტი“ დაინტერესდა, როგორ გაიზარდა ბოლო პერიოდში მოთხოვნა ადგილზე მიტანის სერვისზე და რამდენად აქვთ კომპანიებს რესურსი გაუმკლავდნენ ახალ გამოწვევას.

„გლოვოს“ მარკეტინგის ანალიტიკოსმა ნათია ლიპარტელიანმა „კომერსანტთან“ აღნიშნა, რომ ბოლო პერიოდში მიწოდების სერვისზე მოთხოვნა საგრძნობლად გაიზარდა, განსაკუთრებით ხილ-ბოსტანსა და იმუნიტეტის გამაძლიერებელ მედიკამენტებზე.

„მოცემულმა ვითარებამ რადიკალურად შეცვალა ჩვენი სამუშაო გარემო. მოთხოვნა ძალიან გაიზარდა. თუმცა, ამისთვის მზად აღმოვჩნდით. როგორც კურიერების თვალსაზრისით ასევე ტექნიკურად. კურიერების აყვანა ყოველდღიურად ხდება და მათი გადამზადება ონლაინ მიმდინარეობს. გაზრდილია მოთხოვნა სურსათზე, მათ შორის ხილ-ბოსტნეულზე და მედიკამენტებზე, ძირითადად, იმუნიტეტის გამაძლიერებლებსა და სადეზინფექციო საშუალებებზე. რაც შეეხება ჩვენს პარტნიორ კვების ობიექტებს, ვცდილობთ მათაც შევუწყოთ ხელი და ჩვენს სიაში უფრო მეტი რესტორანი დავამატოთ. გარდა ამისა, ვიყენებთ უკონტაქტო მიტანის სერვისს და ყველანაირად ვცდილობთ დავიცვათ კურიერების და მომხმარებლების უსაფრთხოება“, - განმარტა ნათია ლიპარტელიანმა.

ადგილზე მიტანის სერვისის სარგებლობის მსურველთა რაოდენობის ზრდაზე საუბრობს „კომერსანტთან“  „ვოლტის“ გენერალური მენეჯერი ნატალია ხიზანიშვილიც. მისი ინფორმაციით, გაზრდილი მოთხოვნის დაკმაყოფილება კომპანიამ უპრობლემოდ მოახერხა და საჭიროების შემთხვევაში კიდევ უფრო დიდი მოცულობის შეკვეთების მომსახურებასაც შეძლებენ.

„ადგილზე მიწოდების სერვისზე მოთხოვნა სტაბილურად იზრდება, განსაკუთრებით, ბოლო პერიოდში. გაზრდილი მოთხოვნის დაკმაყოფილება უპრობლემოდ შევძელით და მზად ვართ კიდევ უფრო დიდი მოთხოვნა დავაკმაყოფილოთ თუ ამის საჭიროება დადგა. ჩვენი მიმართულებით გვსურს, რომ მიტანის მომსახურება სუპერმარკეტებიდანაც დავამატოთ, ასევე ახალი რესტორნების მიმართულებითაც გვაქვს მოლაპარაკებები, რადგან ბევრი მათგანი იკეტება და აქედან გამომდინარე, გვინდა რომ ჩვენს სისტემაში მაქიმალურად ყველა ჩავრთოთ. გვსურს, ჩვენი მომხმარებლებს ახალი რესტორნებიდან მიტანის სერვისი აქტიურად შევთავაზოთ. გარდა ამისა, დავნერგეთ უკონტაქტო მიტანის სერვისი, რაც დამატებითი უსაფრთხოების გარანტიაა როგორც მომხმარებლისთვის, ასევე კურიერისთვის“, - განაცხადა  ნატალია ხიზანიშვილმა.

შეგახსენებთ, რომ რამდენიმე დღის წინ, ეკონომიკისა და მდგრადი განვითარების მინისტრი ნათია თურნავა ადგილზე მიტანის სერვისის განმახორციელებელი კომპანიების წარმომადგენლებს შეხვდა და მათ საჭიროების შემთხვევაში მაქსიმალური მხარდაჭერა აღუთქვა.

ნინო თამაზაშვილი