საყოფაცხოვრებო ქიმიის, ჰიგიენური საშუალებებისა და კოსმეტიკის მაღაზიათა ქსელმა „სუფთა სახლი“ მუშაობა განაახლა. აღნიშნული შესაძლებელი მთავრობის დადგენილებაში შესული ცვლილების შემდეგ გახდა, რომელიც მიხედვითაც, „სუფთა სახლს“ ეკონომიკური საქმიანობის გაგრძელების უფლება მიეცა. ცვლილება მთავრობის 23 მარტის დადგენილებაში შევიდა. ინფორმაცია „საკანონმდებლო მაცნეზეა“ ხელმისაწვდომი.
დადგენილებაში შეტანილი ცვლილებების თანახმად, ეკონომიკური საქმიანობის განმახორციელებელი მეწარმე სუბიექტების ჩამონათვალს, რომელთაც საგანგებო მდგომარეობის პერიოდში, საქმიანობა არ ეზღუდებათ, შპს სუფთა სახლიც დაემატა.მთავრობის დადგენილება ძალაში 28 აპრილს შევიდა.
„სუფთა სახლში“ აცხადებენ, რომ დღეს დილიდან ქსლეის ყველა მაღაზია გაიხსნა და ჩეულ რეჟიმში გააგრძელებს მუშაობას.
მაღაზიების ქსელმა „სუფთა სახლმა“ საქმიანობის დროებით შეჩერების შესახებ, განცხადება 10 აპრილს სოციალურ ქსელში გაავრცელა.
რეესტრის ამონაწერით, „სუფთა სახლი“ 2010 წელს დაფუძნდა. სამეწარმეო რეესტრის მიხედვით, კომპანიის 100%-იანი წილის მფლობელი თავდაპირველად თამარ ღვინიაშვილი იყო. რეესტრის ბოლო ამონაწერით, „სუფთა სახლში“ თამარ ღვინიაშვილი მხოლოდ 5%-ს ფლობს, კომპანიის 95%-იანი წილის მფლობელი კი არის ვირჯინიის კუნძულებზე რეგისტრირებული შპს GRG Trading-ი.
კომპანიის 2018 წლის ფინანსური ანგარიშგების მიხედვით (2019 წლის ანგარიშგება ჯერ გამოქვეყნებული არ არის) „სუფთა სახლი“ არის მეორე კატეგორიაში, რაც იმას ნიშნავს, რომ აქტივების ჯამური ღირებულება 50 მილიონ ლარს არ აღემატება; შემოსავალი 100 მილიონ ლარს არ აღემატება და საანგარიშგებო პერიოდში დასაქმებულთა საშუალო რაოდენობა კი 250-ს.
ამავე ანგარიშგების მიხედვით, 2018 წელს „სუფთა სახლის“ შემოსავალი შეადგენდა 78,124 000 ლარს; საქონლის თვითღირებულება - 55,139 000 ლარს; წმინდა მოგება 3,860 000 ლარი.
სოფო ქსოვრელი